Read Malay, North Moluccan Yakobus 2 Bible Online

Yakobus 2 - Malay, North Moluccan bible

Yakobus 2

¹Sudara-sudara, torang ini so percaya pa Yesus Kristus, torang pe Tuhan yang hebat. Jadi, jang pili-pili orang.

²Ambe conto, ada orang kaya maso pa ngoni pe tampa ibada. Dia pake cincin mas deng baju bagus yang mahal. Di situ me ada orang miskin maso. Orang miskin itu pake baju tara bae.

³Pa orang yang pake baju bagus itu ngoni sambut deng hormati pa dia, turus bilang pa dia bagini, “Mari bapa, dudu di tampa yang bagus ini.” Tapi pa orang miskin itu ngoni bilang bagini, “Badiri di situ suda!” atau “Dudu di lante suda, dekat kita pe kaki!”

⁴Deng ngoni biking bagitu, itu ngoni so pili-pili orang, kong ngoni so jadi hakim deng maksut yang tara bae.

⁵Sudara-sudara yang kita sayang, dengar yang kita mo bilang ini: orang miskin yang ada di dunia ini, Tuhan Allah so pili pa dorang la butul-butul percaya pa Dia. Dorang itu yang mo jadi Tuhan Allah pe umat yang Dia Berkuasa sebagai Raja pa dorang pe hidup, sama deng yang Dia so janji pa samua orang yang sayang pa Dia.

⁶Tapi deng ngoni pili-pili orang bagitu, ngoni itu so hina pa orang-orang miskin. Padahal orang-orang kaya itu suda yang biking sengsara pa ngoni kong bawa di pengadilan untuk kase sala pa ngoni.

⁷Orang kaya itu yang jaga kase tara bae Yesus Kristus pe nama. Yesus Kristus itu yang torang puji, kong yang biking torang jadi Tuhan Allah punya.

⁸ Kalu ngoni iko aturan yang paling penting yang tatulis di Kitab Suci, itu dia pe arti, ngoni so biking yang bae. Aturan itu pe babunyi bagini, ‘Ngoni musti sayang pa orang laeng, sama deng ngoni sayang pa ngoni pe diri sandiri.’

⁹Tapi kalu ngoni pili-pili orang ngoni so biking dosa, deng kalu ngoni biking bagitu, itu so jelas ngoni so langgar aturan di Kitab Suci.

¹⁰Karna sapa yang iko Tuhan Allah pe aturan-aturan, dia musti iko samua. Tapi kalu dia langgar Tuhan Allah pe aturan-aturan, biar cuma satu saja, itu sama deng dia so langgar aturan samua.

¹¹ Tuhan Allah perna bilang, “Jang baku suka deng orang pe laki atau orang pe bini,” deng Dia me bilang, “Jang bunu orang.” Jadi, biar ngoni tara baku suka deng orang pe laki atau orang pe bini, tapi kalu ngoni bunu orang, ngoni tetap saja so langgar Tuhan Allah pe aturan.

¹²Jadi kalu torang bicara atau biking satu barang, torang musti ati-ati, karna torang tau nanti Tuhan Allah mo adili pa orang-orang pake aturan yang kase lapas pa manusia dari dosa-dosa.

¹³Barang, waktu Tuhan Allah mo adili pa manusia nanti, Dia tara rasa kasiang pa orang-orang yang tara ada rasa kasiang pa orang laeng. Tapi orang-orang yang pe hidup ada rasa kasiang pa orang laeng, Tuhan Allah tara hukum pa dorang.

¹⁴Sudara-sudara, kalu satu orang bilang dia percaya pa Tuhan, tapi dia tara biking apa yang Tuhan mau dalam dia pe hidup, dia pe percaya itu tarada guna. Jadi, Tuhan tara kase slamat pa orang-orang yang percaya macam bagitu.

¹⁵Dia pe conto bagini: ada ngoni pe sudara laki-laki atau parampuang yang susa karna dia pe baju tarada, deng dia pe makanang hari-hari me tara baku cukup.

¹⁶Kong ada dari ngoni yang cuma bilang pa dia, “Bae-bae di jalang, e! Tuhan berkati pa ngana la jang ngana dingin deng jang ngana lapar.” Yang ngoni bilang itu tarada dia pe guna, karna ngoni tara bantu apa yang dia perlu.

¹⁷Bagitu lagi deng torang pe percaya pa Tuhan. Kalu torang percaya pa Tuhan tapi tara biking apa yang Tuhan mau, torang pe percaya itu tarada dia pe guna.

¹⁸Mangkali ada yang tara setuju kong mo bilang bagini, “Ada orang yang cuma percaya saja pa Tuhan, deng ada orang yang cuma biking saja barang yang bae.” Kita mo bilang pa orang yang bilang bagitu, “Ngana tara bisa kase bukti ngana percaya pa Tuhan, karna ngana cuma biking hal yang bae. Tapi kita, kita mo kase tunju kita pe percaya pa Tuhan deng cara biking hal yang bae.”

¹⁹Ngoni percaya cuma ada satu Tuhan saja, Tuhan Allah. Itu bagus, tapi tara cukup. Setang-setang me percaya itu kong dorang tako sampe totofore.

²⁰Ee ngoni orang-orang yang tara tau apa-apa! Kalu orang percaya pa Tuhan tapi tara biking apa yang Tuhan mau dalam dia pe hidup, dia pe percaya itu tarada guna.

²¹ Conto torang pe orang tua dulu-dulu Abraham. Dulu Tuhan Allah suru pa Abraham kase dia pe ana Ishak jadi persembahan di tampa bakar binatang korban persembahan. Abraham biking Tuhan Allah pe parenta itu, jadi Tuhan Allah tarima pa dia jadi orang yang tara sala.

²²Abraham biking dua hal ini: dia percaya pa Tuhan Allah, deng dia lagi biking Tuhan Allah pe mau. Deng bagitu, Abraham pe percaya pa Tuhan Allah jadi sempurna.

²³ Jadi deng Abraham biking bagitu, apa yang tatulis di Kitab Suci so jadi. Dia pe babunyi bagini, “Abraham percaya pa Tuhan Allah, kong karna dia pe percaya itu, Tuhan Allah tarima pa dia jadi orang yang tara sala.” Karna itu, Abraham dapa sebut, “Tuhan Allah pe tamang.”

²⁴Jadi skarang ngoni so tau to? Tuhan Allah biking torang jadi orang yang tara sala pa Dia pe muka, bukang karna torang percaya saja, tapi karna apa yang torang biking.

²⁵ Ada lagi conto laeng bagini: dulu ada parampuang satu dia pe nama Rahab. Dia itu parampuang tara bae. Waktu itu, orang Yerikho ada cari orang Israel pe mata-mata yang datang di Yerikho la dorang mo bunu. Kong Rahab sambunyi mata-mata itu di dia pe ruma. Dia tolong pa dorang kong kase kaluar dari Yerikho iko jalang laeng supaya slamat. Deng Rahab biking bagitu, Tuhan Allah biking dia jadi orang yang tara sala pa Tuhan Allah pe muka.

²⁶Jadi orang yang bilang dia percaya pa Tuhan Allah, tapi dia tara biking apa yang Tuhan Allah mau dalam dia pe hidup, dia pe percaya itu tarada guna. Dia itu sama deng orang yang so mati, ada badan tapi tarada nyawa.