Read Malay, North Moluccan Wahyu 13 Bible Online

Wahyu 13 - Malay, North Moluccan bible

Wahyu 13

¹ Abis itu, kita lia binatang satu yang jahat kaluar dari dalam laut. Binatang itu pe kapala tuju deng dia pe tandu spulu. Dia pe tandu-tandu itu, samua ada makota. Deng di dia pe kapala-kapala ada tatulis kata-kata yang kase tara bae Tuhan Allah pe nama.

² Binatang itu pe badan sama deng musang yang basar. Dia pe kaki basar, babulu deng tajam. Kong dia pe mulu basar, kuat deng gigi tajam sama deng singa. Kong pa dia, naga kase dia pe kekuatan, dia pe kursi raja deng dia pe kuasa yang basar.

³Di binatang itu pe kapala satu, ada bakas luka. Luka itu bisa kase mati pa dia, tapi luka itu so sembu. Karna itu, samua orang di dunia herang skali lia pa binatang itu, kong iko pa dia.

⁴Kong dorang semba pa naga itu, karna dia so kase dia pe kuasa pa binatang jahat itu. Dorang me semba pa binatang itu deng bilang bagini, “Tarada yang kuat sama deng binatang ini. Tarada yang bisa lawan sampe kase kala pa dia!”

⁵ Tuhan Allah kase biar binatang itu makang puji, deng kase tara bae Tuhan Allah pe nama. Tuhan Allah me kase biar dia berkuasa di dunia selama ampa pulu dua bulan.

⁶Binatang itu hina-hina pa Tuhan Allah, dia kase tara bae Tuhan Allah pe nama. Dia me pandang enteng sorga, tampa yang Tuhan Allah tinggal, deng samua yang ada di sorga.

⁷ Tuhan Allah kase ijin pa dia lagi untuk baku prang lawan pa orang-orang yang so jadi Tuhan Allah pe umat, kong kase kala pa dorang. Dia me dapa hak untuk berkuasa pa samua orang dari samua fam, suku bangsa, bahasa deng samua bangsa.

⁸ Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.

⁹Dengar bae-bae pasáng ini:

¹⁰ orang yang Tuhan Allah so tentukan untuk dapa tangka, dia pasti mo dapa tangka. Orang yang Tuhan Allah so tentukan untuk dapa bunu deng parang, dia pasti mo dapa bunu deng parang. Jadi yang penting di sini, orang-orang yang so jadi Tuhan Allah pe umat musti tetap percaya pa Tuhan deng batahang biar dapa siksa.

¹¹Abis itu, kita lia binatang jahat satu lagi kaluar dari dalam bumi. Binatang kedua itu ada tandu dua yang sama deng ana domba pe tandu. Dia pe suara sama deng naga pe suara.

¹²Binatang itu, dia pake binatang pertama pe kuasa samua pa dia pe muka. Dia biking samua orang di bumi semba pa binatang yang pertama itu, binatang yang ada luka barát tapi so sembu.

¹³Binatang yang kedua itu biking tanda-tanda yang hebat skali, sampe dia kase turung api dari langit ka bawa di bumi di orang banya pe muka.

¹⁴Dia biking tanda-tanda itu di binatang pertama pe muka, sampe dia kase sesat orang-orang di bumi. Dia me suru dorang biking patong satu sama deng binatang yang pertama, binatang yang ada luka barát tapi so sembu itu.

¹⁵Kong binatang yang kedua itu dapa kuasa untuk kase banapas pa binatang pertama pe patong la dia hidup. Deng bagitu patong yang so hidup itu bole bicara kong bunu pa orang-orang yang tara semba pa dia.

¹⁶Binatang yang kedua me suru samua orang la tarima cap di dong pe tangan kanan atau testa. Orang yang dapa cap itu: orang biasa deng orang penting, orang miskin deng orang kaya, orang karja yang dia pe tuang so bili, deng orang yang bebas.

¹⁷Kalu orang tara dapa cap itu, dorang tara bole bajual atau babili apa-apa. Di cap itu ada tatulis binatang pertama pe nama, deng dia pe nomor.

¹⁸Jadi yang paling penting di sini, orang musti pikir bae-bae nomor itu. Sapa yang bijaksana, lebe bae dia rekeng bae-bae binatang itu pe nomor la tau dia pe arti, karna nomor itu, satu orang pe nomor. Nomor itu 666.