Read Malay, North Moluccan 1 Timotius 6 Bible Online

1 Timotius 6 - Malay, North Moluccan bible

1 Timotius 6

¹Tiap orang karja yang so percaya pa Yesus, dorang itu musti hormati pa dong pe tuang yang so bili pa dorang. Deng bagitu, orang-orang yang tara percaya pa Yesus tara dapa alasan mo kase tara bae Tuhan Allah pe nama deng torang pe ajaran.

²Kalu orang-orang karja itu pe tuang me percaya pa Yesus, jang dong pandang enteng karna dorang so basudara dalam Tuhan. Tapi dorang musti layani lebe bae lagi pa dong pe tuang itu. Dorang biking bagitu, karna dong pe karja itu bantu orang yang percaya pa Yesus, deng karna dorang sayang pa dong pe tuang. Timotius, ngana musti kase ajar deng bilang samua nasehat ini pa orang-orang percaya la dorang biking.

³Ajaran ini dari Yesus Kristus torang pe Tuhan. Kalu iko ajaran itu, torang hidup iko Tuhan Allah pe mau. Tapi ada orang yang tara percaya torang pe ajaran itu, kong bawa ajaran yang sesat. Sapa yang kase ajar ajaran yang sesat,

⁴dia itu biking diri mangarti, padahal dia tara tau apa-apa. Dia cuma suka baku malawang tentang arti dari kata-kata karna dia pe pikiran tara butul. Dia yang biking sampe orang baku mangiri, bakalae, kase tara bae orang pe nama, deng baku curiga.

⁵Orang yang jaga kase ajar ajaran sesat itu, dong pe hidup suka baku malawang, deng dorang itu tara tau apa yang butul, kong dong kira deng hidup iko Tuhan Allah pe mau, dong mo jadi kaya.

⁶Sebenarnya kalu orang butul-butul hidup iko Tuhan Allah pe mau, deng apa yang dia so dapa dari Tuhan dia rasa puas, dia so untung skali.

⁷Karna waktu torang lahir di dunia ini, torang tara bawa apa-apa. Bagitu lagi kalu torang mati, torang tara bisa bawa apa-apa.

⁸Jadi, kalu torang so ada makanang deng baju, torang musti puas deng apa yang so ada pa torang.

⁹Tapi orang-orang yang suka jadi kaya, dorang itu yang gampang tagoda biking barang yang jahat. Dorang pe keinginan yang bodo itu talalu tinggi. Dorang pe keinginan itu yang biking dorang cilaka. Itu sama deng binatang yang cari makanang tapi so takanal dodeso kamuka.

¹⁰Karna orang yang gila doi, dorang itu mo biking macam-macam kajahatan. Dorang itu so tara percaya lagi Yesus pe ajaran karna dorang berusaha mo jadi kaya. Jadi dia pe ahir kabawa, dorang dapa sengsara skali yang biking sampe dong pe hati saki.

¹¹Tapi Timotius, ngana itu so jadi Tuhan Allah pe umat. Jadi jang ngana badekat deng hal-hal yang tara bae. Ngana musti berusaha hidup butul pa Tuhan Allah pe muka, iko Tuhan Allah pe mau, tamba percaya pa Yesus, tamba sayang pa orang laeng, tetap tahang hadapi macam-macam susa, deng tara kasar pa orang laeng.

¹²Ngana musti berusaha turus percaya pa Tuhan Allah, sama deng orang yang iko lomba yang berusaha mo dapa piala. Tuhan Allah so pangge pa ngana untuk hidup deng Dia slama-lamanya. Waktu Tuhan Allah pangge pa ngana, ngana mangaku sunggu-sunggu percaya pa Yesus Kristus di orang banya pe muka.

¹³ Timotius, kita suru pa ngana skarang pa Tuhan Allah pe muka, Dia itu yang biking samua jadi hidup, deng pa Kristus Yesus pe muka, Dia itu yang barani basaksi barang yang butul pa gubernur Pontius Pilatus pe muka. Kita suru pa ngana,

¹⁴iko samua Tuhan Allah pe parenta sampe hari yang torang pe Tuhan Yesus Kristus datang lagi. Parenta itu kita so kase tau pa ngana, ngana musti biking itu butul-butul, supaya orang tara kase sala pa ngana.

¹⁵Tuhan Allah sandiri yang tentukan tempo apa Tuhan Yesus mo datang lagi. Cuma Tuhan Allah saja yang berkuasa, jadi pantas torang puji. Dia itu Raja dari samua raja, deng Tuhan dari samua tuhan.

¹⁶Cuma Tuhan Allah saja yang tara perna mati. Dia hidup di dalam tarang. Tarang itu tarang skali, sampe orang me tara bole badekat pa Dia. Deng tarada orang yang perna lia pa Dia, deng memang butul tara orang bisa lia pa Dia. Samua hormat untuk Dia, deng samua kuasa ada pa Dia sampe slama-lamanya. Amin!

¹⁷Timotius, ngana musti kase inga pa orang-orang kaya di dunia ini, supaya jang dorang basombong deng jang cuma baharap pa dong pe harta saja. Barang, harta di dunia ini, hari ini ada, tapi beso so abis. Dorang yang kaya itu musti baharap pa Tuhan Allah. Tuhan Allah kase pa torang apa yang torang perlu. Dia yang kase samua pa torang sampe talebe-lebe, supaya torang bole rasa samua itu.

¹⁸Kase inga pa orang-orang kaya itu supaya dorang biking banya barang yang bae. Dorang musti suka kase pa orang-orang apa yang dorang perlu, deng apa yang ada pa dorang musti kase bage-bage pa orang-orang deng sanang hati.

¹⁹Kalu dorang biking bagitu, itu sama deng dorang so kumpul harta yang paling bagus di sorga la jadi dasar untuk dorang pe hidup nanti deng Tuhan Allah slama-lamanya. Itu suda hidup yang sebenarnya.

²⁰Timotius, ngana musti jaga bae-bae samua yang Tuhan so kase percaya pa ngana. Jang ngana badekat deng orang yang bacarita hal yang tarada dia pe guna deng yang tara hormati pa Tuhan Allah. Deng jang ngana badekat pa orang yang bawa ajaran sesat, yang orang jaga bilang ‘pengetahuan’, padahal itu sala.

²¹Ada babarapa orang yang iko ajaran yang sesat itu, sampe dorang so tara percaya lagi pa Yesus. Kita minta pa Tuhan Allah la Dia kase Dia pe bae pa ngoni.