Read Maltese Bible with DC – IL-BIBBJA IL-KOTBA MQADDSA ĠENESI 24 Bible Online

ĠENESI 24 - Maltese Bible with DC – IL-BIBBJA IL-KOTBA MQADDSA bible

ĠENESI 24

¹Abraham kien xjieħ u mdaħħal fiż-żmien, u l-Mulej kien bierku f’kollox.

²U Abraham qal lill-qaddej tiegħu, l-ixjeħ f’daru, li kien jeħodlu ħsieb ta’ kulma kellu: “Agħmel idek taħt kuxxtejja[32],

³u nġagħlek taħlifli bil-Mulej Alla tas-sema u l-art, li ma tiħux mara għal ibni mill-bniet tal-Kangħanin, li jien qiegħed ngħammar f’nofshom.

⁴Imma tmur f’arti, u għand niesi, u ħu minn hemm mara għal ibni Iżakk.”

⁵U l-qaddej wieġbu: “U jekk il-mara ma tkunx trid tiġi miegħi, f’din l-art, ikolli nerġa’ nieħu lil ibnek fl-art li minnha int ħriġt?” U Abraham wieġbu:

⁶“Qis li ma tiħux lil ibni hemmhekk.

⁷Il-Mulej, Alla fis-smewwiet, li ħadni minn dar missieri u minn art twelidi, u li kellimni u ħalifli u qalli: ‘Lil nislek nagħti din l-art,’ jibgħat l-anġlu tiegħu quddiemek u int tieħu mara għal ibni minn hemm.

⁸U jekk il-mara ma tkunx trid tiġi miegħek, int tkun maħlul minn din il-ħalfa tiegħi. Biss lil ibni teħdux hemmhekk.”

⁹U l-qaddej għamel idu taħt kuxxtejn Abraham sidu u ħaliflu fuq dan il-kliem.

¹⁰U l-qaddej ħa għaxar iġmla mill-iġmla ta’ sidu, u l-aħjar mill-ġid ta’ sidu f’idejh; qam u telaq lejn Aram-naħarajm[33], lejn il-belt ta’ Naħor.

¹¹U serraħ l-iġmla barra l-belt ħdejn bir tal-ilma għall-ħabta ta’ filgħaxija meta n-nisa joħorġu jimlew l-ilma.

¹²U qal: “Mulej, Alla ta’ sidi Abraham, agħtini r-riżq illum, nitolbok, u uri t-tjieba ma’ sidi Abraham.

¹³Hawn jien wieqaf ħdejn l-għajn tal-ilma u l-bniet tan-nies tal-belt ħerġin jimlew l-ilma.

¹⁴Agħmel li ż-żagħżugħa li ngħidilha: ‘Niżżel il-qolla tiegħek biex nixrob,’ u tgħidli: ‘Ixrob int, u jien nisqi l-iġmla tiegħek ukoll,’ tkun hi li int tkun għażilt għall-qaddej tiegħek Iżakk. Minn dan inkun naf li int urejt it-tjieba ma’ sidi.”

¹⁵U ġara li qabel ma temm jitkellem, hemm hi, Rebekka, li kienet twieldet lil Betwel bin Milka, mart Naħor, ħu Abraham, ħierġa biex timla l-ilma, bil-qolla fuq spallitha.

¹⁶U ż-żagħżugħa kienet sabiħa ħafna fil-għajn, xebba li ebda raġel ma kien għadu għarafha; u niżlet fl-għajn u mliet il-qolla tagħha, u telgħet.

¹⁷U l-qaddej mar jiġri jilqagħha u qalilha: “Jekk jogħġbok, ħallini nixrob qatra ilma mill-qolla tiegħek.”

¹⁸U hi qaltlu: “Ixrob, sidi,” u niżżlet minnufih il-qolla f’idha, u sqietu.

¹⁹Malli temmet tisqih qaltlu: “Ħa nimla wkoll għall-iġmla tiegħek, sakemm jixorbu sa jixbgħu.”

²⁰U minnufih ferrgħet il-qolla fil-ħawt, u reġgħet ġriet lejn il-bir biex timla, u mliet għall-iġmla kollha.

²¹U r-raġel baqa’ jħares lejha sieket biex jara jekk il-Mulej tahx ir-risq fi triqtu jew le.

²²U malli l-iġmla xebgħu jixorbu r-raġel ħa ħolqa tad-deheb tiżen nofs xekel, u żewġ brazzuletti għal idejha jiżnu għaxar xwiekel deheb,

²³U staqsieha: “Bint min int? Għidli, jekk jogħġbok, jekk hemmx post għalina f’dar missierek biex ngħaddu l-lejl.”

²⁴U hi weġbitu: “Jien bint Betwel bin Milka, li wildet lil Naħor.”

²⁵U żiedet tgħidlu: “Għandna t-tiben u ħafna għalf, u post ukoll fejn tgħaddu l-lejl.”

²⁶U r-raġel niżżel wiċċu fl-art u qiem lill-Mulej, u

²⁷qal: “imbierek il-Mulej, Alla ta’ sidi Abraham, li ma warrabx it-tjieba u l-fedeltà tiegħu minn ma’ sidi Abraham! U lili, mexxieni l-Mulej fi triqti lejn dar ħu sidi.”

²⁸U ż-żagħżugħa marret tiġri tgħarraf lil dar ommha b’dawn il-ħwejjeġ.

²⁹Rebekka kellha ħuha jismu Laban, u dan Laban mar jiġri ’l barra għal ħdejn ir-raġel ħdejn l-għajn.

³⁰U malli ra l-ħolqa u l-brazzuletti fuq idejn oħtu u malli sama’ kliem Rebekka oħtu tgħid: “Dan qalli r-raġel,” mar ħdejn ir-raġel u sabu wieqaf bl-iġmla ħdejn l-għajn.

³¹U qallu: “Idħol ġewwa, imbierek mill-Mulej! Għala bqajt barra? Jien lestejt id-dar u l-post għall-iġmla.”

³²U r-raġel daħal id-dar; u Laban ħatt l-iġmla, u tahom it-tiben u l-għalf. U tah l-ilma biex jaħsel riġlejh, u riġlejn in-nies li kellu miegħu.

³³U qegħdulu quddiemu biex jiekol, iżda hu qal: “Ma nikolx, qabel ma ngħid li għandi ngħid.” U qallu: “Tkellem.”

³⁴U hu qal: “Jien il-qaddej ta’ Abraham.

³⁵Il-Mulej bierek bis-sħiħ lil sidi u kabbru. Tah imrieħel u baqar, fidda u deheb, irġiel u nisa lsiera, u iġmla u ħmir.

³⁶U Sara mart sidi wildet iben lil sidi fi xjuħitha, u tah kulma għandu.

³⁷U sidi ġagħalni naħliflu u qalli: “La tiħux mara għal ibni mill-bniet tal-Kangħanin, li qiegħed ngħammar f’arthom,

³⁸Imma mur dar missieri, u għand qrabati, u ħu mara għal ibni minn hemm.

³⁹U jien għedt lil sidi: ‘U jekk il-mara ma tkunx trid tiġi miegħi?’

⁴⁰U hu weġibni: ‘Il-Mulej, li jien imxejt quddiemu, jibgħat l-anġlu tiegħu miegħek u jagħtik ir-risq fi triqtek u tieħu mara lil ibni minn niesi u dar missieri.

⁴¹Imbagħad tkun maħlul mill-ħalfa tiegħi, meta tkun mort għand qrabati; u mqar jekk ma jagħtuhilekx, tkun maħlul mill-ħalfa.’

⁴²U llum wasalt ħdejn l-għajn u għedt: ‘Mulej, Alla ta’ sidi Abraham, jekk int issa se tagħtini r-riżq fit-triq li qbadt,

⁴³hawn jien wieqaf ħdejn l-għajn tal-ilma, iż-żagħżugħa li toħroġ timla l-ilma u ngħidilha: ‘Isqini qatra ilma mill-qolla tiegħek,’

⁴⁴u hi tgħidli: ‘Ixrob int u jien nimla għall-iġmla tiegħek ukoll,’ ħa tkun hi l-mara li l-Mulej għażel għal bin sidi.’

⁴⁵Kont għadni lanqas temmejt kliemi f’qalbi, li ma ħarġitx Rebekka bil-qolla fuq spallitha u niżlet lejn l-għajn u mliet l-ilma. U jien għedtilha: ‘Agħtini nixrob, jekk jogħġbok.’

⁴⁶U minnufih niżżlet il-qolla minn fuqha u qaltli: ‘Ixrob, u nisqi l-iġmla tiegħek ukoll.’ U jiena xrobt u hi sqiet l-iġmla wkoll.

⁴⁷“Imbagħad jien staqsejtha: ‘Bint min int?’ u hi wieġbet: ‘Bint Betwel bin Naħor, li wilditlu Milka’, u jien qegħedtilha l-ħolqa f’imneħirha u l-brazzuletti f’dirgħajha.

⁴⁸Imbagħad inżilt wiċċi fl-art, u qimt lill-Mulej; u berikt lill-Mulej, Alla ta’ sidi Abraham, li mexxieni fit-triq it-tajba biex nieħu bint ħu sidi għal ibnu.

⁴⁹Issa jekk intom tridu turu t-tjieba u tagħmlu s-sewwa ma’ sidi, għiduli: jekk le għiduli wkoll, sabiex indur lejn il-lemin jew lejn ix-xellug.”

⁵⁰U weġbuh Laban u Betwel u qalulu: “Mill-Mulej ġejja din il-ħaġa. Ma nistgħux ngħidulek tajjeb jew ħażin.

⁵¹Hawn hi Rebekka quddiemek, ħudha u mur; u tkun hi l-mara għal bin sidek bħalma qal il-Mulej.”

⁵²U malli l-qaddej ta’ Abraham sama’ kliemhom, niżel wiċċu fl-art u qiem lill-Mulej.

⁵³U mbagħad il-qaddej ħareġ ħwejjeġ tal-fidda u ħwejjeġ tad-deheb, u lbiesi, u tahom lil Rebekka. U ta wkoll ħwejjeġ jiswew lil ħuha u lil ommha.

⁵⁴U kielu u xorbu, hu u n-nies li kellu miegħu; u raqdu u qamu filgħodu kmieni, u hu qalilhom: “Ħalluni mmur għal għand sidi.”

⁵⁵U ħuha u ommha qalulu: “Ħa toqgħod iż-żagħżugħa għal ftit, imqar għaxart ijiem; imbagħad titlaq.”

⁵⁶Imma hu qalilhom: “La ddewmunix, la darba l-Mulej ta r-riżq lil triqti, ibagħtuni ħa mmur għand sidi.”

⁵⁷U huma weġbuh: “Ħa nsejħu liż-żagħżugħa, u nsaqsuha xi tgħid.”

⁵⁸U sejħu lil Rebekka u staqsewha: “Trid tmur ma’ dan ir-raġel?” u wieġbet: “Immur.”

⁵⁹Imbagħad bagħtu lil Rebekka oħthom u l-imraddgħa tagħha, u l-qaddej ta’ Abraham u n-nies tiegħu.

⁶⁰U bierku lil Rebekka u qalulha: “Inti oħtna, jalla tkun eluf fuq eluf; u jiret nislek bwieb l-għedewwa tiegħu!”

⁶¹U qamet Rebekka u l-qaddejja tagħha u rikbu fuq l-iġmla u telqu mar-raġel. U l-qaddej ħa lil Rebekka u telaq.

⁶²U Iżakk kien mar Bir-laħaj-roj, għax kien joqgħod fl-art tan-Negeb.

⁶³U Iżakk kien ħareġ jistrieħ fir-raba’ għall-ħabta ta’ filgħaxija, u rafa’ għajnejh, u ħares, u ra l-iġmla resqin.

⁶⁴U Rebekka refgħet għajnejha u rat lil Iżakk, u niżlet minn fuq il-ġemel.

⁶⁵U qalet lill-qaddej: “Min hu dak ir-raġel li ġej fir-raba’ jiltaqa’ magħna?” u weġibha l-qaddej: “Dak sidi.” U qabdet l-istar u tgħattiet bih.

⁶⁶U l-qaddej qal lil Iżakk kulma kien għamel.

⁶⁷U Iżakk daħħalha fl-għarix ta’ Sara ommu, u ħa ’l Rebekka u saret martu u ħabbha; u hekk tfarraġ Iżakk wara l-mewt ta’ ommu.