Read Malay, North Moluccan 1 Yohanes 5 Bible Online

1 Yohanes 5 - Malay, North Moluccan bible

1 Yohanes 5

¹Tiap orang yang percaya Yesus itu Kristus, Raja yang Tuhan Allah pili, orang itu Tuhan Allah pe ana. Deng sapa saja yang sayang pa Tuhan Allah, orang itu pasti sayang pa Tuhan Allah pe ana-ana.

²Turus kalu torang sayang pa Tuhan Allah deng iko Dia pe parenta-parenta, itu jadi bukti torang me sayang Dia pe ana-ana.

³ Kalu torang sayang pa Tuhan Allah, torang iko Dia pe parenta-parenta. Kong Dia pe parenta-parenta itu tara susa untuk torang biking.

⁴Barang, tiap orang yang so jadi Tuhan Allah pe ana-ana mampo kase kala kuasa jahat di dunia ini. Kong torang bole kase kala kuasa yang jahat itu, karna torang pe percaya.

⁵Cuma orang-orang yang percaya Yesus itu Anak Allah saja, yang bisa kase kala yang jahat di dunia ini. Tarada yang laeng!

⁶Yesus Kristus itu suda yang Tuhan Allah utus untuk datang di dunia ini. Dia dapa baptis, kong Dia lagi dapa salib sampe Dia pe dara tatumpa. Yesus bukang cuma dapa baptis saja, tapi dapa salib lagi supaya jadi jelas Dia itu dari Tuhan Allah, kong Tuhan Allah pe Roh bilang samua itu butul, barang Roh itu tara perna bafoya.

⁷Ada tiga bukti yang biking torang tau butul Yesus itu datang dari Tuhan Allah:

⁸Tuhan pe Roh, aer yang Yohanes pake untuk baptis Yesus, deng Yesus pe dara yang tatumpa di kayu salib. Tiga ini yang kase bukti Yesus datang dari Tuhan Allah.

⁹Kalu manusia jadi saksi, torang percaya apa yang dia kase tau, apa lagi kalu Tuhan Allah yang jadi saksi, torang musti lebe percaya. Barang, yang Tuhan Allah kase tau itu tentang Dia pe Anak sandiri.

¹⁰Sapa saja yang percaya pa Anak Allah, di dia pe hati dia so tarima apa yang Tuhan Allah so kase tau tentang Dia pe Anak. Tapi sapa saja yang tara percaya pa Tuhan Allah, dia biking Tuhan Allah sama deng pangbafoya, barang dia tara percaya apa yang Tuhan Allah so kase tau tentang Dia pe Anak.

¹¹ Ini yang Dia kase tau: Tuhan Allah kase pa torang hidup deng Dia slama-lamanya, kong hidup slama-lamanya itu torang dapa dari Dia pe Anak.

¹²Sapa yang hidup satu hati deng Anak Allah, dia dapa hidup deng Tuhan Allah slama-lamanya. Tapi sapa yang tara hidup satu hati deng Anak Allah, dia tara dapa hidup deng Tuhan Allah slama-lamanya.

¹³Kita tulis samua itu pa ngoni yang percaya pa Anak Allah, supaya ngoni tau, ngoni so dapa hidup deng Tuhan Allah slama-lamanya.

¹⁴Kong torang tara usa tako badekat pa Tuhan Allah. Barang, torang tau kalu torang minta apa saja iko Dia pe mau, torang bole yakin Dia dengar apa yang torang minta itu.

¹⁵Kong kalu torang tau, Dia dengar apa saja yang torang minta, torang lagi musti yakin, apa yang torang minta itu torang akan dapa.

¹⁶Kalu ada dari torang yang lia dia pe sudara yang percaya biking dosa, tapi dosa itu tara biking sudara itu dapa hukuman tapisa deng Tuhan Allah slama-lamanya, orang yang lia itu musti berdoa supaya Tuhan Allah kase ampun la dia bole dapa hidup deng Tuhan Allah slama-lamanya. Ada dosa yang biking orang dapa hukuman tapisa deng Tuhan Allah slama-lamanya.[5] Untuk orang yang biking dosa yang bagitu, kita tara minta ngoni kase berdoa pa dia.

¹⁷Samua yang jahat yang orang biking, itu dosa, tapi ada dosa yang bisa dapa ampun, dosa itu tara biking orang dapa hukuman tapisa deng Tuhan Allah slama-lamanya.

¹⁸Torang tau, samua orang yang so jadi Tuhan Allah pe ana-ana, dorang so tara biking dosa lagi. Barang, Anak Allah jaga pa dorang, sampe Iblis, setang-setang pe raja tara mampo mo kase kala pa dorang.

¹⁹Biar Iblis kuasai seluru dunia ini, torang tau, torang ini Tuhan Allah pe ana-ana.

²⁰Torang me tau Anak Allah so datang kong so biking torang mangarti la torang kanal Tuhan Allah yang Butul. Torang so hidup satu hati deng Tuhan Allah, karna torang so hidup satu hati deng Dia pe Anak Yesus Kristus. Dia itu suda Tuhan Allah yang Butul deng Dia yang biking orang bole dapa hidup deng Tuhan Allah slama-lamanya.

²¹Ee ngoni yang kita so sayang sama deng kita pe ana-ana, ngoni musti ati-ati, jang sampe ngoni semba pa apa yang bukang Tuhan.