Read Maltese Bible with DC – IL-BIBBJA IL-KOTBA MQADDSA ĠENESI 19 Bible Online

ĠENESI 19 - Maltese Bible with DC – IL-BIBBJA IL-KOTBA MQADDSA bible

ĠENESI 19

¹U ż-żewġ anġli waslu Sodoma filgħaxija; u Lot kien qiegħed fil-bieb ta’ Sodoma. Malli Lot rahom qam u mar jilqagħhom, u nxteħet wiċċu fl-art quddiemhom.

²U qalilhom: “Ara, sidien tiegħi, jekk jogħġobkom, duru lejn id-dar tal-qaddej tagħkom; għaddu l-lejl hemm, aħslu riġlejkom u mbagħad bakkru u morru għal triqtkom.” U qalulu: “Le! ngħaddu l-lejl fil-misraħ.”

³U hu baqa’ jissikkahom, u huma lwew lejn daru u marru għandu. U lestielhom ikla, ħmielhom ħobż bla ħmira, u kielu.

⁴Qabel ma raqdu, in-nies tal-belt, in-nies ta’ Sodoma, miż-żgħir sal-kbir, il-poplu kollu minn kull naħa, dawru d-dar.

⁵U sejħu lil Lot u qalulu: “Fejn huma n-nies li daħlu għandek illejla? Oħroġhomlna, ħalli ninqdew bihom.”

⁶Lot ħareġ għalihom ħdejn il-bieb, u għalaq il-bieb warajh.

⁷U mbagħad qalilhom: “Le, ħuti, tagħmlux id-deni.

⁸Araw, jien għandi żewġt ibniet li għadu ma għarafhom ħadd, ħa noħroġhomlkom it-tnejn u għamlulhom kulma jogħġobkom f’għajnejkom. Imma lil dawn l-irġiel la tagħmlulhom xejn, la darba daħlu għall-kenn tas-saqaf tiegħi.”

⁹Imma huma qalulu: “Warrab minn hawn.” U bdew jgħidu: “Dan ġie frustier f’nofsna, u issa jrid jagħmilha ta’ mħallef! Nagħmlulek agħar minnhom.” U ħebbu għal Lot b’kemm kellhom saħħa, u kienu għoddhom kissru l-bieb.

¹⁰Imma l-irġiel meddew idejhom, u daħħlu lil Lot fid-dar, u sakkru l-bieb.

¹¹U l-irġiel li kienu ħdejn il-bieb għamewhom ilkoll, miż-żgħir sal-kbir, u dawn għejew ifittxu l-bieb.

¹²U l-irġiel qalu lil Lot: “Lil min fadallek aktar? Ħatnek, uliedek, subien u bniet, u kulma għandek fil-belt, oħroġhom minn dan il-post.

¹³Għax aħna se neqirdu dan il-post, għax l-għajta tagħhom kbira waslet quddiem il-Mulej u għalhekk bagħatna l-Mulej biex neqirduha.”

¹⁴U ħareġ Lot u qal liż-żewġt irġiel, li kienu żżewġu liż-żewġt ibniet tiegħu: “Qumu, oħorġu minn hawn, għax il-Mulej se jeqred il-belt.” Imma ħtienu dehrilhom li qiegħed jiċċajta.

¹⁵Malli beda jisbaħ, l-anġli bdew jgħaġġlu lil Lot u jgħidulu: “Qum, aqbad lil martek u ż-żewġt ibniet tiegħek, li hawn miegħek, li ma tinqeridx fil-kastig tal-belt.”

¹⁶U beda jitnikker; imma l-irġiel qabduh minn idu, lilu, lil martu u ż-żewġt ibniet tiegħu, minħabba l-ħniena tal-Mulej għalih; u ħarġuh, u wassluh ’il barra mill-belt.

¹⁷U malli ħarġuhom ’il barra qalulhom: “Aħrab, għax hemm ħajtek fin-nofs. La tħarisx warajk u anqas tieqaf imkien f’dawn l-inħawi. Aħrab lejn l-għoljiet li ma tinqeridx.”

¹⁸U Lot qalilhom: “Le, Sidi.

¹⁹Ara, s’issa sab ħniena f’għajnejk il-qaddej tiegħek, u kbira l-ħniena li wrejt miegħi biex salvajtli ħajti. Imma jiena ma nistax naħrab lejn l-għoljiet bla ma tilħaqni l-ħsara u mmut.

²⁰Ara, hawn din il-belt fil-qrib, ħa nistkenn hemm, belt żgħira hi. Ħalli naħrab u nistkenn hemm - mhix belt żgħira? - u nsalva ħajti.”

²¹U wieġbu: “Ara jien se naqtagħlek xewqtek f’din il-ħaġa wkoll; m’iniex se neqred il-belt li għedtli.

²²Fittex aħrab hemmhekk, għax ma nista’ nagħmel xejn qabel ma tasal hemm.” Għalhekk semmew dik il-belt Sogħar[24].

²³U x-xemx kienet tielgħa fuq l-art, meta Lot wasal Sogħar.

²⁴U l-Mulej bagħat ix-xita fuq Sodoma u Gomorra, xita ta’ kubrit u nar mis-smewwiet mingħand il-Mulej.

²⁵U qered dawk l-ibliet u l-inħawi kollha ta’ madwarhom, u ’l kull min kien jgħammar fihom, u l-ħdura kollha tal-art.

²⁶U l-mara ta’ Lot ħarset lura, minn warajh, u saret plier tal-melħ.

²⁷U Abraham qam filgħodu kmieni u rħielha lejn il-post fejn kien qagħad quddiem il-Mulej.

²⁸U ħares lejn Sodoma u Gomorra[25], u fuq l-art kollha ta’ madwarhom, u ra li kien tiela’ duħħan mill-art, bħad-duħħan ta’ forn.

²⁹Meta Alla qered l-ibliet tal-wita, Alla ftakar f’Abraham u ħareġ lil Lot minn nofs il-qerda, meta qered l-ibliet, li fihom kien jgħammar Lot.

³⁰U Lot tala’ minn Sogħar, u mar jgħammar fuq l-għoljiet maż-żewġ uliedu bniet, għax baża’ jgħammar f’Sogħar. U kienu jgħixu f’għar, hu u ż-żewġt ibniet tiegħu.

³¹U l-kbira qalet liż-żgħira: “Missierna xjieħ, u ma hawn ebda raġel biex jersaq lejna skont id-drawwa tal-art kollha.

³²Ejja nisqu l-inbid lil missierna u norqdu miegħu, u nżommu n-nisel ħaj minn missierna.”

³³U sqew l-inbid lil missierhom dak il-lejl stess, u l-kbira resqet lejh, u mteddet ma’ missierha, u dan ma ntebaħx biha, la meta mteddet u lanqas meta qamet.

³⁴U l-għada l-kbira qalet liż-żgħira: “Ara, jien imteddejt ma’ missieri l-lejl l-ieħor, ħa nisquh l-inbid illejla wkoll, u mur inti mtedd miegħu, u hekk inżommu n-nisel ħaj minn missierna.”

³⁵U dak il-lejl ukoll sqew l-inbid lil missierhom, u ż-żgħira qamet u marret imteddet miegħu, u hu ma ntebaħx biha, la meta raqdet u lanqas meta qamet.

³⁶U ż-żewġt ibniet ta’ Lot tqalu minn missierhom.

³⁷U l-kbira wildet iben u semmietu Mowab - missier il-Mowabin sal-lum.

³⁸U ż-żgħira wkoll wildet iben u semmietu Bin-għammi - missier l-Għammonin sal-lum.