Read Maltese Bible with DC – IL-BIBBJA IL-KOTBA MQADDSA ĠENESI 35 Bible Online

ĠENESI 35 - Maltese Bible with DC – IL-BIBBJA IL-KOTBA MQADDSA bible

ĠENESI 35

¹U Alla qal lil Ġakobb: “Qum u itla’ lejn Betel, u oqgħod hemm. Tella’ hemm artal lil Alla li deherlek, meta kont maħrub minn quddiem ħuk Għesaw.”

²U Ġakobb qal lin-nies ta’ daru u ’l kull min kien miegħu: “Warrbu lill-allat barranin li hemm f’nofskom, tnaddfu u biddlu ħwejjiġkom.

³Imbagħad inqumu u nitilgħu Betel, u ntellgħu hemm artal lil Alla, li weġibni meta kont fil-hemm u baqa’ miegħi fit-triq li kont qbadt.”

⁴U taw lil Ġakobb l-allat kollha barranin li kellhom, u l-imsielet li kellhom f’widnejhom, u Ġakobb radamhom taħt il-balluta ta’ ħdejn Sikem.

⁵Imbagħad refgħu l-kamp, u l-biża’ ta’ Alla waqa’ fuq l-ibliet ta’ madwarhom, u ħadd ma għamel għal wara wlied Ġakobb.

⁶U Ġakobb wasal Luż - li hi Betel - li hemm fl-art ta’ Kangħan, hu u n-nies kollha li kellu miegħu.

⁷U bena hemm artal u semma l-post: El-Betel, għax hemm kien deherlu Alla meta ħarab minn quddiem ħuh.

⁸U mietet Debora, l-imraddgħa ta’ Rebekka, u difnuha ’l isfel minn Betel, taħt il-balluta u semmieha: Allon-bakut.

⁹U raġa’ deher Alla lil Ġakobb, meta ġie minn Fiddien-aram, u bierku.

¹⁰U Alla qallu: “Int jismek Ġakobb, ma jissejjaħx iżjed ismek Ġakobb, imma Iżrael ikun ismek.” U sejjaħlu ismu Iżrael.

¹¹U Alla qallu: “Jien El-Xaddaj. Nissel u oktor, għax ġens u ġemgħa ta’ ġnus jitnisslu minnek u slaten joħorġu minn ġenbejk.

¹²U l-art li jien tajt lil Abraham, u lil Iżakk, lilek ukoll nagħtiha; u lil nislek nagħtihom din l-art warajk.”

¹³Imbagħad Alla tala’ ’l fuq minn ħdejh, fejn kien kellmu.

¹⁴U Ġakobb waqqaf plier fejn kien kellmu, plier tal-ġebel; u raxxax l-inbid fuqu u sawwab iż-żejt.

¹⁵U Ġakobb semma l-post fejn kellmu Alla Betel.

¹⁶Imbagħad refgħu l-kamp, u telqu minn Betel; u meta kien għad fadlilhom biċċa triq sewwa għal Efrata, Rakel wildet, u kellha ħlas iebes.

¹⁷U ġara li xħin kienet qiegħda titħabat biex teħles il-qabla qaltilha: “La tibżax, għax dan ukoll se jkunlek tifel.”

¹⁸U hi u ħierġa ruħha - għax kienet qiegħda tmut - sejħet ismu Benoni, iżda missieru semmieh Benjamin.

¹⁹U Rakel mietet u difnuha fit-triq ta’ Efrata, li hi Betlehem.

²⁰U Ġakobb waqqaf plier fuq qabarha, li hu l-plier tal-qabar ta’ Rakel, u għadu hemm sal-lum.

²¹Iżrael rafa’ l-kamp u mar waqqaf l-għarix tiegħu ’l hemm minn Migdol-għeder.

²²U meta Iżrael kien jgħammar f’dik l-art, Ruben mar jimtedd ma’ Bilħa, il-konkubina ta’ missieru, u Iżrael sema’ b’dan. Ulied Iżrael kienu tnax.

²³Ulied Lija: Ruben, il-kbir ta’ Ġakobb, Simgħon, Levi, Ġuda, Issakar u Żebulun.

²⁴Ulied Rakel: Ġużeppi u Benjamin.

²⁵Ulied Bilħa, il-qaddejja ta’ Rakel: Dan u Naftali.

²⁶Ulied Żilfa, il-qaddejja ta’ Lija: Gad u Aser. Dawn ulied Ġakobb li tweldulu f’Fiddien-aram.

²⁷U Ġakobb ġie għand missieru Iżakk f’Mamri, Kirjat-arba, jiġifieri f’Ħebron, fejn kienu għammru Abraham u Iżakk.

²⁸Iżakk kellu mija u tmenin sena

²⁹meta ħa l-aħħar nifs u miet, xiħ u mimli bil-għomor, u nġabar ma’ niesu. U difnuh uliedu Għesaw u Ġakobb.