Read Malay, North Moluccan 1 Yohanes 3 Bible Online

1 Yohanes 3 - Malay, North Moluccan bible

1 Yohanes 3

¹ Coba ngoni pikir, pe basar skali Tuhan Allah torang pe Bapa pe sayang pa torang, sampe Dia bilang torang ini Dia pe ana-ana! Deng memang torang ini Dia pe ana-ana! Karna itu, orang-orang yang jaga iko dunia pe mau, dorang tara tau torang ini Dia pe ana-ana, barang dorang me tara kanal pa Tuhan Allah.

²Sudara-sudara yang kita sayang, skarang torang ini Tuhan Allah pe ana-ana. Jadi torang tau, nanti waktu Yesus Kristus, Raja yang Tuhan Allah pili itu so datang ulang, torang mo jadi sama deng Dia, barang torang mo lia pa Dia yang sebenarnya. Tapi tentang torang pe hidup nanti bagimana, Dia bolong kase tau samua pa torang.

³Samua orang yang baharap pa Tuhan sama deng itu, orang itu musti salalu hidup deng hati bersi sama deng Yesus Kristus yang suci itu.

⁴Tiap orang yang biking dosa, orang itu tara iko Tuhan pe parenta. Jadi kalu tara iko Tuhan pe parenta, itu dosa.

⁵ Ngoni tau, Yesus datang di dunia ini untuk hapus torang pe dosa-dosa. Deng ngoni me tau, Dia itu tarada dosa.

⁶Jadi tiap orang yang tetap hidup satu hati deng Tuhan Yesus, dia tara biking dosa lagi. Barang, kalu orang itu masi biking dosa, dia tara perna mangarti[3] sapa Yesus Kristus deng tara perna kanal pa Dia.

⁷Jadi, ngoni yang kita sayang sama deng kita pa ana-ana, ngoni jaga diri bae-bae, jang sampe orang tipu pa ngoni kong ngoni iko ajaran yang tara butul. Sapa yang biking barang yang butul, dia itu orang yang hidup butul sama deng Yesus Kristus itu butul.

⁸Tapi sapa yang biking dosa turus, dia itu Iblis pe ana, karna Iblis itu jaga biking dosa dari dulu. Jadi Yesus Anak Allah itu datang untuk kase ancor samua yang Iblis biking.

⁹Tiap orang yang Tuhan Allah so biking jadi Tuhan Allah pe ana, dia itu pe hidup so beruba jadi baru, deng dia me so tara biking dosa lagi, barang Tuhan Allah hidup pa orang itu pe diri, sama deng Tuhan Allah ada tanam bibit pa orang itu pe hati kong batumbu. Tuhan Allah so biking dia jadi Dia pe ana, jadi dia so tara biking dosa lagi.

¹⁰Torang bisa tau sapa yang jadi Tuhan Allah pe ana-ana deng sapa yang jadi Iblis pe ana-ana. Orang yang tara biking Tuhan Allah pe mau deng tara sayang pa dia pe sudara yang percaya pa Tuhan, dia itu bukang Tuhan Allah pe ana.

¹¹ Dari dulu ngoni so dengar berita ini: torang samua musti baku sayang.

¹² Jang ngoni sama deng Kain. Iblis so kuasai pa dia jadi dia bunu dia pe ade sandiri. Kain bunu pa dia pe ade karna Kain itu jahat, deng karna samua yang dia pe ade biking, Tuhan Allah lia itu butul.

¹³Sudara-sudara, jang ngoni herang kalu orang-orang yang tara percaya binci pa ngoni.

¹⁴ Kalu torang sayang torang pe sudara yang percaya, torang tau torang so tara hidup tapisa dari Tuhan Allah lagi, torang so hidup deng Tuhan Allah slama-lamanya. Tapi sapa yang tara sayang dia pe sudara yang percaya, dia pe hidup tetap tapisa deng Tuhan Allah slama-lamanya, macam deng orang yang so mati.

¹⁵Sapa yang binci dia pe sudara yang percaya, dia itu sama deng pangbunu. Kong ngoni tau to, tarada pangbunu yang mo dapa hidup deng Tuhan Allah slama-lamanya.

¹⁶Torang tau sayang yang butul-butul itu sama deng Yesus Kristus pe sayang. Dia so kase Dia pe diri sampe mati untuk torang supaya torang dapa slamat. Jadi torang me musti siap kase tong pe diri sampe mati untuk torang pe sudara-sudara yang percaya.

¹⁷Kalu ada orang yang dia pe hidup talebe sadiki, kong dia lia dia pe sudara yang percaya pe hidup susa tapi dia tara tolong, itu Tuhan Allah pe sayang tara ada di dia pe hati.

¹⁸Jadi, ngoni yang kita sayang sama deng kita pe ana-ana, kalu torang sayang orang, jang cuma di mulu saja atau cuma bilang torang sayang pa dorang tapi torang tara biking apa-apa. Mari suda torang sayang pa orang butul-butul iko deng apa yang torang biking tiap hari pa orang laeng.

¹⁹Kalu torang sayang pa orang bagitu, torang bisa tau torang ini iko yang butul, deng torang pe hati jadi tenang pa Tuhan Allah pe muka,

²⁰biar lagi torang pe hati masi rasa bersala karna torang berdosa. Barang, Tuhan Allah lebe basar dari torang pe hati deng Dia tau samua yang torang pikir deng torang biking.

²¹Sudara-sudara yang kita sayang, kalu di torang pe hati torang tau torang tara sala, torang tara usa tako lagi badekat pa Tuhan Allah.

²²Jadi kalu torang minta apa saja pa Dia, Dia akan kase pa torang, karna torang salalu biking Dia pe parenta, deng jaga biking hal-hal yang kase sanang Dia pe hati.

²³ Tuhan pe parenta itu bagini: torang musti percaya pa Yesus Kristus, Anak Allah, deng torang lagi musti baku sayang, sama deng parenta yang Yesus Kristus so kase pa torang.

²⁴Sapa yang iko Tuhan Allah pe parenta-parenta, dia so jadi satu hati deng Tuhan Allah, kong Tuhan Allah me jadi satu hati deng dia. Deng bagitu, torang bisa tau, Tuhan Allah satu hati deng torang, barang Tuhan Allah so kase Dia pe Roh pa torang.