Read Malay, North Moluccan Wahyu 15 Bible Online

Wahyu 15 - Malay, North Moluccan bible

Wahyu 15

¹Kong kita lia ada tanda laeng lagi di sorga yang luar biasa yang biking orang herang. Ada malaekat tuju, masing-masing ada kuasa untuk biking cilaka. Cilaka-cilaka yang dorang biking itu, tuju cilaka terahir di dunia. Kong kalu tuju cilaka itu so jadi, Tuhan Allah pe mara pa manusia di dunia ini so abis suda.

²Turus, kita lia ada satu barang yang luas sama deng laut, dia pe jerni sama deng kaca yang kanal deng cahaya api. Kong ada banya orang yang badiri di dia pe pinggir. Dorang yang badiri itu orang-orang yang so kase kala pa binatang jahat, karna dorang tara semba dia pe patong deng tara tarima nomor dari binatang jahat itu. Dorang samua itu ada pegang Tuhan Allah pe alat musik kecapi.

³Dorang manyanyi nabi Musa pe lagu, nabi Musa itu yang jaga biking apa yang Tuhan Allah suru. Lagu itu me Anak Domba pe lagu. Lagu itu pe babunyi bagini, “Ya Tuhan, Tuhan Allah Yang Paling Berkuasa. Tuhan yang biking hal-hal yang luar biasa sampe orang herang. Oo, Tuhan, samua suku pe Raja. Samua yang Tuhan biking itu butul deng adil.

⁴ Samua orang pasti akan tako pa Tuhan, kong puji deng hormat Tuhan pe nama. Barang cuma Tuhan saja yang kudus. Samua suku mo datang kong berlutut untuk semba pa Tuhan. Karna samua orang so lia apa yang Tuhan biking itu butul.”

⁵ Abis itu, kita lia Tuhan Allah pe Ruma[17] di sorga, kong Tuhan Allah pe Ruang Paling Suci di dalam itu tabuka.

⁶Turus, malaekat tuju yang ada kuasa untuk biking tuju cilaka itu kaluar dari Ruang Paling Suci itu. Dorang samua ada pake baju puti bersi deng mangkilat. Di dorang pe dada masing-masing ada salempang mas.

⁷Dari ampa binatang luar biasa, ada satu yang kase mangko mas tuju pa malaekat tuju itu. Mangko tuju itu ponong deng Tuhan Allah pe mara. Tuhan Allah itu suda yang hidup sampe slama-lamanya.

⁸ Kong Ruang Paling Suci itu ponong deng asap karna Tuhan Allah itu hebat, deng karna Dia punya kuasa. Tarada satu orang yang bole maso di ruang itu. Tapi kalu malaekat tuju itu so abis biking tuju cilaka terahir itu, baru orang bole maso di Ruang Paling Suci itu.