Read Malay, North Moluccan Wahyu 8 Bible Online

Wahyu 8 - Malay, North Moluccan bible

Wahyu 8

¹Abis itu, Anak Domba buka segel yang ketuju. Kong waktu itu sorga jadi sunyi kira-kira stenga jam.

²Turus kita lia malaekat tuju badiri pa Tuhan Allah pe muka, kong dorang masing-masing dapa kase trompet.

³ Kong ada malaekat satu yang laeng datang, dia badiri di pinggir tampa bakar korban persembahan. Dia bawa loyang mas kong dia dapa kase banya kemenyan[11] la mo bakar jadi persembahan yang bobou sadap pa Tuhan Allah. Dia me tarima doa-doa dari samua orang yang so jadi Tuhan Allah pe umat. Kong dia bakar kemenyan itu deng serakan doa-doa itu sama-sama di tampa bakar korban persembahan yang ada biking dari mas, di muka Tuhan Allah pe kursi raja.

⁴Kong kemenyan pe asap deng doa-doa dari samua orang yang so jadi Tuhan Allah pe umat, itu samua nae sama-sama dari malaekat itu pe tangan sampe pa Tuhan Allah.

⁵ Abis itu, malaekat ambe loyang itu, dia isi deng api yang ada ambe dari tampa bakar korban persembahan. Turus dia kase lempar loyang itu di bumi. Kong dapa dengar guntur babunyi deng kilat baku sambung-sambung, deng ada lagi tana goyang.

⁶Kong tuju malaekat yang ada pegang trompet, dorang siap-siap untuk tiop dong pe trompet masing-masing itu.

⁷ Waktu malaekat yang pertama tiop dia pe trompet, ujang es deng api yang bacampur deng dara turung di bumi. Samua rumpu iko tabakar. Kalu mo bagi dunia ini jadi tiga bagian, yang tabakar itu satu bagian. Deng kalu mo bagi samua pohong di dunia ini jadi tiga bagian, yang tabakar itu satu bagian.

⁸Turus malaekat yang kedua tiop dia pe trompet, kong ada satu barang sama deng gunung basar yang mamanyala karna tabakar, talempar di laut. Kalu mo bagi laut jadi tiga bagian, satu bagian beruba jadi dara,

⁹deng kalu samua binatang yang hidup di laut jadi tiga bagian, satu bagian mati. Turus kalu kapal-kapal yang balayar di laut mo bagi jadi tiga bagian, satu bagian angus.

¹⁰ Malaekat yang ketiga tiop dia pe trompet, kong bintang basar satu jatu dari langit. Bintang itu mamanyala sama deng obor. Kong bintang itu jatu di kali-kali deng di mata-mata aer. Kalu mo bagi samua kali deng mata aer di dunia jadi tiga bagian, bintang itu jatu di satu bagian.

¹¹ Bintang yang jatu itu dia pe nama Apsintus, yang pe arti, pait. Waktu bintang itu jatu di aer, aer-aer di dunia itu beruba jadi pait. Kalu mo bagi samua aer di dunia ini jadi tiga bagian, satu bagian aer jadi pait. Kong banya orang yang mati karna minum aer itu.

¹² Malaekat yang keempat tiop dia pe trompet, turus matahari, bulan deng bintang tara basinar bae-bae. Jadi kalu siang, satu bagian dari tiga bagian itu jadi galap karna matahari so tara basinar bae-bae. Deng kalu malam, satu bagian dari tiga bagian waktu malam itu jadi galap buta, karna bulan deng bintang so tara basinar bae-bae.

¹³Kong kita lia ada burung rajawali satu ekor terbang tinggi di langit. Turus kita dengar burung itu bilang kuat-kuat bagini, “Cilaka! Cilaka! Cilaka suda orang-orang yang hidup di dunia! Karna masi ada tiga malaekat lagi yang mo tiop dong pe trompet.”