Read Malay, North Moluccan Ibrani 2 Bible Online

Ibrani 2 - Malay, North Moluccan bible

Ibrani 2

¹Jadi, karna Yesus itu yang paling hebat, torang musti lebe pegang kuat ajaran yang torang so dengar tentang Dia, supaya jang ada orang yang pengaru pa torang sampe torang mulai kase tinggal torang pe percaya.

²Barang, ajaran yang ada di lima kitab Musa, malaekat-malaekat kase tau pa torang orang Israel pe orang tua dulu-dulu, kong ajaran itu memang butul. Turus, tiap orang yang tara iko atau tara biking ajaran itu, orang itu mo dapa hukuman iko apa yang dia langgar.

³Ajaran itu memang penting skali torang iko, tapi lebe penting lagi ajaran dari Tuhan Yesus yang Dia bilang langsung pa torang manusia! Ajaran itu tentang Dia yang kase slamat pa torang, kong ajaran itu bagus skali! Jadi kalu torang tara peduli, jang kira torang mo lolos dari hukuman! Yesus sandiri yang pertama kase tau ajaran itu, kong dorang yang dengar itu kase tau pa torang. Jadi, deng dorang pe kesaksian itu, torang bisa tau, ajaran itu memang butul.

⁴Deng supaya orang bole yakin ajaran yang dorang kase tau itu butul, Tuhan Allah kase Dia pe kuasa pa dorang untuk biking mujizat-mujizat, deng tanda-tanda yang kase tunju Tuhan Allah pe kuasa sampe orang jadi herang. Deng Dia kase barbage Dia pe Roh Kudus pe kuasa pa dorang iko Dia pe mau la dorang ada karunia-karunia untuk pake layani pa orang-orang.

⁵Tuhan Allah tara kase kuasa pa malaekat-malaekat la mo berkuasa di dunia yang baru nanti, dunia yang sementara torang bicara ini.

⁶ Tapi yang Tuhan Allah pili la mo berkuasa di dunia yang baru itu, manusia. Di Kitab Suci ada tulis bagini, “Ya Tuhan Allah, manusia itu apa kong sampe Tuhan Allah inga pa dia? Manusia pe ana-ana itu apa kong sampe Tuhan Allah perhatikan pa dia?

⁷Tapi Tuhan Allah so biking dia pe posisi cuma sadiki lebe randa dari malaekat-malaekat. Tapi itu cuma sementara saja. Tuhan Allah biking dia jadi hebat, kong dia dapa hormati sama deng raja.

⁸Tuhan Allah biking dia berkuasa pa samua-samua yang ada.” Jadi dari yang so tatulis itu, so jelas pa torang, Tuhan Allah biking manusia berkuasa pa samua-samua yang ada. Tara ada yang dia tara kuasai. Cuma skarang ini, torang bolong lia dia berkuasa pa samua-samua yang ada.

⁹Tapi yang so jelas itu, Yesus Kristus yang berkuasa pa samua-samua yang ada. Dia suda yang Tuhan Allah biking Dia pe posisi sadiki lebe randa dari malaekat-malaekat. Tapi itu cuma sementara saja, cuma waktu Dia ada di dunia ini. Skarang ini, Tuhan Allah so biking Dia jadi hebat deng dapa hormati sama deng Raja karna Dia so menderita sampe mati di kayu salib. Dia rasa samua itu karna Tuhan Allah kase Dia pe bae yang cuma-cuma pa torang samua, supaya torang samua dapa slamat dari dosa-dosa.

¹⁰Tuhan Allah yang biking samua-samua yang ada, supaya Dia dapa puji deng hormat. Jadi pantas skali Tuhan Allah biking Dia pe rencana yang biking orang banya jadi Dia pe ana-ana untuk hidup sama-sama deng Dia di sorga. Kong supaya dorang jadi Tuhan Allah pe ana-ana, Dia biking Dia pe Anak Yesus menderita la Dia bisa jadi dorang pe pemimpin yang sempurna[2] untuk buka jalang, supaya orang yang percaya pa Dia bole dapa slamat.

¹¹Yesus yang tebus torang manusia pe dosa supaya torang jadi bersi pa Tuhan Allah pe muka. Dia deng torang pe Bapa cuma satu. Karna itu, Dia tara malu bilang, torang ini Dia pe sudara-sudara.

¹² Itu sama deng yang tatulis dulu di Kitab Suci waktu Yesus bilang pa Tuhan Allah bagini, “Bapa, Kita mo kase tau tentang Bapa pa Kita pe sudara-sudara yang percaya. Kong waktu Kita bakumpul sama-sama deng dorang, Kita manyanyi puji pa Bapa.”

¹³ Yesus bilang lagi pa Tuhan Allah, “Kita percaya pa Bapa saja.” Deng Yesus bilang lagi bagini, “Bapa, ini Kita, sama-sama deng Bapa pe ana-ana[3] yang Bapa so kase pa Kita.”

¹⁴Ana-ana yang Yesus bilang itu, dorang itu cuma manusia biasa saja. Yesus datang di dunia jadi manusia supaya jadi sama deng dorang. Kong karna Dia jadi manusia, Dia bisa mati. Deng karna Dia mati itu, Dia kase kala pa Iblis, setang-setang pe raja yang ada kuasa biking orang mati.

¹⁵Deng karna Yesus kase kala Iblis pe kuasa yang biking orang mati slama-lamanya itu, Dia kase ilang torang manusia pe rasa tako mati yang kuasai torang pe hidup ini. Barang, selama manusia hidup, manusia rasa tako mati, macam deng orang karja yang tako pa dia pe tuang.

¹⁶Jadi so jelas skali, Yesus datang di dunia bukang untuk tolong pa malaekat-malaekat, tapi Dia datang untuk tolong pa torang, bapa Abraham pe turunan.

¹⁷Kong karna Dia mo tolong pa torang yang jadi Dia pe sudara, Tuhan Allah musti biking Yesus jadi sama persis deng torang manusia. Deng karna Yesus so rasa samua yang torang so rasa, Dia bole kase tunju Dia pe rasa kasiang pa torang manusia, sampe bole kase Dia pe diri mati untuk tebus torang pe dosa-dosa. Deng Dia mati itu, Yesus jadi Imam Basar yang setia pa Tuhan Allah supaya torang deng Tuhan Allah pe hubungan jadi bae ulang.

¹⁸Jadi, karna Dia sandiri so perna menderita waktu dapa goda, Dia me mampo tolong pa torang waktu torang dapa goda.