Read Maltese Bible with DC – IL-BIBBJA IL-KOTBA MQADDSA ĠENESI 28 Bible Online

ĠENESI 28 - Maltese Bible with DC – IL-BIBBJA IL-KOTBA MQADDSA bible

ĠENESI 28

¹U Iżakk sejjaħ lil Ġakobb u bierku, ordnalu u qallu: “La tiħux mara mill-bniet ta’ Kangħan.

²Qum u mur Fiddien-aram fid-dar ta’ Betwel, missier ommok, u ħu mara minn hemm, minn fost il-bniet ta’ Laban, ħu ommok.

³U El-Xaddaj ibierkek, ikattrek u jkabbrek, u ssir ġemgħa ta’ ġnus.

⁴U jagħtik il-barka ta’ Abraham, lilek u lil nislek miegħek, biex tiret l-art fejn int frustier, li Alla ta lil Abraham.”

⁵U Iżakk bagħat lil Ġakobb, u dan telaq lejn Fiddien-aram għand Laban bin Betwel l-Arami, ħu Rebekka, omm Ġakobb u Għesaw.

⁶U Għesaw ra li Iżakk bierek lil Ġakobb, u li bagħtu f’Fiddien-aram biex jieħu mara minn hemm, u meta kien ibierku ordnalu u qallu: “La tiħux mara minn fost il-bniet ta’ Kangħan.”

⁷U Ġakobb sama’ minn missieru u ommu, u mar Fiddien-aram.

⁸U ra wkoll Għesaw li l-bniet ta’ Kangħan kienu jidhru koroh f’għajnejn Iżakk missieru.

⁹Għalhekk Għesaw mar għand Ismagħel, u, barra n-nisa li diġà kellu, ħa b’martu lil Maħalat, bint Ismagħel bin Abraham, oħt Nebajot.

¹⁰U Ġakobb ħareġ minn Birsaba u telaq lejn Ħaran.

¹¹U wasal f’post sagru[38], u waqaf biex jgħaddi l-lejl, għax ix-xemx kienet niżlet, u ħa waħda mill-ħaġar li kien hemm u għamilha mħadda għal rasu, u raqad f’dak il-post sagru.

¹²U ħolom, u ra sellum wieqaf fl-art bil-quċċata tiegħu fis-sema[39]; u beda jara l-anġli telgħin u niżlin miegħu.

¹³U lemaħ il-Mulej wieqaf ħdejh, u dan qallu: “Jien il-Mulej, Alla ta’ Abraham, missierek, u Alla ta’ Iżakk. L-art li int rieqed fuqha lilek nagħtiha u lil nislek.

¹⁴U jkun nislek bħat-trab tal-art, u int għad tinfirex lejn il-Punent u lejn il-Lvant, lejn it-Tramuntana u lejn in-Nofsinhar u jitbierku bik u bin-nisel tiegħek it-tribujiet kollha tal-art.

¹⁵Arani, jien miegħek u nħarsek kull fejn tmur, u nerġa’ nġibek f’din l-art, għax jien ma nitilqekx qabel ma ntemm kulma għedtlek.”

¹⁶Imbagħad stenbaħ Ġakobb mir-raqda tiegħu u qal: “Tassew hawn Alla f’dan il-post, u jien ma ntbaħtx.”

¹⁷U beża’ u qal: “Kemm hu tal-biża’ dan il-post sagru. Dan mhux ħlief dar Alla, u dan bieb is-smewwiet!”

¹⁸U Ġakobb qam kmieni filgħodu, u ħa l-ħaġra li kien qiegħed taħt rasu, u waqqafha bħala plier[40], u sawwab iż-żejt fuq rasha.

¹⁹U semma dak il-post Betel, dar Alla, waqt li qabel il-belt kien jisimha Luż.

²⁰U Ġakobb għamel wegħda u qal: “Jekk Alla jkun miegħi, u jħarisni fit-triq li jien qbadt, u jipprovdili ħobż x’niekol u lbies x’nilbes,

²¹u nerġa’ lura bis-sliema lejn dar missieri, Alla tiegħi jkun il-Mulej.

²²U din il-ħaġra, li jien waqqaft bħala plier, tkun Dar Alla, u minn kulma tagħtini, nagħtik l-għexur.”