Read Maltese Bible with DC – IL-BIBBJA IL-KOTBA MQADDSA ĠENESI 25 Bible Online

ĠENESI 25 - Maltese Bible with DC – IL-BIBBJA IL-KOTBA MQADDSA bible

ĠENESI 25

¹U Abraham kompla ħa mara oħra, li kien jisimha Ketura.

²U din wilditlu ’l Żimran, ’il Ġoksan, ’il Medan, ’il Midjan, ’il Isbak, u ’l Suwaħ.

³Ġoksan wiled ’il Seba, u ’l Dedan. Ulied Dedan kienu l-Assurin, il-Letusin, u l-Lewmin.

⁴Ulied Midjan kienu Għefa, Għefer, Ħanok, Abida u Eldagħa. Dawn kollha kienu wlied Ketura.

⁵Abraham ta ġidu kollu lil Iżakk;

⁶u lil ulied il-konkubini tiegħu tahom xi rigali, u meta kien għadu ħaj bagħathom ’il bogħod minn ibnu Iżakk lejn il-Lvant, fl-art tal-Lvant.

⁷U dawn huma s-snin ta’ ħajjet Abraham; għex mija u ħamsa u sebgħin sena.

⁸U Abraham ħa l-aħħar nifs u miet, wara xjuħija sewwa, xiħ mimli bil-għomor, u nġabar ma’ niesu.

⁹U difnuh Iżakk u Ismagħel uliedu fl-għar ta’ Makfela, fl-għalqa ta’ Għefron bin Soħar il-Ħitti, li hemm biswit Mamri,

¹⁰l-għalqa li kien xtara Abraham mingħand ulied Ħet. Hemm kienu midfuna Abraham u Sara martu.

¹¹U wara l-mewt ta’ Abraham, Alla bierek lil Iżakk ibnu, u Iżakk mar joqgħod f’Bir-laħaj-roj.

¹²U dan hu nisel Ismagħel bin Abraham, li kienet wilditlu Ħagar l-Eġizzjana, il-qaddejja ta’ Sara.

¹³U dawn huma l-ismijiet ta’ wlied Ismagħel, b’isimhom skont twelidhom: Nebajot, il-kbir; Kedar, Adbel, Mibsam,

¹⁴Misma, Duma, Massa,

¹⁵Ħadad, Tema, Ġetur, Nafis u Kedma.

¹⁶Dawn huma wlied Ismagħel u ismijiethom fl-irħula tagħhom u fl-għerejjex tagħhom, tnax-il prinċep tat-tribujiet tagħhom.

¹⁷U dawn huma s-snin ta’ ħajjet Ismagħel: mija u sebgħa u tletin sena. U ħa l-aħħar nifs u miet, u ngħaqad ma’ niesu.

¹⁸U għammru minn Ħawila sa Sur, li tinsab biswit l-Eġittu, fit-triq lejn l-Assirja, u kull wieħed minnhom baqa’ jeħodha kontra ħutu.

¹⁹U dan hu n-nisel ta’ Iżakk bin Abraham. Abraham wiled lil Iżakk.

²⁰U Iżakk kellu erbgħin sena meta ħa b’martu lil Rebekka, bint Betwel l-Arami minn Fiddien-aram, oħt Laban l-Arami.

²¹U Iżakk talab lill-Mulej għal martu għax kienet sterili u l-Mulej sama’ talbu, u Rebekka martu tqalet.

²²U t-trabi kienu jissaraw bejniethom f’ġufha; u hi qalet: “Jekk inhu hekk, x’se jkun minni?” U marret tistħarreġ lill-Mulej.

²³U l-Mulej qalilha: “Hemm żewġ ġnus f’ġufek, u żewġ popli jinfirdu minn ġewwinik; u poplu jegħleb poplu ieħor, u l-kbir jaqdi liż-żgħir.”

²⁴U ż-żmien għall-ħlas għalqilha, u nstabu żewġ tewmin f’ġufha.

²⁵U twieled l-ewwel wieħed, ħamrani, u kellu bħal mantar tas-suf fuq ġismu kollu, u semmewh Għesaw.

²⁶U wara dan twieled ħuh, b’idu mqabbda ma’ għarqub Għesaw, u semmewh Ġakobb. U Iżakk kellu sittin sena meta tweldulu dawn.

²⁷U t-tfal kibru, u Għesaw kien kaċċatur tas-sengħa, raġel tar-raba’ imma Ġakobb kien raġel kwiet, jgħix fl-għerejjex.

²⁸U Iżakk kien iħobb lil Għesaw, għax il-kaċċa kienet togħġbu, u Rebekka kienet tħobb lil Ġakobb.

²⁹U Ġakobb kien qiegħed isajjar it-tisjir, u Għesaw daħal għajjien mir-raba’.

³⁰U Għesaw qal lil Ġakobb: “Ħallini niekol, jekk jogħġbok, minn dan l-ikel ħamrani għax jien għajjien. (Għalhekk bdew isejħulu Edom[34]).

³¹U Ġakobb qallu: “Begħli llum il-primoġenitura[35] tiegħek.”

³²U Għesaw wieġbu: “Arani, jien se mmut. X’nagħmel biha din il-primoġenitura?”

³³U Ġakobb qallu: “Aħlifli issa.” U ħaliflu, u b’hekk biegħ il-primoġenitura lil Ġakobb.

³⁴U Ġakobb ta lil Għesaw ħobż u għads, u dan kiel u xorob, qam u telaq. Il-primoġenitura Għesaw ma stmaha xejn.