Read Malay, North Moluccan 2 Timotius 4 Bible Online

2 Timotius 4 - Malay, North Moluccan bible

2 Timotius 4

¹Yesus Kristus nanti mo datang ulang di dunia ini jadi Raja kong berkuasa. Dia yang mo adili orang-orang yang masi hidup deng yang so mati. Jadi skarang kita bilang deng butul-butul di Tuhan Allah deng Kristus Yesus pe muka, supaya ngana Timotius

²kase tau Tuhan Allah pe firman pa orang-orang. Ngana musti salalu siap kase tau firman itu di tiap waktu, biar orang mau dengar atau tarada. Kalu dorang biking sala, ngana togor pa dorang la dorang berenti. Turus ngana kase kuat dong pe hati la dong iko ajaran yang butul. Deng sementara ngana biking samua itu, ngana musti kase ajar bae-bae pa dorang deng sabar.

³Ngana musti rajin biking itu karna akan ada dia pe waktu, orang-orang tara mau dengar lagi ajaran yang butul. Mala dorang cuma mo pangge guru-guru agama yang dorang suka. Guru-guru itu mo bilang pa dorang hal-hal yang dorang suka dengar saja supaya cuma iko dorang pe mau.

⁴Dorang tara mau dengar ajaran yang butul. Dorang lebe suka dengar carita-carita dulu-dulu yang tara guna.

⁵Tapi biar bagitu me, Timotius, ngana musti tetap tenang dalam samua hal. Kalu ngana biking ngana pe tugas kong dapa siksa, ngana musti sabar. Ngana kase tau pa orang-orang Kabar Bae itu supaya dorang jadi percaya pa Yesus. Deng samua tugas yang Tuhan so kase pa ngana, biking bae-bae sampe selesai.

⁶Tapi tentang kita, kita rasa kita pe waktu di dunia so tara lama lagi. Tara lama lagi kita akan mati kong kita pe hidup akan sama deng anggur yang ada kase cura untuk jadi persembahan pa Tuhan Allah.

⁷Kita so karja karas biking kita pe tugas itu deng bae sampe selesai, sama deng orang yang iko lomba lari sampe di finis. Deng kita tetap percaya pa Yesus Kristus.

⁸Satu conto lagi, kalu orang iko lomba kong juara, dia dapa hadia. Bagitu lagi deng kita, Tuhan so kase sadia kita pe hadia karna Dia lia kita hidup butul pa Dia pe muka. Hadia itu Dia simpang kong nanti Dia mo kase pa kita di hari yang Dia mo adili pa samua orang deng adil. Hadia itu bukang cuma kita yang mo dapa, tapi samua orang yang percaya yang tunggu-tunggu Dia datang lagi, dorang me mo dapa.

⁹Timotius! Ngana berusaha capat-capat datang pa kita.

¹⁰ Karna Kreskes so pigi di Galatia, deng Titus so pigi di Dalmatia. Kong Demas so kase tinggal pa kita karna dia lebe suka iko hal-hal di dunia ini. Jadi dia so barangkat di Tesalonika.

¹¹ Yang tinggal sama-sama deng kita di sini cuma Lukas. Jadi ngana pigi cari pa Markus la ngoni dua datang kamari, karna Markus bole bantu pa kita biking kita pe tugas di sini.

¹² Kita so suru pa Tikhikus pigi ka sana pa ngana di kota Efesus.

¹³ Kalu ngana datang kamari, jang lupa e bawa kita pe juba yang kita kase tinggal pa Karpus pe ruma di kota Troas. Bawa lagi kita pe kitab-kitab. Yang paling penting, jang lupa kita pe kitab-kitab yang biking dari binatang pe kuli itu.

¹⁴ Aleksander tukang besi itu, so banya biking hal yang jahat pa kita. Tapi biar bagitu me, kita tara mara pa dia, nanti Tuhan Allah mo balas pa dia iko deng apa yang dia so biking.

¹⁵Dia tukang malawang ajaran yang torang ajar. Jadi ngana musti ati-ati deng dia.

¹⁶Waktu pertama kali kita bela kita pe diri di pengadilan,[2] tarada orang yang batamang pa kita. Samua kita pe tamang kase tinggal pa kita. Tapi kita minta pa Tuhan Allah supaya jang hukum pa dorang.

¹⁷Biar dorang kase tinggal pa kita, Tuhan Allah tetap sama-sama deng kita. Dia kase kuat pa kita supaya kita bole kase tau samua Kabar Bae tentang Yesus Kristus, deng supaya samua orang yang bukang Yahudi dengar. Dia kase slamat pa kita dari bahaya kematian, sama deng kita bebas dari singa pe mulu.

¹⁸Tuhan Allah kase lapas pa kita dari samua orang pe rencana yang jahat, yang mo biking kita cilaka. Dia mo bawa pa kita di sorga, di situ Dia Berkuasa sebagai Raja. Dia itu suda yang torang puji deng hormat sampe slama-lamanya! Amin.

¹⁹ Timotius, kase tau kita pe salam pa Onesiforus pe keluarga, deng kase tau lagi kita pe salam pa Priskila deng Akwila.

²⁰ Erastus masi tinggal di kota Korintus. Trofimus terpaksa kita kase tinggal pa dia di kota Miletus karna dia saki.

²¹Ngana berusaha datang kamari sebelum musim dingin. Ebulus, Pudes, Linus, Klaudia, deng samua orang percaya laeng di sini, kirim salam pa ngana.

²²Kita minta supaya Tuhan sama-sama deng ngana. Kita minta lagi supaya Tuhan kase Dia pe bae pa ngoni samua.