Read Malay, North Moluccan 2 Tesalonika 2 Bible Online

2 Tesalonika 2 - Malay, North Moluccan bible

2 Tesalonika 2

¹ Sudara-sudara, torang mo kase tau pa ngoni tentang torang pe Tuhan Yesus Kristus pe waktu mo datang ulang, deng tentang Dia mo kumpul pa torang sama-sama deng Dia. Torang minta pa ngoni,

²supaya jang ngoni capat bingung atau hawater kalu kage-kage ngoni dengar kata, Tuhan Yesus so datang ulang. Biar ada yang bilang kata, Roh Kudus yang kase tau, atau ada kabar bilang bagitu, atau dorang bilang kata, torang yang bilang lewat surat, jang dulu percaya, karna kabar itu tara butul.

³Jang kase biar sampe orang kase foya pa ngoni deng cara apa saja! Barang, sebelum Tuhan Yesus datang ulang, ini yang musti mo jadi kamuka: banya skali orang akan malawang pa Tuhan, deng orang yang paling jahat akan datang. Orang yang paling jahat itu yang nanti waktu kiamat, mo tapisa deng Tuhan Allah slama-lamanya.

⁴ Orang jahat itu akan malawang pa Tuhan Allah deng pa samua yang manusia semba. Dia bilang kata, dia Yang Paling Berkuasa dari samua itu. Dia maso di Ruma Ibada Pusat kong bilang pa samua orang kata, dia itu Tuhan Allah.

⁵Ngoni masi inga itu, to? Waktu kita masi ada sama-sama deng ngoni, kita jaga kase tau pa ngoni tentang samua itu.

⁶Orang jahat itu torang bolong lia pa dia skarang, karna ada yang masi tahang pa dia. Ngoni so tau to, apa itu yang tahang pa dia, supaya orang jahat itu nanti mo muncul di waktu yang Tuhan Allah so tentukan.

⁷Orang jahat itu so mulai biking dia pe karja sambunyi-sambunyi supaya orang-orang malawang pa Tuhan Allah, cuma masi ada yang tahang pa dia. Tapi ada dia pe waktu, Tuhan Allah mo kase lapas apa yang tahang pa dia.

⁸ Waktu itu, baru orang jahat itu mo muncul. Tapi waktu Tuhan Yesus datang ulang deng Dia pe kuasa yang hebat, orang jahat itu akan mati slama-lamanya. Tuhan Yesus bunu pa dia deng cara tiop pa dia, langsung dia mati.

⁹ Tapi waktu Tuhan Yesus bolong datang, orang jahat itu mo muncul deng kuasa dari Iblis, setang-setang pe raja, la biking mujizat-mujizat deng tanda-tanda, supaya biking orang herang sampe tipu pa dorang la dorang kira kata, dia itu pake Tuhan Allah pe kuasa.

¹⁰Orang jahat itu mo pake banya cara yang tara bae, la mo tipu pa orang-orang yang akan tapisa deng Tuhan Allah slama-lamanya. Dorang itu mo tapisa deng Tuhan Allah karna dorang tara mau dengar ajaran yang butul tentang Tuhan Yesus yang mo kase slamat pa dorang.

¹¹Kong karna dorang tara percaya, Tuhan Allah kase biar dorang dapa tipu deng iko barang yang tara butul.

¹²Tuhan Allah biking bagitu, supaya samua orang yang suka biking barang yang jahat, deng yang tara percaya ajaran yang butul tentang Tuhan Yesus, akan dapa hukum.

¹³Sudara-sudara yang Tuhan Allah sayang! Torang salalu bilang tarimakasi pa Tuhan Allah untuk ngoni, karna waktu dunia ini bolong jadi, Dia so pili pa ngoni supaya ngoni dapa slamat. Dia kase slamat pa ngoni, barang ngoni percaya ajaran yang butul dari Tuhan Allah, deng karna Roh Kudus biking ngoni jadi Dia pe umat yang hidup deng hati bersi.

¹⁴Tuhan Allah memang mau bagitu, jadi Dia pangge pa ngoni supaya dapa slamat waktu torang kase tau pa ngoni Kabar Bae tentang Yesus Kristus. Deng bagitu, ngoni bole rasa Yesus Kristus pe bae deng nanti dapa puji deng hormat sama-sama deng Dia, torang pe Tuhan.

¹⁵Jadi sudara-sudara, ngoni musti tetap iko turus pa Tuhan! Pegang bae-bae samua ajaran yang torang so ajar pa ngoni, bae itu yang torang bilang langsung deng yang torang bilang deng surat.

¹⁶Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.

¹⁷Jadi, torang berdoa supaya Tuhan kase hibur deng kase kuat ngoni samua pe hati supaya ngoni salalu bisa biking yang bae deng bicara yang bae.