Read Maltese Bible with DC – IL-BIBBJA IL-KOTBA MQADDSA ĠENESI 21 Bible Online

ĠENESI 21 - Maltese Bible with DC – IL-BIBBJA IL-KOTBA MQADDSA bible

ĠENESI 21

¹U l-Mulej żar lil Sara bħalma kien qalilha, u għamel magħha dak li kien wegħedha.

²U Sara tqalet u wildet iben lil Abraham fi xjuħitu, fiż-żmien li kien qallu Alla.

³U Abraham semma ’l ibnu li twelidlu, li kienet wilditlu Sara, Iżakk.

⁴U Abraham ħaten lil Iżakk meta kellu tmint ijiem, bħalma kien ordnalu Alla.

⁵U Abraham kellu mitt sena meta twelidlu ibnu Iżakk.

⁶U Sara qalet: “Ġiebli t-tbissima Alla; kull min jisma’ jitbissimli.”

⁷U żiedet tgħid: “Min kellu jgħidlu lil Abraham, li Sara kellha t-tfal! Għax wilidtlu iben fi xjuħitu.”

⁸U t-tarbija kibret, u nfatmet. U Abraham għamel ikla kbira f’jum il-ftim ta’ Iżakk.

⁹U Sara lemħet lil bin Ħagar, l-Eġizzjana, dak li kienet wildet lil Abraham, jilgħab ma’ Iżakk binha.

¹⁰U qalet lil Abraham: “Keċċihom ’il barra, lil din il-qaddejja u ’l binha. Għax ma għandux bin din il-qaddejja jaqsam il-wirt ma’ ibni Iżakk.”

¹¹U din il-ħaġa ma għoġbot xejn lil Abraham minħabba ibnu.

¹²U Alla qal lil Abraham: “La tinkwetax għaż-żagħżugħ u għall-qaddejja; kulma qaltlek Sara, isma’ minn kliemha, għax b’Iżakk jissemma nislek.

¹³U bin il-qaddejja wkoll, nagħmel minnu ġens, għax hu nislek.”

¹⁴U Abraham bakkar filgħodu, qabad il-ħobż u żaqq ilma, u tahom lil Ħagar, qegħedhomlha fuq spallejha, u bagħatha bit-tifel magħha. U telqet tiġġerra fid-deżert ta’ Birsaba.

¹⁵Meta ntemm l-ilma taż-żaqq telqet it-tifel taħt waħda mis-siġar,

¹⁶u marret toqgħod biswitu daqs tefgħa ta’ qaws ’il bogħod, għax qalet: “Ma rridx narah imut.” U kif kienet bilqiegħda biswitu, għolliet leħenha u bkiet.

¹⁷U Alla sama’ leħen it-tifel, u l-anġlu ta’ Alla sejjaħ lil Ħagar mis-sema, u qalilha: “X’għandek Ħagar? La tibżax. Alla sama’ leħen it-tifel, minn fejn hu qiegħed.

¹⁸Qum. Aqbad it-tifel, u agħmel il-qalb bih, għax jien sa nagħmlu ġens kbir.”

¹⁹Imbagħad Alla fetħilha għajnejha u rat bir ilma. U marret u mliet iż-żaqq bl-ilma u sqiet it-tifel.

²⁰U Alla kien maż-żagħżugħ, u dan kiber, u kien jgħammar fid-deżert, u kien jinqala’ għall-qaws.

²¹Kien jgħammar fid-deżert ta’ Faran. U ommu kisbitlu mara mill-Eġittu.

²²U ġara li dak iż-żmien Abimelek u Fikol, il-kmandant tal-eżerċtu tiegħu, kellmu lil Abraham u qalulu: “Alla miegħek f’kulma tagħmel.

²³Mela issa: Aħlifli hawn b’Alla li int ma tqarraqx la bija u lanqas b’uliedi jew b’nisli; bħalma jiena mxejt sewwa miegħek, hekk inti issa tagħmel miegħi u ma’ arti, li int qiegħed tgħix fiha bħala frustier.”

²⁴U Abraham wieġeb: “Naħliflek.”

²⁵Imma Abraham tlewwem ma’ Abimelek minħabba bir ilma, li kienu serqulu l-qaddejja ta’ Abimelek.

²⁶U Abimelek qallu: “Ma nafx min għamel ħaġa bħal din. U anqas int ma għarraftni, u jien ma smajtx ħlief illum.”

²⁷U Abraham ħa nagħġa u baqra, u tahom lil Abimelek u t-tnejn għamlu patt bejniethom.

²⁸U Abraham warrab għalihom sebat iħrief mill-merħla.

²⁹U Abimelek qal lil Abraham: “X’inhuma dawn is-sebat iħrief, li int warrabt għalihom?”

³⁰U hu wieġbu: “Dawn is-sebat iħrief li tieħu minn idejja, ikunu ta’ xhieda li jien ħaffirt dan il-bir.”

³¹Għalhekk semma dak il-post Birsaba[27], għax hemm ħalfu huma t-tnejn.

³²U għamlu patt f’Birsaba. U Abimelek u Fikol, il-kmandant tal-eżerċtu tiegħu, qamu minn hemm u reġgħu lura lejn art il-Filistin.

³³U Abraham ħawwel tamarisk f’Birsaba, u hemm sejjaħ isem il-Mulej, El-għolam, Alla ta’ dejjem[28].

³⁴U baqa’ jgħammar hemm għal ħafna żmien bħala frustier f’art il-Filistin.