Read Maltese Bible with DC – IL-BIBBJA IL-KOTBA MQADDSA ĠENESI 11 Bible Online

ĠENESI 11 - Maltese Bible with DC – IL-BIBBJA IL-KOTBA MQADDSA bible

ĠENESI 11

¹U l-art kollha kienet ilsien wieħed u kliem wieħed.

²Meta l-bnedmin telqu mil-Lvant sabu wita f’art Singħar u baqgħu hemm.

³U qalu wieħed lil ieħor: “Ejjew nagħmlu l-madum u naħmuh sewwa!” U l-madum kienu jużawh flok il-ġebel, u l-qatran flok it-tajn.

⁴U reġgħu qalu: “Ejjew nibnu belt għalina, u torri[13], bil-quċċata tiegħu tilħaq is-smewwiet, u nagħmlu isem għalina, ħalli ma nixterdux mal-wiċċ kollu tal-art.”

⁵U l-Mulej niżel jara l-belt u t-torri li kienu qegħdin jibnu l-bnedmin.

⁶U l-Mulej qal: “Arahom, poplu wieħed u lsien wieħed għalihom ilkoll. U dan għadu l-bidu ta’ xogħolhom; issa kulma jiġihom f’rashom xejn ma jaqtgħalhom qalbhom!

⁷Ejja, ħa ninżlu u nħabblulhom ilsienhom, ħalli ma jifhmux ilsien xulxin.”

⁸U l-Mulej xerridhom minn hemm għal fuq wiċċ l-art kollha, u waqfu mill-bini tal-belt.

⁹Għalhekk bdew isejħulha Babel[14], għax hemm ħawwad il-Mulej ilsien l-art, u minn hemm xerridhom il-Mulej mal-wiċċ kollu tal-art.

¹⁰Dan hu nisel Sem. Sem kellu mitt sena meta wiled lil Arfaksad, sentejn wara d-dilluvju.

¹¹U wara li wiled lil Arfaksad, Sem għex ħames mitt sena oħra, u wiled subien u bniet.

¹²U Arfaksad kellu ħamsa u tletin sena meta wiled lil Selaħ.

¹³U wara li wiled lil Selaħ, Arfaksad għex erba’ mija u tliet snin oħra, u wiled subien u bniet.

¹⁴U Selaħ kellu tletin sena meta wiled lil Għeber.

¹⁵U wara li wiled lil Għeber, Selaħ għex erba’ mija u tliet snin oħra, u wiled subien u bniet.

¹⁶U Għeber kellu erbgħa u tletin sena meta wiled lil Peleg;

¹⁷u wara li wiled lil Peleg, Għeber għex erba’ mija u tletin sena oħra, u wiled subien u bniet.

¹⁸U Peleg kellu tletin sena meta wiled lil Regħu:

¹⁹u wara li wiled lil Regħu, Peleg għex mitejn u disa’ snin oħra, u wiled subien u bniet.

²⁰U Regħu kellu tnejn u tletin sena meta wiled lil Xerug;

²¹u wara li wiled lil Xerug, Regħu għex mitejn u seba’ snin oħra, u wiled subien u bniet.

²²U Xerug kellu tletin sena meta wiled lil Naħor;

²³u wara li wiled lil Naħor, Xerug għex mitejn sena oħra, u wiled subien u bniet.

²⁴U Naħor kellu disgħa u għoxrin sena meta wiled lil Teraħ;

²⁵u wara li wiled lil Teraħ, Naħor għex mija u dsatax-il sena oħra; u wiled subien u bniet.

²⁶Teraħ kellu sebgħin sena meta wiled lil Abram, lil Naħor, u lil Ħaran.

²⁷Dan hu nisel Teraħ: Teraħ wiled lil Abram, lil Naħor, u lil Ħaran. U Ħaran wiled lil Lot.

²⁸Ħaran miet qabel Teraħ missieru, f’art twelidu, f’Ur tal-Kaldin.

²⁹Abram u Naħor iżżewġu; mart Abram kien jisimha Saraj; u mart Naħor Milka bint Ħaran, missier Milka u Giska.

³⁰Saraj kienet sterili, u ma kellhiex tfal.

³¹U Teraħ qabad lil ibnu Abram, lil Lot bin Ħaran, jiġifieri bin ibnu, il-kunjata Saraj, mart ibnu Abram, u telaq bihom minn Ur tal-Kaldin lejn l-art ta’ Kangħan; u waslu Ħaran u baqgħu hemm.

³²U għomor Teraħ kien laħaq il-mitejn u ħames snin; u Teraħ miet f’Ħaran.