Read Maltese Bible with DC – IL-BIBBJA IL-KOTBA MQADDSA ĠENESI 17 Bible Online

ĠENESI 17 - Maltese Bible with DC – IL-BIBBJA IL-KOTBA MQADDSA bible

ĠENESI 17

¹U Abram kellu disgħa u disgħin sena meta deherlu l-Mulej u qallu: “Jien El-Xaddaj[22]. Imxi quddiemi u kun perfett.

²U jien nagħmel patt bejni u bejnek, u nkattrek fuq li nkattrek.”

³U Abram inxteħet wiċċu fl-art, u Alla kellmu u qallu:

⁴“Hawn jien. Ara l-patt tiegħi miegħek: Int tkun missier ta’ ħafna ġnus.

⁵U ma tissejjaħx aktar Abram, imma Abraham ikun ismek, għax missier ħafna ġnus nagħmel minnek.

⁶U jiena nkattrek fuq li nkattrek, u nagħmel minnek ġnus sħaħ, u slaten joħorġu minnek.

⁷U jien nagħmel il-patt tiegħi bejni u bejnek, bejni u bejn nislek warajk skont il-ġenerazzjonijiet tagħhom, patt għal dejjem, li nkun Alla tiegħek u ta’ nislek għal dejjem warajk.

⁸U jien nagħti lilek u lil nislek l-art fejn int frustier, l-art kollha ta’ Kangħan, biex tkun tiegħek għal dejjem, u jiena nkun Alla tagħhom.”

⁹U Alla żied jgħid lil Abraham: “U int iżżomm il-patt tiegħi, int u nislek warajk, skont il-ġenerazzjonijiet tagħhom.”

¹⁰Dan hu l-patt li għandkom tħarsu bejni u bejnkom, u bejni u bejn nislek warajk għal dejjem: aħtnu kull raġel fostkom[23].

¹¹Intom tkun maħtuna fil-laħam ta’ ġisimkom, u dan ikun sinjal bejni u bejnkom.

¹²Jinħaten kull tifel tagħkom ta’ tmint ijiem fil-ġenerazzjonijiet tagħkom, sew jekk ikun imwieled f’darek, sew il-mixtri bil-flus mingħand il-barrani li ma jkunx min-nisel tiegħek.

¹³Jinħaten sew dak li jkun imwieled f’darek, sew dak li jkun mixtri bi flusek. U l-patt tiegħi jkun minqux f’laħamkom b’patt għal dejjem.

¹⁴U r-raġel li ma jinħatinx f’ġismu, jiġifieri li ma jinqatagħlux il-laħam ta’ ġismu, jinqata’ dan ir-raġel mill-bqija tal-poplu tiegħu, għax ikun kiser il-patt tiegħi.”

¹⁵U Alla żied jgħid lil Abraham: “Saraj martek, ma jkunx jisimha aktar Saraj, imma Sara jkun isimha.

¹⁶Għax jiena nberikha u minnha wkoll nagħti lilek iben. U jien inberikha u tkun omm ta’ popli li minnha joħorġu slaten ta’ ġnus.”

¹⁷U nxteħet għal wiċċu fl-art Abraham u daħak, u qal f’qalbu: “Huwa wieħed ta’ mitt sena jitweldulu t-tfal? U Sara mara ta’ disgħin sena tista’ tiled?”

¹⁸U Abraham qal lil Alla: “Jalla Ismagħel ikun taħt għajnejk.”

¹⁹U Alla wieġbu: “Le! Sara, martek, tilidlek iben u ssemmih Iżakk, u jien nagħmel il-patt tiegħi miegħu għal dejjem, u ma’ nislu warajh.

²⁰Dwar Ismagħel, smajtek. Ara, jiena nbierku, inkattru u nkabbru ħafna ħafna. Ikun il-missier ta’ tnax-il prinċep; u nagħmel minnu ġens kbir.

²¹Imma l-patt tiegħi nagħmlu ma’ Iżakk, li għad tilidlek Sara bħal dan iż-żmien sena oħra.”

²²U Alla temm jitkellem miegħu, u tala’ minn quddiem Abraham.

²³U Abraham qabad lil Ismagħel, ibnu, u lil kull min kien twieled f’daru, u ’l kull min kien xtrah bil-flus, kull raġel fost in-nies ta’ dar Abraham; u ħatinhom fil-laħam ta’ ġisimhom dak in-nhar stess kif kien qallu Alla.

²⁴U Abraham kellu disgħa u disgħin sena meta nħaten fil-laħam ta’ ġismu.

²⁵Ibnu Ismagħel kellu tlettax-il sena meta nħaten fil-laħam ta’ ġismu.

²⁶Dak in-nhar stess inħatnu Abraham u Ismagħel ibnu.

²⁷U l-irġiel kollha ta’ daru, dawk li twieldu f’daru, u dawk li kienu mixtrija bil-flus mingħand il-barrani, inħatnu miegħu.