Read Malay, North Moluccan 2 Tesalonika 3 Bible Online

2 Tesalonika 3 - Malay, North Moluccan bible

2 Tesalonika 3

¹Sudara-sudara, torang minta lagi supaya ngoni kase berdoa pa torang. Ngoni berdoa, supaya Tuhan pe Kabar Bae capat tasiar di mana-mana la orang tarima itu deng rasa hormat, sama deng dulu waktu ngoni tarima Kabar Bae itu.

²Ngoni berdoa lagi supaya Tuhan Allah kase slamat pa torang dari orang-orang yang jahat deng yang tukang biking kaco, karna tara samua orang yang dengar Tuhan pe Kabar Bae jadi percaya.

³Tuhan Allah itu setia. Dia mo kase kuat ngoni pe hati deng jaga pa ngoni dari yang jahat.

⁴Deng karna ngoni so percaya pa Tuhan, torang yakin ngoni biking apa yang torang so pasáng pa ngoni, deng pasti ngoni akan biking itu turus-turus.

⁵Torang minta pa Tuhan supaya Dia bantu pa ngoni untuk lebe mangarti Tuhan Allah pe sayang, deng supaya ngoni bole tahang siksa sama deng dulu waktu Yesus Kristus tahang siksa.

⁶Sudara-sudara, karna kita Tuhan Yesus Kristus pe utusan, kita minta pa ngoni supaya ngoni bajao dari sudara-sudara yang sama-sama percaya yang tara mancari deng tara iko ajaran yang torang so kase ajar pa ngoni.

⁷Barang, ngoni sandiri tau, ngoni musti ambe conto torang pe cara hidup deng iko apa yang torang jaga biking. Karna waktu torang sama-sama deng ngoni, torang tara perna pamalas mancari.

⁸Torang tara perna makang orang pe makanang cuma-cuma. Tapi torang berusaha mancari siang malam supaya torang tara jadi beban pa ngoni.

⁹Torang biking itu bukang karna torang tarada hak untuk jemaat bantu pa torang. Tapi torang tara mau pake hak itu. Torang karja karas bagitu, karna torang suka jadi conto untuk ngoni, supaya ngoni bole iko.

¹⁰Tempo hari waktu torang sama-sama deng ngoni, torang so pasáng pa ngoni, kalu orang yang tara mau bakarja, dia tara bole makang.

¹¹Torang bilang bagitu, karna torang dengar di antara ngoni ada orang-orang yang tara hambak kong tara bakarja. Dorang itu cuma suka iko campur orang laeng pe urusan.

¹²Orang-orang yang sama deng itu, torang kase inga deng kase nasehat pake kuasa dari Tuhan Yesus Kristus, supaya dorang bakarja bae-bae la dorang bisa makang.

¹³Deng ngoni sudara-sudara, jang ngoni pastiu biking barang yang bae.

¹⁴Kalu ada orang yang tara mau iko yang torang tulis di surat ini, ngoni musti ati-ati deng jang batamang deng dia, supaya dia jadi malu.

¹⁵Tapi jang ngoni anggap dia itu musu. Lebe bae ngoni togor pa dia deng bae-bae la dia iko Tuhan pe mau, karna dia itu ngoni pe sudara yang sama-sama percaya.

¹⁶Tuhan yang biking manusia pe hati tenang. Jadi, torang minta pa Dia supaya Dia salalu biking ngoni pe hati tetap tenang. Torang me minta supaya Tuhan sama-sama deng ngoni samua.

¹⁷Salam dari kita Paulus. Kita tulis salam ini deng kita pe tangan sandiri. Di samua surat yang kita tulis, kita pake tanda bagini la orang tau surat ini butul dari kita.

¹⁸Kita minta pa Yesus Kristus, torang pe Tuhan, la Dia kase Dia pe bae pa ngoni samua.