Read Malay, North Moluccan Filipi 4 Bible Online

Filipi 4 - Malay, North Moluccan bible

Filipi 4

¹Jadi, sudara-sudara yang kita sayang deng yang kita rindu. Ngoni yang biking kita pe hati sanang, deng ngoni lagi yang biking kita bangga. Kita minta supaya ngoni tetap percaya turus pa Tuhan, sama deng yang tadi kita so bilang.

²Kita minta pa Euodia deng Sintikhe,[6] supaya ngoni dua baku bae ulang, sama deng yang pantas orang yang so percaya pa Tuhan musti biking.

³Pa Sunsugos lagi, kita pe tamang karja yang setia, kita minta supaya ngana bantu pa dong dua itu, supaya dong bisa baku bae ulang. Dorang dua itu so berusaha karas sama-sama deng kita. Torang tiga jaga kase tau Kabar Bae tentang Yesus Kristus pa orang-orang. Bagitu lagi deng Klemens deng torang pe tamang-tamang laeng yang so karja sama-sama deng kita untuk kase tau Kabar Bae itu. Dorang samua pe nama-nama so tatulis di buku kehidupan.[7]

⁴Ngoni pe hati musti salalu sanang karna ngoni so satu hati deng Tuhan! Kita bilang satu kali lagi: ngoni sanang suda!

⁵Kong biar suda samua orang bole lia ngoni pe kalakuang yang bae. Inga! So tara lama lagi Tuhan mo datang ulang.

⁶Jadi tara usa suda ngoni hawater tentang apa-apa. Tapi, ngoni musti berdoa suda, minta pa Tuhan Allah tentang samua hal. Ngoni kase tau suda samua ngoni pe perlu pa Tuhan Allah, deng bilang tarimakasi banya pa Dia.

⁷Kalu ngoni biking bagitu, Tuhan Allah mo biking ngoni pe hati tetap tenang, hati tenang itu yang tara mungkin manusia mo mangarti. Rasa tenang itu akan salalu biking ngoni pe hati deng pikiran tenang, karna ngoni so satu hati deng Kristus Yesus.

⁸Jadi sudara-sudara, ini kita pe nasehat terahir yang kita mo bilang pa ngoni. Ngoni musti pikir turus-turus samua yang ada guna macam bagini: samua yang butul, samua yang pantas orang hormati, samua yang adil, samua yang tara biking ngoni berdosa, samua yang bae, samua yang bagus yang orang suka mo kase carita, deng samua yang pantas untuk orang puji. Ngoni musti pikir turus samua itu.

⁹Kong samua yang ngoni so balajar dari kita, yang ngoni so dengar deng tarima dari kita, deng yang ngoni so lia kita biking, ngoni biking suda samua itu. Kong Tuhan Allah yang biking orang pe hati tetap tenang, Dia yang mo sama-sama deng ngoni turus.

¹⁰Kita pe hati paling sanang karna kita so satu hati deng Tuhan. Barang, biar sampe so lama bagini, ngoni tara lupa pa kita. Memang kita tau, dulu ngoni tara perna lupa untuk bantu pa kita, tapi karna torang so tapisa lama, ngoni tarada kesempatan untuk kirim ngoni pe bantuan pa kita. Tapi skarang ngoni so bantu ulang pa kita.

¹¹Kita bilang ini, kita bukang maksut kita ada kurang apa-apa, kong kita mo minta bantu lagi pa ngoni. Tarada, karna kita so balajar kase cukup kita pe diri sandiri deng apa yang ada pa kita.

¹²Kita tau bagimana hidup susa, deng kita me tau bagimana hidup tara kurang apa-apa sampe talebe-lebe lagi. Dalam keadaan apa saja, kita so balajar hidup untuk kase cukup kita pe diri, biar itu waktu kanyang ka, lapar ka, biar itu waktu kita kurang apa-apa ka, atau di waktu kita ada talebe-lebe.

¹³Kita bole batahang deng sagala macam keadaan, itu karna Yesus Kristus yang biking kita kuat mangada samua itu.

¹⁴Tapi biar bagitu, ngoni lagi so bantu pa kita waktu kita dapa susa. Apa yang ngoni so biking itu memang bae.

¹⁵ Sudara-sudara yang percaya di Filipi, ngoni sandiri so tau butul, dulu waktu kita kase tinggal daera Makedonia, waktu pertama kali kase tau Kabar Bae tentang Yesus Kristus, tara ada jemaat laeng yang bantu pa kita. Cuma ngoni saja yang bantu kase doi pa kita.

¹⁶ Kong bukang cuma itu saja. Waktu kita dapa kekurangan di kota Tesalonika, ngoni bantu pa kita babarapa kali.

¹⁷Kita bicara tentang doi ini, bukang karna kita ingin ngoni kase lagi pa kita, tapi kita mau, biar suda Tuhan Allah yang balas ngoni pe bae karna ngoni so bantu pa kita.

¹⁸ Skarang kita so tarima samua yang kita perlu dari ngoni, mala so talebe-lebe lagi. Samua itu Epafroditus yang bawa. Apa yang ngoni kase pa kita, itu biking Tuhan Allah pe hati sanang, kong apa yang ngoni kase itu pantas Tuhan Allah tarima, sama deng dulu orang bakar binatang korban persembahan yang bobou sadap pa Tuhan Allah.

¹⁹Kita pe Tuhan Allah kaya dalam sagala hal, deng Dia itu hebat, jadi Dia akan kase apa saja yang ngoni perlu, karna ngoni so satu hati deng Kristus Yesus.

²⁰Mari suda torang puji deng hormat pa Tuhan Allah, torang pe Bapa sampe slama-lamanya! Amin.

²¹Ngoni kirim kita pe salam pa samua orang yang so jadi Tuhan Allah pe umat yang ada di situ, dorang yang so satu hati deng Kristus Yesus. Kong ada salam lagi dari sudara-sudara yang percaya yang ada sama-sama deng kita di sini.

²²Salam untuk ngoni dari samua orang yang so jadi Tuhan Allah pe umat yang ada di sini, lebe kusus lagi ada salam dari Tuhan pe umat yang karja di raja basar Roma pe istana.

²³Kita minta supaya Tuhan Yesus Kristus kase Dia pe bae pa ngoni samua.