Read Malay, North Moluccan 1 Tesalonika 2 Bible Online

1 Tesalonika 2 - Malay, North Moluccan bible

1 Tesalonika 2

¹Sudara-sudara, waktu torang datang pa ngoni bawa Kabar Bae tentang Yesus Kristus, ngoni sandiri tau, itu tara parcuma tapi ada dia pe guna.

² Ngoni me tau, waktu torang bolong datang pa ngoni, torang dapa siksa deng dapa hina di kota Filipi. Tapi biar ada orang yang tantang Kabar Bae itu, Tuhan Allah tetap tolong pa torang sampe torang me barani kase tau Kabar Bae dari Tuhan Allah pa ngoni.

³Torang kase tau Kabar Bae itu, supaya ngoni percaya pa Tuhan Yesus, kong yang torang kase tau itu, bukang ajaran yang tara butul. Torang tara maksut jahat deng tara mau kase foya orang.

⁴Mala, torang kase tau pa ngoni Kabar Bae itu karna Tuhan Allah lia torang pantas kase tau itu, jadi Dia kase percaya itu pa torang. Biar ada orang yang tara sanang deng Kabar Bae itu, torang tetap kase tau saja, karna yang penting Tuhan Allah yang rasa sanang! Barang, Dia yang uji torang pe hati.

⁵Ngoni sandiri me tau, torang tara perna kase kaluar kata-kata yang cuma biking orang pe hati sanang, atau bafoya pa ngoni la mo cari untung dari ngoni. Tuhan Allah tau butul torang pe isi hati.

⁶Tara perna torang cari pujian dari ngoni atau orang laeng. Torang ini Tuhan Yesus pe utusan yang orang sebut rasul, jadi sebenarnya torang bole suru pa ngoni la bantu torang pe hidup hari-hari, tapi torang tara mau bagitu.

⁷Torang salalu bae-bae pa ngoni, sama deng mama yang urus deng jaga dia pe ana-ana bae-bae.

⁸Torang sayang skali pa ngoni. Jadi torang bukang cuma sanang kase tau pa ngoni Kabar Bae dari Tuhan Allah, tapi torang lagi serakan tong pe hidup untuk ngoni, karna torang memang sayang skali pa ngoni.

⁹Sudara-sudara, ngoni pasti masi inga, waktu torang deng ngoni, torang mancari siang malam supaya torang bole tanggung tong pe hidup sandiri. Deng bagitu, torang pe hidup tara baharap pa sapa-sapa waktu torang kase tau pa ngoni Kabar Bae dari Tuhan Allah.

¹⁰Waktu torang ada sama-sama deng ngoni, torang hidup iko Tuhan Allah pe mau, biking barang yang butul, deng tara biking sala apa-apa pa ngoni orang-orang yang percaya. Ngoni so lia deng mata kapala sandiri, bagitu me deng Tuhan Allah so lia.

¹¹Ngoni samua tau torang pe cara ajar pa ngoni, sama deng papa yang bae urus pa dia pe ana-ana sandiri.

¹²Itu, torang kase smangat deng kase kuat ngoni pe hati supaya ngoni pe hidup pantas untuk orang yang iko pa Tuhan Allah. Tuhan Allah pangge pa ngoni la jadi Dia pe umat yang Dia berkuasa sebagai Raja, kong ngoni nanti dapa puji deng hormat sama-sama deng Dia.

¹³Torang lagi salalu bilang tarimakasi pa Tuhan Allah karna waktu torang kase tau pa ngoni Kabar Bae dari Tuhan Allah, ngoni tarima itu deng sanang hati. Ngoni tarima Kabar Bae itu karna ngoni tau, kata-kata itu bukang dari manusia, tapi dari Tuhan Allah. Deng memang itu butul dari Tuhan Allah. Kong Kabar Bae itu bakarja di ngoni pe hati yang percaya pa Yesus Kristus.

¹⁴ Sudara-sudara, ngoni so dapa siksa dari ngoni pe sudara satu bangsa di kota Tesalonika. Itu sama deng orang Yahudi yang percaya pa Kristus Yesus di daera Yudea yang dapa siksa dari dorang pe orang sandiri.

¹⁵ Orang Yahudi dulu yang bunu pa nabi-nabi deng pa Tuhan Yesus, turus skarang dorang siksa lagi pa torang. Dorang baku musu deng samua orang. Tuhan Allah paling tara suka apa yang dong biking itu.

¹⁶Dorang itu yang berusaha supaya torang jang kase tau Kabar Bae pa orang-orang yang bukang Yahudi. Dorang tara mau orang tarima Kabar Bae supaya slamat. Deng bagitu dorang pe dosa lebe tatamba banya, sampe satu waktu yang Tuhan Allah bilang so cukup suda dong pe dosa. Di situ baru dorang dapa hukum yang barát dari Tuhan Allah.

¹⁷Sudara-sudara, torang terpaksa baku pisa deng ngoni sementara waktu. Tapi biar torang jao dari ngoni, torang salalu inga pa ngoni. Torang rindu skali pa ngoni kong torang berusaha la mo baku dapa ulang deng ngoni.

¹⁸Barang, torang ada rencana mo pigi pa ngoni. Kita sandiri me so babarapa kali coba mo pigi, tapi Iblis, setang-setang pe raja biking sampe torang tara jadi pigi pa ngoni.

¹⁹Torang mau skali pigi pa ngoni, karna ngoni suda yang dengar Kabar Bae dari torang, sampe ngoni so percaya pa Yesus butul-butul. Ngoni pe percaya itu yang biking sampe torang pe hati sanang deng biking sampe torang bole baharap deng yakin, nanti waktu torang pe Tuhan Yesus datang ulang, torang bole angka muka karna ngoni pe percaya pa Tuhan.

²⁰Memang butul, ngoni ini yang biking torang dapa puji deng hormat deng biking torang pe hati sanang.