Read Maltese Bible with DC – IL-BIBBJA IL-KOTBA MQADDSA ĠENESI 16 Bible Online

ĠENESI 16 - Maltese Bible with DC – IL-BIBBJA IL-KOTBA MQADDSA bible

ĠENESI 16

¹U Saraj, mart Abram, ma wilditlux tfal; u kellha qaddejja Eġizzjana jisimha Ħagar.

²U Saraj qalet lil Abram: “Ara, il-Mulej ma tanix li niled. Ersaq lejn il-qaddejja tiegħi, forsi jkolli tfal minnha.” U Abram sama’ minn kliem Saraj.

³U Saraj mart Abram qabdet lil Ħagar, il-qaddejja Eġizzjana tagħha, għaxar snin wara li Abram kien ilu jgħammar f’Kangħan, u tatha lil Abram żewġha b’martu.

⁴U Abram resaq lejn Ħagar, u din tqalet, u malli ntebħet li tqalet, lil sidtha ma stmathiex aktar.

⁵U Saraj qalet lil Abram: “Int taħti għal għajbi! Jiena tajtek il-qaddejja tiegħi fi ħdanek, u issa, għax rat li tqalet, mhijiex tistmani aktar. Ħa jagħmel ħaqq il-Mulej bejni u bejnek!”

⁶U Abram wieġeb lil Saraj: “Ara l-qaddejja tiegħek f’idejk, agħmlilha li jidhirlek li hu sewwa.” U Saraj għakksitha, u l-oħra ħarbet minn quddiem għajnejha.

⁷U sabha l-anġlu tal-Mulej[20] ħdejn għajn tal-ilma fid-deżert, l-għajn li hemm fit-triq ta’ Sur.

⁸U qalilha: “Ħagar, qaddejja ta’ Saraj, mnejn ġejja, u fejn int sejra?” U hi wieġbet: “Jiena ħrabt minn quddiem sidti Saraj.”

⁹U weġibha l-anġlu tal-Mulej: “Erġa’ lura lejn sidtek, u oqgħod għaliha.”

¹⁰U żied jgħidilha l-anġlu tal-Mulej: “Jien inkattar fuq li nkattar lil nislek, u ma jingħaddx għall-kotra.”

¹¹U kompla jgħidilha l-anġlu tal-Mulej: “Arak, int tqila u tiled iben, u ssejjaħlu Ismagħel. Għax il-Mulej sama’ b’hemmek.

¹²U hu jkun bniedem bħal ħmar selvaġġ, idu kontra kulħadd, u id kulħadd kontrih, u kontra ħutu kollha jgħammar.”

¹³Imbagħad hi semmiet il-Mulej li kien kellimha: “Int El-roj, Alla li tħalli ’l min jarak.” Għax qalet: “Ma rajtux jien, u bqajt ħajja wara li rajtu[21]?”

¹⁴U għalhekk sejħet dak il-bir, Bir-laħaj-roj, il-bir li hemm bejn Kades u Bered.

¹⁵U Ħagar wildet iben lil Abram, u Abram semma t-tifel li wilditlu Ħagar Ismagħel.

¹⁶U Abram kellu sitta u tmenin sena meta Ħagar wilditlu lil Ismagħel.