Read Malay, North Moluccan 1 Tesalonika 3 Bible Online

1 Tesalonika 3 - Malay, North Moluccan bible

1 Tesalonika 3

¹ Torang inga skali pa ngoni, jadi torang so ingin pigi ka sana. Tapi torang pikir, lebe bae kita deng Silwanus tinggal dulu di kota Atena,

²turus Timotius torang pe sudara yang sama-sama percaya, torang utus pigi pa ngoni. Timotius itu torang pe tamang karja yang sama-sama kase tau Tuhan Allah pe Kabar Bae tentang Yesus Kristus. Torang utus pa Timotius la kase kuat ngoni pe hati deng kase smangat pa ngoni supaya ngoni lebe tamba percaya pa Yesus.

³Deng bagitu, biar ngoni dapa siksa, ngoni tetap batahang percaya pa Yesus. Barang, ngoni sandiri me tau, orang yang percaya pa Yesus pasti mo menderita.

⁴Waktu torang masi ada sama-sama deng ngoni, torang so perna kase tau pa ngoni, torang yang percaya pa Yesus, nanti akan dapa macam-macam susa dari orang yang tara percaya. Kong skarang torang samua so rasa siksa itu.

⁵Jadi kita utus Timotius pa ngoni, karna kita rasa tara puas kalu tara dengar ngoni pe kabar. Kita mo cari tau kalu ngoni masi percaya turus pa Yesus ka so tarada. Kita hawater, jang sampe Iblis, setang-setang pe raja goda pa ngoni, kong ngoni so tara percaya lagi pa Yesus. Kalu sampe jadi bagitu, torang pe karja kase ajar Kabar Bae pa ngoni tarada dia pe guna.

⁶ Tapi skarang Timotius so bale dari ngoni di Tesalonika, kong dia kase tau kabar tentang ngoni yang biking torang sanang. Dia carita, ngoni tetap percaya pa Yesus deng baku sayang. Ngoni me inga pa torang deng rasa sanang. Kong ngoni suka mo baku dapa ulang deng torang, sama deng torang me suka baku dapa deng ngoni.

⁷Jadi sudara-sudara, biar torang dapa banya susa deng siksa, torang pe hati tetap sanang, barang torang dengar ngoni di sana tetap percaya.

⁸Jadi skarang, torang rasa torang pe hidup butul-butul ada dia pe guna, karna ngoni tetap percaya pa Tuhan.

⁹Torang bilang tarimakasi banya pa Tuhan Allah torang pe Tuhan deng hati yang sanang skali, karna ngoni tetap percaya pa Dia.

¹⁰Siang malam torang berdoa sunggu-sunggu, la torang samua bisa baku dapa lagi. Barang, torang mo ajar apa yang masi kurang pa ngoni, supaya ngoni pe percaya lebe tamba kuat.

¹¹Torang minta pa Tuhan Allah, torang pe Bapa, deng pa Yesus Kristus, torang pe Tuhan, supaya kase jalang la torang bole baku dapa deng ngoni lagi.

¹²Torang minta la Tuhan Allah biking ngoni lebe tamba baku sayang, deng ngoni pe sayang pa orang laeng lebe tatamba, sama deng torang pe sayang pa ngoni.

¹³Torang minta bagitu, supaya nanti waktu torang pe Tuhan Yesus datang ulang sama-sama deng samua orang yang so jadi Dia pe umat, ngoni jadi orang yang pe hati bersi pa Tuhan Allah, torang pe Bapa pe muka, deng Dia tara dapa ngoni pe sala apa-apa.