Read Maltese Bible with DC – IL-BIBBJA IL-KOTBA MQADDSA ĠENESI 23 Bible Online

ĠENESI 23 - Maltese Bible with DC – IL-BIBBJA IL-KOTBA MQADDSA bible

ĠENESI 23

¹U Sara laħqet l-għomor ta’ mija u sebgħa u għoxrin sena. Dawn kienu s-snin ta’ ħajjet Sara.

²U mietet Sara f’Kirjat-arba, li hi Ħebron, fl-art ta’ Kangħan. Abraham daħal jagħmel il-vistu għal Sara u jibkiha.

³Imbagħad Abraham qam minn quddiem il-mejta, u mar ikellem lil ulied Ħet[30] u qalilhom:

⁴“Jien qiegħed ngħix magħkom, ta’ barrani u frustier. Agħtuni li jkolli qabar magħkom, u nidfen il-mejta tiegħi minn quddiemi.”

⁵U wlied Ħet wieġbu lil Abraham u qalulu:

⁶“Ismagħna, sidi, int prinċep minn Alla fostna. Fl-aħjar tal-oqbra tagħna idfen il-mejta tiegħek. Ħadd minna ma hu se jiċħadlek li tidfen il-mejta tiegħek f’qabru.”

⁷Imma Abraham qam, inxteħet wiċċu fl-art quddiem in-nies tal-pajjiż, quddiem ulied Ħet.

⁸U kellimhom u qalilhom: “Jekk intom tixtiequ minn qalbkom li tidfnu l-mejta tiegħi minn quddiemi, isimgħuni, u idħlu għalija quddiem Għefron bin Soħar,

⁹ħa jagħtini l-għar tiegħu fl-għalqa tiegħu ta’ Makfela. Jagħtihieli b’kemm tiswa flus hawn quddiemkom, biex tkun tiegħi u nagħmel qabar.”

¹⁰U Għefron kien qiegħed f’nofs ulied Ħet. Wieġeb Għefron il-Ħitti lil Abraham li jisimgħuh il-Ħittin, li kienu deħlin mill-bieb[31] ta’ beltu, u qallu:

¹¹“Le, Sidi, ismagħni. L-għalqa nagħtihielek, u l-għar li hemm fiha nagħtihulek ukoll, nagħtihielek taħt għajnejn il-poplu tiegħi, u idfen il-mejta tiegħek.”

¹²U Abraham inxteħet wiċċu fl-art quddiem in-nies tal-pajjiż,

¹³u kellem lil Għefron li jisimgħuh in-nies tal-pajjiż u qallu: “Li kont tismagħni int ukoll! Jien lest inħallas il-flus tal-għalqa. Ħudhom mingħandi, u jien nidfen il-mejta tiegħi fiha.”

¹⁴U Għefron wieġeb lil Abraham u qallu:

¹⁵“Ismagħni, Sidi, l-art tiswa erba’ mitt xekel tal-fidda; x’inhi din is-somma bejni u bejnek? Mur idfen il-mejta tiegħek.”

¹⁶U Abraham sama’ minn Għefron; u wiżen Abraham lil Għefron il-fidda li kien qallu hekk li jisimgħuh ulied Ħet; erba’ mitt xekel tal-fidda li jiġru f’idejn in-neguzjanti.

¹⁷Hekk l-għalqa ta’ Għefron, li tinsab f’Makfela, biswit Mamri, l-għalqa u l-għar li hemm fiha, u s-siġar kollha li hemm fl-għalqa madwarha kollu,

¹⁸għaddiet f’idejn Abraham b’xiri li sar taħt għajnejn ulied Ħet, quddiem dawk kollha li kienu deħlin mill-bieb tal-belt tiegħu.

¹⁹Wara dan, imbagħad, Abraham difen lil Sara, martu, fl-għar tal-għalqa ta’ Makfela biswit Mamri, li hi Ħebron, fl-art ta’ Kangħan.

²⁰U għaddiet l-għalqa bl-għar li kien hemm fiha minn idejn ulied Ħet għal idejn Abraham, biex tkun tiegħu bħala post għad-dfin.