Read Maltese Bible with DC – IL-BIBBJA IL-KOTBA MQADDSA ĠENESI 29 Bible Online

ĠENESI 29 - Maltese Bible with DC – IL-BIBBJA IL-KOTBA MQADDSA bible

ĠENESI 29

¹Imbagħad Ġakobb iċċaqlaq, u telaq lejn art in-nies tal-Lvant.

²U ħares, u lemaħ bir f’għalqa, u kien hemm tliet imrieħel nagħaġ mimduda ħdejh; għax minn dak il-bir kienu jisqu l-imrieħel; imma l-blata fuq il-ħerża tal-bir kienet kbira wisq.

³U kienu jinġabru hemm l-imrieħel kollha, u mbagħad jaqilbu l-blata minn fuq ix-xifer tal-bir, u jisqu l-imrieħel, u jerġgħu jqiegħdu l-blata f’postha fuq xifer il-bir.

⁴U Ġakobb qalilhom: “L-aħwa tiegħi, minn fejn intom?” U huma weġbuh: “Minn Ħaran aħna!”

⁵U staqsiehom: “Tafu intom lil Laban bin Naħor?” U huma weġbuh: “Nafuh.”

⁶U qalilhom: “Jinsab tajjeb?” U qalulu: “Tajjeb. Ara, bintu Rakel ġejja bil-merħla!”

⁷U qalilhom: “Araw il-jum għadu fl-aqwa tiegħu, mhux ħin li jinġabru l-imrieħel. Isqu n-nagħaġ, u morru irgħuhom.”

⁸U huma qalulu: “Ma nistgħux qabel ma jinġabru l-imrieħel kollha, u jaqilbu l-blata minn fuq il-ħerża tal-bir, u mbagħad nisqu l-imrieħel.”

⁹Kien għadu jitkellem magħhom, meta Rakel waslet bin-nagħaġ ta’ missierha, għax kienet ragħajja.

¹⁰U malli Ġakobb ra lil Rakel bint Laban, ħu ommu, u l-imrieħel ta’ Laban, ħu ommu, Ġakobb resaq u qaleb il-blata minn fuq il-ħerża tal-bir, u seqa l-merħla ta’ Laban, ħu ommu.

¹¹U Ġakobb bies lil Rakel, u għolla leħnu u beka.

¹²U Ġakobb għarraf lil Rakel li hu kien ħu missierha u bin Rebekka. U hi telqet tiġri tagħti l-aħbar lil missierha.

¹³U ġara li malli Laban sama’ bl-aħbar ta’ Ġakobb bin oħtu, mar jiġri jilqgħu, għannqu u biesu, u ħadu d-dar tiegħu. U Ġakobb beda jgħid lil Laban dawn il-ħwejjeġ kollha.

¹⁴U Laban qallu: “Tassew int għadmi u laħmi.”

¹⁵Kien ilu xahar joqgħod miegħu, meta Laban qal lil Ġakobb: “Għax int ħija, se taħdimli b’xejn? Għidli x’għandu jkun ħlasek.”

¹⁶U Laban kellu żewġt ibniet: il-kbira kien jisimha Lija, u ż-żgħira Rakel.

¹⁷Għajnejn Lija kienu mitfija, imma Rakel kien fiha mara sabiħa f’suritha u ħelwa fl-għajn.

¹⁸U Ġakobb ħabb lil Rakel u qal lil Laban: “Naħdimlek għal seba’ snin għal Rakel, bintek iż-żgħira.”

¹⁹U Laban wieġbu: “Aħjar nagħtiha lilek milli lil ħaddieħor. Mela oqgħod miegħi.”

²⁰U Ġakobb baqa’ għal seba’ snin jaħdem għal Rakel; u kienu qishom għalih ftit jiem, daqs kemm kien iħobbha.

²¹U Ġakobb qal lil Laban: “Agħtini lil marti, għax għalaq iż-żmien, ħa nersaq lejha.”

²²U Laban ġabar in-nies kollha tal-post u għamel ikla.

²³Filgħaxija, imbagħad, qabad lil bintu Lija, u ħadha għand Ġakobb, u dan resaq lejha.

²⁴U Laban ta l-qaddejja tiegħu Żilfa lil bintu Lija bħala qaddejja tagħha.

²⁵Filgħodu, imbagħad, Ġakobb ra li kienet Lija[41] u qal lil Laban: “X’inhu dan li għamiltli? Għal Rakel qgħadt naħdem miegħek. Għala qarraqt bija?”

²⁶U Laban wieġbu: “Għax f’dawn l-inħawi ma jagħmlux hekk, li jagħtu ż-żgħira qabel il-kbira.

²⁷Temm il-ġimgħa ma’ din, u nagħtik lil dik ukoll, bi ħlas tax-xogħol li tagħmilli għal seba’ snin oħra.”

²⁸U Ġakobb għamel hekk: temm il-ġimgħa ma’ dik, u l-ieħor tah lil bintu Rakel b’martu.

²⁹U Laban ta ’l Bilħa, il-qaddejja tiegħu, lil bintu Rakel, b’qaddejja tagħha.

³⁰U Ġakobb resaq ukoll lejn Rakel; u kien iħobb lil Rakel aktar minn Lija. U baqa’ jaħdem miegħu għal seba’ snin oħra.

³¹U l-Mulej ra li Ġakobb lil Lija ma kienx iġibha, għalhekk fetħilha ġufha; iżda Rakel baqgħet bla tfal.

³²U Lija tqalet u wildet iben u semmietu Ruben, għax qalet: “Għax ra l-Mulej hemmi[42], u issa żewġi jibda jħobbni.”

³³U reġgħet tqalet, u wildet iben u qalet: “Sama’ l-Mulej li miniex miġjuba, u tani ’l dan ukoll.” U semmietu Simgħon.

³⁴U reġgħet tqalet, u wildet iben u qalet: “Din id-darba jinġibed żewġi lejja, għax wilidtlu tlitt itfal.” Għalhekk semmietu Levi.

³⁵U reġgħet tqalet u wildet iben u qalet: “Issa din id-darba nfaħħar lill-Mulej.” Għalhekk semmietu Ġuda. U ma wilditx iżjed.