Read Malay, North Moluccan 1 Yohanes 1 Bible Online

1 Yohanes 1 - Malay, North Moluccan bible

1 Yohanes 1

¹ Surat ini torang tulis tentang Yesus Kristus. Dia itu Firman yang biking orang bole dapa hidup deng Tuhan Allah slama-lamanya. Firman itu memang so ada dari pertama dunia bolong jadi. Torang so dengar deng so lia pa Dia deng torang pe mata kapala sandiri. Torang me so pegang pa Dia deng tong pe tangan sandiri.

² Dia itu yang kase hidup pa manusia. Dari pertama Dia ada sama-sama deng Bapa di sorga. Dia so datang di dunia kong torang lia pa Dia. Jadi torang mo jadi Dia pe saksi la kase tau pa ngoni bagimana ngoni bole mo dapa hidup deng Tuhan Allah slama-lamanya.

³Skarang torang kase tau pa ngoni apa yang torang so lia deng so dengar dari Dia, supaya ngoni deng torang bole hidup satu hati, deng bagitu torang samua bole hidup satu hati deng torang pe Bapa, Tuhan Allah deng Dia pe Anak Yesus Kristus.

⁴Samua ini torang tulis untuk ngoni supaya torang samua pe hati tatamba sanang.

⁵Ini berita yang torang so dengar dari Yesus, kong torang kase tau pa ngoni bagini: Tuhan Allah itu tarang, jadi pa Dia sama skali tarada galap.

⁶Kalu torang bilang torang so hidup satu hati deng Dia tapi torang pe hidup masi di galap, torang so bafoya kong yang torang biking itu tara butul.

⁷Tapi kalu torang hidup di tarang, sama deng Tuhan Allah ada di tarang, pasti torang so hidup satu hati satu deng yang laeng. Dia kase bersi pa torang dari torang pe dosa samua, karna Yesus, Dia pe Anak so mati di kayu salib.

⁸Kalu torang bilang torang tarada dosa, torang so tipu torang pe diri sandiri, kong yang butul pa torang so tara ada.

⁹Kalu torang mangaku torang pe dosa pa Tuhan Allah, Dia mo kase ampun pa torang deng Dia mo kase bersi pa torang dari samua yang jahat yang torang so biking. Dia kase ampun torang pe dosa, itu karna Dia adil deng Dia pasti mo biking samua yang Dia so janji.

¹⁰Kalu torang bilang torang tara perna biking dosa, itu sama saja deng torang so bilang Tuhan Allah pangbafoya kong Dia pe firman tarada di torang pe hati.