Read Malay, North Moluccan 2 Timotius 2 Bible Online

2 Timotius 2 - Malay, North Moluccan bible

2 Timotius 2

¹Timotius, ngana so sama deng kita pe ana sandiri! Kristus Yesus so kase Dia pe bae pa ngana, jadi pake itu untuk kase kuat ngana pe hati karna ngana so percaya pa Dia.

²Ngana so dengar samua ajaran yang kita ajar pa orang banya. Ngana musti kase ajar ajaran itu pa orang laeng yang ngana bisa percaya deng yang pande mangajar. Deng bagitu dorang jadi tau kong ajar lagi ajaran itu pa orang laeng.

³Kalu ngana biking ngana pe tugas kong menderita, ngana musti batahang. Ngana iko pa Kristus Yesus turus, sama deng tentara yang setia pa dia pe komandan.

⁴Kalu tentara yang sementara biking dia pe tugas, dia tara bapusing deng urusan-urusan laeng. Dia cuma biking dia pe tugas, supaya dia pe komandan sanang pa dia. Torang musti biking bagitu la kase sanang torang pe Tuhan saja.

⁵Kalu torang karja untuk Tuhan, torang musti iko Dia pe aturan-aturan sama deng orang yang iko lomba musti iko aturan-aturan lomba supaya dapa juara.

⁶Ambe conto laeng. Kalu petani, dia musti karja karas di dia pe kobong, jadi dia yang pertama dapa kobong itu pe hasil. Bagitu me deng torang, torang karja untuk Tuhan pasti torang dapa berkat.

⁷Perhatikan bae-bae conto-conto yang kita so bilang itu! Kalu ngana perhatikan bae-bae, Tuhan pasti mo kase mangarti samua itu pa ngana.

⁸Inga bae-bae, Yesus Kristus itu, raja Daud pe turunan, Dia mati tapi Tuhan Allah kase hidup ulang pa Dia lagi. Jadi, ini suda Kabar Bae yang kita salalu kase tau di mana-mana.

⁹Waktu kita kase tau Kabar Bae itu, orang-orang kase siksa pa kita. Dorang rante pa kita, turus dorang tahang pa kita di penjara sama deng kita ini orang jahat. Tapi biar dorang biking bagitu, Kabar Bae dari Tuhan Allah dorang tara bisa kase berenti.

¹⁰Karna itu, kita sabar tanggung siksa itu samua deng tetap kase tau Kabar Bae tentang Yesus Kristus, supaya orang yang Tuhan Allah so pili mo jadi Dia pe umat bole percaya pa Kristus Yesus. Deng bagitu, dong bole dapa slamat deng dapa puji deng hormat sama-sama deng Tuhan Allah slama-lamanya.

¹¹Memang butul kata-kata ini, “Kalu torang kase tinggal torang pe cara hidup lama yang malawang pa Tuhan Allah, itu sama deng torang so mati sama-sama deng Yesus. Deng bagitu, torang nanti akan hidup sama-sama deng Dia.

¹² Kalu torang menderita kong tetap percaya pa Tuhan Yesus, nanti torang akan berkuasa sama-sama deng Dia. Kalu torang manyangkal pa Dia, Dia me akan manyangkal pa torang.

¹³Tapi biar torang tara setia, Dia tetap setia, karna samua yang Dia so janji tara mungkin Dia tara biking.”

¹⁴Timotius, kase inga pa orang-orang percaya apa yang kita so bilang pa ngana. Bilang pa dorang sunggu-sunggu pa Tuhan Allah pe muka, dorang tara bole baku malawang tentang kata-kata pe arti, karna tarada guna, deng cuma mo biking kaco pa orang-orang yang dengar.

¹⁵Biking ngana pe tugas bae-bae supaya Tuhan Allah sanang pa ngana, deng ngana tara usa malu pa Tuhan Allah pe muka. Ngana ajar bae-bae Tuhan Allah pe ajaran pa orang-orang. Ajaran itu butul.

¹⁶Jang ngana badekat pa orang-orang yang bacarita yang tarada guna deng yang tara hormati pa Tuhan Allah. Karna orang-orang yang jaga bacarita bagitu, dong itu tara iko Tuhan Allah pe mau.

¹⁷Dorang pe carita yang tara butul itu tasiar deng bahaya skali sama deng panyake kangker yang biking rusak orang pe badan. Orang-orang yang bacarita itu termasuk Himeneus deng Filetus.

¹⁸Dorang dua itu so tara iko ajaran yang butul. Dorang ajar kata, Tuhan Allah so kase hidup lagi orang-orang yang so mati, jadi nanti so tarada lagi orang yang mati kong hidup ulang. Dorang ajar bagitu, jadi ada babarapa orang so tara percaya lagi yang butul pa Yesus.

¹⁹Biar bagitu me, Tuhan Allah pe ajaran tetap kuat sama deng ruma pe fandasi. Di Tuhan Allah pe ajaran itu so tatulis bagini, “Tuhan Allah kanal Dia pe umat” deng “Sapa saja yang bilang, dia itu Tuhan Allah pe umat, dia musti berenti biking yang jahat”.

²⁰Ada conto lagi. Di orang kaya pe ruma, ada barang yang dong biking dari macam-macam bahan. Ada yang dong biking dari mas, dari perak, dari kayu deng ada lagi yang dari tana liat. Barang yang dong biking dari mas deng perak itu, dong jaga pake di acara penting. Kalu barang yang dong biking dari kayu deng tana liat, itu dong jaga pake di acara yang biasa-biasa.

²¹Bagitu lagi deng anggota jemaat. Kalu ada yang berenti biking jahat, Tuhan mo pake orang itu untuk biking Dia pe tugas-tugas yang kusus. Tuhan biking orang itu jadi Dia pe umat sandiri, kong Tuhan sanang pake pa orang yang bagitu, karna orang itu so siap mo biking samua karja yang butul.

²²Orang muda banya yang dong pe keinginan tara bae, jadi jaga ngana pe diri bae-bae la jang iko sama deng dorang. Tapi ngana musti berusaha hidup butul pa Tuhan Allah pe muka, percaya pa Yesus, sayang pa orang laeng, deng hidup baku bawa bae-bae deng orang yang percaya pa Tuhan deng hati yang bersi.

²³Jang ngana taiko-iko baku malawang hal-hal yang tara butul deng tara dia pe guna, karna ngana tau, baku malawang bagitu cuma mo biking orang baku mara.

²⁴Torang yang karja untuk Tuhan tara pantas baku malawang. Mala torang musti bae-bae pa samua orang, ajar bae-bae pa orang-orang, deng sabar pa samua orang.

²⁵Kalu ada orang yang malawang torang pe ajaran itu, torang musti ajar pa dia bae-bae deng hati yang tara sombong. Torang biking bagitu karna sapa tau, Tuhan Allah kase kesempatan pa dorang untuk bertobat la Tuhan mo ruba dorang pe cara bapikir, sampe dorang bole tau ajaran yang butul.

²⁶Deng bagitu, dorang jadi sadar lagi kong talapas dari Iblis pe kuasa yang so kuasai pa dorang, sampe dorang tara iko dia pe mau lagi.