Read Malay, North Moluccan 2 Timotius 3 Bible Online

2 Timotius 3 - Malay, North Moluccan bible

2 Timotius 3

¹Timotius, ngana musti tau, kalu so dekat hari kiamat, akan ada banya sengsara.

²Hari-hari itu, orang-orang cuma sayang dorang pe diri sandiri, deng dong pe doi. Dorang suka bicara tinggi deng sombong. Dorang suka kase tara bae orang pe nama, malawang pa dong pe orang tua, deng tara tau batarimakasi. Dorang sama skali tara mau iko Tuhan pe mau.

³Dorang tara sayang pa orang laeng, tara mau baku bawa bae deng orang, suka kase tara bae orang pe nama, deng tara mampo tahang diri. Dorang pe pikiran jahat skali, deng binci hal-hal yang butul.

⁴Dorang suka bahianat, tara bapikir panjang, biking diri tau, deng lebe suka basanang-sanang iko dong pe mau sandiri daripada iko Tuhan Allah pe mau.

⁵Kalu mo lia, dorang itu hidup iko Tuhan Allah pe mau, padahal sebenarnya dorang tara mau Tuhan Allah pe kuasa tinggal di dong pe hati. Jadi dorang itu tara iko Tuhan Allah pe mau. Orang yang bagitu, jang badekat pa dorang!

⁶Babarapa orang dari dorang bawa ajaran yang tara butul di orang-orang pe ruma, kong tipu pa parampuang-parampuang yang dong pe dosa banya skali deng gampang tagoda. Parampuang-parampuang itu gampang dapa tipu deng macam-macam keinginan yang kuasai pa dorang.

⁷Parampuang-parampuang itu salalu suka orang kase ajar hal-hal yang baru pa dorang. Tapi dorang tara perna tau ajaran mana yang butul.

⁸ Ngana masi inga carita Yanes deng Yambres, to? Dulu, dorang dua malawang pa nabi Musa. Itu sama deng orang-orang yang suka tipu parampuang-parampuang itu, dong malawang ajaran yang butul tentang Yesus. Orang-orang itu pe pikiran so rusak deng dong pe percaya pa Yesus so tara butul.

⁹Tapi biar dorang coba tipu orang, dorang tara berhasil turus. Lama-lama dorang itu kantara skali tara tau apa-apa, sama deng dulu Yanes deng Yambres, kantara skali tara tau apa-apa.

¹⁰Tapi ngana Timotius, ngana so iko samua yang kita ajar pa orang, kita pe cara hidup deng kita pe tujuan hidup. Ngana so lia sandiri kita pe percaya pa Yesus deng kita pe sayang pa orang. Ngana me tau, kita pe sabar deng kita pe setia biking kita pe tugas.

¹¹ Ngana tau bagimana orang-orang siksa pa kita di kota Antiokhia, kota Ikonium deng kota Listra sampe kita menderita skali. Tapi Tuhan kase lapas pa kita dari siksa itu samua.

¹²Memang samua orang yang percaya pa Kristus Yesus deng berusaha hidup iko Dia pe mau akan dapa siksa.

¹³Tapi orang yang jahat deng yang tukang tipu, dorang itu lebe hari lebe tamba jahat. Dorang tipu pa orang-orang kong orang laeng me tipu pa dorang.

¹⁴Tapi Timotius, ngana musti pegang turus ajaran yang butul yang ngana so tarima deng percaya butul, karna ngana kanal orang-orang yang kase ajar pa ngana, deng ngana percaya pa dorang.

¹⁵Waktu ngana masi kacil, ngana so tau Kitab Suci. Kitab Suci itu yang biking ngana jadi tau Tuhan pe jalang yang butul sampe ngana bole percaya pa Kristus Yesus kong Dia bole kase slamat pa ngana.

¹⁶Samua yang tatulis di Kitab Suci, itu dari Tuhan Allah sandiri. Samua itu dia pe guna: untuk kase ajar pa orang apa yang butul, untuk togor orang yang ajar ajaran yang sala, untuk ruba orang pe cara hidup la dorang iko jalang yang butul, deng untuk lati orang pe diri iko Tuhan pe mau.

¹⁷Deng bagitu, Kitab Suci biking torang yang jadi Tuhan Allah pe umat, mampo biking samua yang bae.