Read Malay, North Moluccan 1 Petrus 5 Bible Online

1 Petrus 5 - Malay, North Moluccan bible

1 Petrus 5

¹Skarang kita mo kase nasehat pa ngoni yang jadi penatua di jemaat-jemaat karna kita me penatua. Kita ini perna lia deng mata kapala sandiri waktu Yesus Kristus dapa siksa. Kong nanti waktu Yesus Kristus datang ulang yang kedua kali kase tunju Dia pe kuasa yang luar biasa pa samua orang, kita me akan tarima bagian itu. Jadi ini kita pe nasehat:

² jaga bae-bae pa orang-orang percaya yang Tuhan Allah so kase untuk ngoni jaga, sama deng gembala jaga dia pe domba. Jaga pa dorang deng hati sanang iko Tuhan Allah pe mau. Jang jaga pa dorang cuma karna terpaksa atau karna mau dapa gaji saja. Tapi ngoni jaga pa dorang karna butul-butul ngoni mo tolong pa dorang.

³Kong jang maeng parenta sabarang pa dorang yang Tuhan Allah so kase ngoni jaga, tapi lebe bae ngoni pe kalakuang musti bagus la jadi conto pa orang laeng.

⁴Nanti waktu Yesus Kristus yang jadi Gembala di atas samua gembala itu datang ulang, ngoni akan tarima hadia yang luar biasa yang tara akan ilang sampe slama-lamanya.

⁵ Bagitu lagi deng ngoni yang masi muda, ngoni musti dengar-dengaran pa orang-orang yang lebe tua.[4] Ngoni samua musti baku bantu deng jang basombong satu deng yang laeng, karna ada tatulis di Kitab Suci bagini, “Tuhan Allah tara suka deng orang yang sombong, tapi Dia kase Dia pe bae pa orang yang tara sombong.”

⁶ Karna itu, ngoni musti hidup sama deng orang yang tara arti apa-apa pa Tuhan Allah pe muka. Kalu ngoni biking bagitu, nanti pas di waktu yang Dia so tentukan, Dia yang pe kuasa basar itu mo angka pa ngoni samua la dapa hormat.

⁷Serakan suda samua ngoni pe rasa hawater pa Dia, karna Dia yang jaga deng sayang pa ngoni.

⁸Ngoni musti kuasai ngoni pe diri deng bajaga-jaga! Barang Iblis, yang jadi ngoni pe musu itu, dia sama deng singa yang bajalang kasana-kamari bacari makanang la mo talang manta-manta.

⁹Kase kuat ngoni pe percaya pa Tuhan deng lawan pa Iblis, barang ngoni tau, bukang cuma ngoni yang dapa siksa karna percaya, tapi ngoni pe sudara-sudara yang percaya di seluru dunia ini me, dapa siksa sama deng yang ngoni rasa.

¹⁰Tapi siksa yang ngoni rasa itu cuma sementara saja. Nanti Tuhan Allah sandiri yang mo kase bae-bae ngoni pe keadaan, kase kuat ngoni pe hati, kase kuat ngoni pe percaya, deng biking ngoni tetap percaya pa Dia. Dia itu suda Tuhan Allah yang kase Dia pe bae pa manusia, yang so pangge pa ngoni untuk percaya pa Yesus Kristus, kong ngoni mo rasa Dia pe kuasa yang luar biasa untuk slama-lamanya.

¹¹Dia itu suda yang berkuasa sampe slama-lamanya! Amin.

¹² Silwanus[5] yang bantu pa kita tulis surat yang pende ini pa ngoni. Silwanus ini kita pe sudara yang percaya yang bisa kita percaya. Surat ini kita tulis untuk kase smangat pa ngoni supaya ngoni tetap percaya, deng untuk kase yakin pa ngoni tentang Tuhan Allah pe bae yang Dia salalu kase pa ngoni biar ngoni sementara dapa siksa. Ngoni musti tetap yakin Tuhan Allah pe bae itu, karna itu butul.

¹³ Jemaat yang ada di kota Babel di sini, dorang kirim salam pa ngoni. Dorang me Tuhan Allah pili sama deng Dia so pili pa ngoni jadi Dia pe umat. Kong Markus yang kita so anggap kita pe ana sandiri, dia me kirim salam pa ngoni.

¹⁴Kalu ngoni baku dapa, ngoni baku kase salam[6] suda satu deng yang laeng untuk kase tunju ngoni baku sayang. Kita minta pa Tuhan Allah supaya Dia kase Dia pe bae pa ngoni samua yang percaya pa Yesus Kristus, deng biking ngoni pe hati tetap tenang.