Read Malay, North Moluccan 1 Yohanes 4 Bible Online

1 Yohanes 4 - Malay, North Moluccan bible

1 Yohanes 4

¹Sudara-sudara yang kita sayang, jang ngoni percaya pa samua orang yang bilang, pa dorang ada Tuhan Allah pe Roh. Lebe bae ngoni lia dulu bae-bae kalu dorang butul dari Tuhan ka bukang, karna banya orang yang datang skarang bilang kata, dong kase turus Tuhan Allah pe pasáng, padahal bafoya. Dorang cuma nabi palsu.

²Torang bisa tau Tuhan Allah pe Roh itu ada pa orang ka tarada, deng cara bagini: orang yang mangaku, Yesus Kristus so datang di dunia jadi manusia, pa dorang itu ada Tuhan Allah pe Roh.

³Tapi orang yang tara mangaku Yesus Kristus datang di dunia jadi manusia, pa dorang itu tarada Tuhan Allah pe Roh. Roh yang ada pa orang itu roh yang musu pa Yesus Kristus.[4] Ngoni pasti so dengar roh itu mo datang kong skarang so ada di dunia ini.

⁴Tapi, ngoni yang kita so sayang sama deng kita pe ana-ana, ngoni ini dari Tuhan Allah. Jadi ngoni so kase kala pa nabi-nabi palsu, karna Roh yang ada pa ngoni Dia pe kuasa lebe basar dari roh yang ada di dunia ini.

⁵Nabi-nabi palsu itu dorang pe roh dari dunia ini, karna itu dorang bicara yang tara iko Tuhan pe mau. Kong orang-orang yang tara percaya pa Yesus dengar pa nabi-nabi palsu itu.

⁶Torang ini dari Tuhan Allah. Jadi orang yang kanal pa Tuhan Allah, dia dengar pa torang. Tapi orang yang tara kanal pa Tuhan Allah, dia tara dengar pa torang. Dari situ torang dapa tau, orang yang ada Tuhan Allah pe Roh, dia bawa ajaran yang butul, deng orang yang tarada Tuhan Allah pe Roh, dia bawa ajaran yang tara butul.

⁷Sudara-sudara yang kita sayang, mari suda torang baku sayang satu deng yang laeng, karna sayang itu dari Tuhan Allah. Jadi sapa saja yang sayang orang, dia itu kanal pa Tuhan Allah kong so jadi Tuhan Allah pe ana.

⁸Tapi sapa yang tara sayang orang, dia tara kanal pa Tuhan Allah, barang Tuhan Allah itu pangsayang.

⁹Tuhan Allah kase tunju Dia pe sayang pa torang deng cara Dia utus Dia pe Anak dapa yang cuma satu itu di dunia ini, supaya Dia pe Anak dapa itu biking torang bole dapa hidup deng Tuhan Allah slama-lamanya.

¹⁰Sayang yang butul itu, bukang torang yang sayang pa Tuhan Allah, tapi Tuhan Allah yang sayang pa torang, sampe Dia utus Dia pe Ana untuk jadi korban supaya torang dapa ampun dari torang pe dosa-dosa.

¹¹Sudara-sudara yang kita sayang, karna Tuhan Allah sayang skali pa torang, torang me musti baku sayang.

¹² Tarada satu orang yang perna lia langsung pa Tuhan Allah. Tapi kalu torang baku-baku sayang, Tuhan Allah tetap ada di torang pe hati, kong Dia pe sayang biking torang butul-butul sayang iko Dia pe mau.

¹³Tuhan Allah so kase Dia pe Roh pa torang supaya torang bole tau, Tuhan Allah tetap ada di torang pe hati, kong torang tetap jadi satu hati deng Dia.

¹⁴Torang ini so lia pa Anak Allah deng torang pe mata kapala sandiri kong so kase tau pa ngoni, butul Tuhan Allah torang pe Bapa so utus Dia pe Anak untuk kase slamat pa manusia yang ada di dunia ini.

¹⁵Sapa saja yang mangaku, Yesus itu Anak Allah, Tuhan Allah tetap ada di dia pe hati kong dia me tetap satu hati deng Tuhan Allah.

¹⁶Torang so tau deng so percaya, Tuhan Allah paling sayang pa torang. Tuhan Allah itu pangsayang. Jadi sapa yang sayang pa orang-orang, orang itu tetap satu hati deng Tuhan Allah, kong Tuhan Allah me satu hati deng dia.

¹⁷Tuhan Allah pe sayang itu biking torang butul-butul baku sayang iko Dia pe mau, supaya nanti di hari kiamat, waktu Tuhan mo adili pa samua orang, torang tara tako, karna waktu torang hidup di dunia ini, torang iko sama deng yang Tuhan Yesus biking.

¹⁸Kalu Tuhan Allah pe sayang ada di torang pe hati, torang tara ada rasa tako. Barang, Tuhan Allah biking torang bole baku sayang iko Dia pe mau, kong itu yang biking torang pe rasa tako jadi ilang. Kalu orang rasa tako, itu karna dia tau dia pe diri masi ada sala deng mo dapa hukuman dari Tuhan Allah. Jadi orang yang bagitu, dia bolong sayang iko Tuhan Allah pe mau.

¹⁹Torang baku sayang, karna Tuhan Allah yang kamuka sayang pa torang.

²⁰Kalu ada orang bilang, “Kita sayang pa Tuhan Allah,” tapi dia binci dia pe sudara yang percaya, itu dia bafoya. Karna sapa saja yang tara sayang pa orang laeng yang dia lia, tara mungkin dia sayang pa Tuhan Allah yang dia tara dapa lia.

²¹Ini parenta yang torang tarima dari Tuhan Allah: sapa saja yang sayang pa Tuhan Allah, dia me musti sayang pa dia pe sudara yang percaya.