Read Malay, North Moluccan 1 Timotius 2 Bible Online

1 Timotius 2 - Malay, North Moluccan bible

1 Timotius 2

¹Timotius, kita bilang pa ngana, yang paling penting, torang berdoa pa Tuhan Allah. Torang minta apa yang torang perlu, torang minta untuk orang laeng lagi, deng torang bilang tarimakasi pa Dia untuk samua yang Dia so biking.

²Torang musti kase berdoa pa raja-raja deng pa pemimpin-pemimpin laeng, supaya torang bole hidup aman deng baku bawa bae-bae. Deng bagitu, torang bole hidup iko Tuhan Allah pe mau deng torang pe kalakuang yang pantas untuk orang yang so percaya pa Tuhan.

³Kalu torang berdoa untuk samua orang, itu yang bagus, deng yang biking Tuhan Allah sanang. Dia itu yang kase slamat pa torang,

⁴Dia mau samua orang dapa slamat deng mangarti ajaran yang butul.

⁵Barang, Tuhan Allah itu cuma satu. Deng cuma ada satu saja yang bisa kase bae-bae ulang Tuhan Allah deng manusia pe hubungan. Dia itu Kristus Yesus yang jadi manusia.

⁶Dia serakan Dia pe diri untuk kase slamat samua manusia dari dosa. Deng bagitu, Tuhan Allah kase tunju bukti di waktu yang Dia tentukan, Dia ingin supaya samua manusia dapa slamat.

⁷ Untuk kase tau pa orang-orang Kabar Bae itu, Tuhan Allah pili pa kita jadi Dia pe utusan yang orang sebut rasul. Dia suru pa kita pigi kase tau deng kase ajar pa orang-orang yang bukang Yahudi, supaya dorang percaya pa Yesus deng iko ajaran yang butul. Samua yang kita bilang ini butul, kita tara bafoya.

⁸Karna itu, kita mau orang-orang percaya berdoa di mana-mana, yang laki-laki angka tangan kong puji pa Tuhan deng hati yang bersi. Dorang tara bole mara deng tara bole baku malawang deng orang laeng.

⁹ Bagitu lagi deng parampuang. Kita mau dorang pake baju yang sederhana, yang pantas deng sopan. Dorang tara perlu bagaya yang lebe-lebe macam deng pake mas, mutiara, atau pakeang mahal-mahal, atau rambu yang macam-macam.

¹⁰Tapi lebe bae parampuang itu biking bagus dong pe diri deng cara jaga biking apa yang bae. Cara itu yang pantas untuk parampuang yang mangaku percaya pa Tuhan.

¹¹Kong kalu ada yang kase ajar Tuhan pe ajaran, parampuang-parampuang musti tarima ajaran itu butul-butul, deng tara bole baribut.

¹²Kita tara kase bae parampuang mangajar, deng lagi tara kase bae parampuang parenta pa laki-laki. Kalu sementara bakumpul untuk dengar ajaran, parampuang musti dengar bae-bae, kong coba badiam.

¹³ Barang, yang kamuka Tuhan Allah cipta itu Adam, baru Hawa.

¹⁴ Deng, bukang Adam yang dapa tipu dari Iblis, tapi Hawa yang dapa tipu sampe dia berdosa.

¹⁵Biar bagitu me, Tuhan Allah akan kase slamat pa parampuang-parampuang waktu dorang melahirkan,[2] asal parampuang itu tetap percaya pa Yesus Kristus, sayang pa orang laeng, hidup deng hati bersi pa Tuhan Allah pe muka, deng dia pe cara hidup musti sederhana.