Read Malay, North Moluccan Wahyu 4 Bible Online

Wahyu 4 - Malay, North Moluccan bible

Wahyu 4

¹Abis itu, kita lia pintu satu di sorga tabuka. Kong kita dengar Anak Manusia yang dari sorga pe suara bicara lagi pa kita. Suara itu pe kuat sama deng trompet pe babunyi. Suara itu bilang pa kita, “Yohanes, nae suda kamari! Kita mo kase tunju pa ngana hal-hal yang akan jadi abis ini.”

²Pe abis bilang bagitu, langsung Tuhan Allah pe Roh kuasai pa kita, kong kita lia sorga. Kita lia ada satu kursi raja kong ada satu Orang yang dudu di kursi raja itu.

³ Dia yang dudu di kursi raja itu bacahaya warna ijo deng mera, sama deng batu mangkilat yang mahal. Batu itu orang sebut, yaspis deng sardis. Turus ada pelangi yang kuliling di kursi raja itu, dia pe cahaya warna ijo sama deng batu mangkilat yang orang sebut zamrud.

⁴ Ada lagi dua pulu ampa kursi raja laeng yang kuliling kursi raja itu. Di dua pulu ampa kursi raja itu, dua pulu ampa pemimpin ada dudu. Dorang pake baju puti kong di dorang pe kapala ada makota mas.

⁵ Dari kursi raja itu ada kilat baku sambar-sambar kaluar deng guntur babunyi baku sambung-sambung. Di kursi raja itu pe muka ada tuju obor yang mamanyala, itu Tuhan Allah pe tuju Roh.

⁶ Deng di kursi raja itu pe muka ada barang satu, macam deng lautan kaca, dia jerni sama deng kristal. Ada ampa binatang luar biasa kuliling di kursi raja itu. Binatang ampa itu pe bagian muka deng balakang ponong deng mata.

⁷ Binatang yang pertama sama deng singa, yang kedua sama deng sapi paranggang, yang ketiga pe muka sama deng manusia, turus yang keempat sama deng burung rajawali sementara terbang.

⁸Ampa binatang itu masing-masing pe sayap ada anam. Di sayap-sayap itu, dia pe bagian luar deng dalam ponong deng mata. Siang deng malam binatang-binatang itu tara perna berenti babilang bagini, “Suci, suci, Tuhan Allah itu paling suci suda! Dia Yang Paling Berkuasa. Dia yang dari dulu ada, yang skarang ada, deng yang nanti akan datang untuk slama-lamanya.”

⁹Ampa binatang itu kase dong pe puji-pujian deng hormat pa Tuhan Allah yang dudu di kursi raja. Dorang me bilang tarimakasi pa Dia, Dia itu yang hidup slama-lamanya. Kong tiap kali dorang biking bagitu,

¹⁰dua pulu ampa pemimpin itu berlutut semba pa Dia yang dudu di kursi raja itu. Dia itu yang hidup slama-lamanya. Kong waktu itu, dorang buka dong pe makota, turus dorang taru di muka kursi raja itu deng bilang bagini,

¹¹“Ya Tuhan Allah torang pe Tuhan. Cuma Tuhan saja yang pantas mo dapa puji deng hormat, deng Tuhan yang punya kuasa. Barang, Tuhan so cipta samua-samua yang ada, kong samua itu ada karna Tuhan suka itu ada, Tuhan yang biking samua itu.”