Read Malay, North Moluccan Yakobus 3 Bible Online

Yakobus 3 - Malay, North Moluccan bible

Yakobus 3

¹Sudara-sudara, jang sampe banya dari ngoni mau jadi guru untuk ajar Tuhan pe firman. Barang torang tau, kalu torang ajar hal yang sala kong orang iko, berarti Tuhan Allah akan hukum pa torang lebe barát dari orang yang bukang guru.

²Torang samua jaga biking sala di banya hal. Orang yang mampo jaga dia pe mulu sampe tara sala bicara, dia itu orang yang sempurna, yang bole kuasai dia pe diri sandiri.

³Ambe conto, kalu torang ika kuda pe mulu deng tali[2] kong torang hela pa dia, pasti dia iko torang pe mau. Deng bagitu, torang bole kontrol kuda itu.

⁴Conto laeng lagi, kapal. Biar kapal itu basar skali kong angin kuat tiop sampe kapal tagoyang, tapi kamudi yang kacil itu bisa ator kapal itu pe bajalang iko kep pe mau.

⁵Bagitu lagi deng torang pe mulu, itu bagian yang kacil di torang pe badan, tapi mulu bole bicara sombong tentang hal-hal yang basar. Bagitu lagi deng api. Biar dia kacil me, api bole bakar utang yang basar sampe abis.

⁶Mulu me sama deng api. Dia itu satu bagian dari torang pe badan yang bole biking torang pe badan jadi jahat. Mulu itu bisa biking torang pe hidup jadi rusak samua. Mulu jadi jahat bagitu, karna sama deng Iblis so taru api neraka di dalam mulu.

⁷Manusia bisa kase jinak samua macam binatang, deng ada yang so dapa kase jinak: binatang-binatang yang liar, burung-burung, binatang-binatang yang maraya deng binatang-binatang yang hidup di laut.

⁸Tapi tarada satu orang yang mampo jaga dia pe mulu. Mulu itu jahat deng tara bisa mo jaga, kong ponong deng racong yang bisa kase mati orang.

⁹ Deng torang pe mulu, torang puji pa Tuhan, torang pe Bapa. Kong deng torang pe mulu lagi, torang kutuk pa manusia, padahal manusia itu Tuhan Allah cipta iko Dia pe rupa.

¹⁰Torang pe mulu cuma satu saja, tapi kata-kata yang kaluar, ada yang puji pa Tuhan, deng ada lagi yang kutuk pa manusia. Sudara-sudara, sebenarnya torang tara bole bagitu!

¹¹Coba ngoni pikir bae-bae, apa ada satu mata aer kong dari situ kaluar aer tawar deng aer pait?

¹²Sudara-sudara, bagitu lagi deng pohong ara, tara mungkin mo babua zaitun. Deng pohong anggur me tara mungkin mo babua ara. Bagitu lagi deng mata aer yang dia pe aer bagaram, tara mungkin mo kase kaluar aer tawar.

¹³Kalu dari ngoni ada yang pande deng tau ator samua, dia musti kase tunju itu deng dia pe cara hidup yang bae. Dia musti pake dia pe pande itu untuk biking hal-hal bae deng hati yang tara sombong.

¹⁴Tapi kalu ngoni masi suka mangiri deng cuma pikir diri sandiri, jang ngoni basombong bilang ngoni itu pande skali. Kalu ngoni bagitu, ngoni so kase putar bale ajaran yang butul.

¹⁵Kalu ngoni pe pande cuma itu, itu bukang pande yang dari Tuhan, tapi dari dunia ini, dari manusia pe keinginan yang tara bae deng dari setang-setang pe mau.

¹⁶Karna kalu orang pangmangiri deng cuma pikir diri sandiri, dia pasti biking kaco deng biking samua hal yang jahat.

¹⁷Tapi orang yang dapa pande dari Tuhan, torang tau persis bagini: pertama, dia pe hati bersi, turus dia suka dame, suka baku bawa bae deng orang, dengar-dengaran, ada rasa kasiang, deng jaga biking hal-hal bae. Dia me tara barát sabla deng tara munafik.

¹⁸Orang yang suka dame kong kase dame orang laeng, dia so biking yang butul pa Tuhan Allah pe muka, sama deng orang ada tanam bibit yang bagus kong dapa hasil yang banya.