Read Maltese Bible with DC – IL-BIBBJA IL-KOTBA MQADDSA ĠENESI 36 Bible Online

ĠENESI 36 - Maltese Bible with DC – IL-BIBBJA IL-KOTBA MQADDSA bible

ĠENESI 36

¹Dan hu nisel Għesaw, li hu Edom.

²Għesaw ħa n-nisa tiegħu minn fost il-bniet tal-Kangħanin: Għada bint Elon il-Ħitti; Oħolibama bint Għana, bint Sibgħun il-Ħiwwi,

³u Baxemat bint Ismagħel, oħt Nebajot.

⁴Lil Għesaw Għada wildet ’l Elifaż, u Baxemat wildet lil Regħwel;

⁵u Oħolibama wildet lil Ġegħus, ’il Ġagħlam u ’l Koraħ. Dawn huma wlied Għesaw, li tweldulu fl-art ta’ Kangħan.

⁶U Għesaw qabad in-nisa tiegħu u ’l uliedu, subien u bniet, u l-qaddejja kollha ta’ daru, l-imrieħel u l-bhejjem kollha tiegħu, u l-ġid kollu li kien kiseb fl-art ta’ Kangħan, u telaq bihom lejn art ’il bogħod minn ħuh Ġakobb.

⁷Għax ġidhom kien kbir wisq biex jgħixu flimkien, u l-art fejn kienu joqogħdu ma kinitx tiflaħhom minħabba l-imrieħel tagħhom.

⁸U Għesaw għammar fuq l-iġbla ta’ Xegħir - Għesaw hu Edom.

⁹Dan hu n-nisel ta’ Għesaw, missier l-Edumin, fuq il-muntanji ta’ Xegħir.

¹⁰Dawn huma l-ismijiet ta’ wlied Għesaw: Elifaż bin Għada, mart Għesaw; Regħwel bin Baxemat, mart Għesaw.

¹¹Ulied Elifaż kienu: Teman, Omar, Sefu, Ġagħtam u Kenaż.

¹²U Timna, li kienet il-konkubina ta’ Elifaż, bin Għesaw, wildet lil Għamalek lil żewġha. Dawn kienu wlied Għada, mart Għesaw.

¹³Ulied Regħwel kienu: Natan, Żaraħ, Samma u Miżża. Dawn kienu wlied Baxemat, mart Għesaw.

¹⁴Dawn kienu wlied Oħolibama bint Għana, bint Sibgħun, mart Għesaw li wildet lil Għesaw, ’il Ġegħus, ’il Ġagħlam, u ’l Koraħ.

¹⁵Dawn kienu l-kapijiet ta’ wlied Għesaw: ulied Elifaż, il-kbir ta’ Għesaw, il-kap Teman, il-kap Omar, il-kap Sefu, il-kap Kenaż,

¹⁶il-kap Koraħ, il-kap Ġagħtam, il-kap Għamalek. Dawn huma l-kapijiet ta’ wlied Elifaż, fl-art ta’ Edom. Dawn kienu wlied Għada.

¹⁷U dawn kienu wlied Regħwel bin Għesaw: il-kap Natan, il-kap Żeraħ, il-kap Samma, il-kap Miżża. Dawn kienu l-kapijiet ta’ wlied Regħwel fl-art ta’ Edom, ulied Baxemat, mart Għesaw.

¹⁸Dawn kienu l-kapijiet ta’ wlied Oħolibama, mart Għesaw: il-kap Ġegħus, il-kap Ġagħlam u l-kap Koraħ. Dawn il-kapijiet ta’ wlied Oħolibama bint Għana, mart Għesaw.

¹⁹Dawn kienu wlied Għesaw u l-kapijiet tagħhom - dan hu Edom.

²⁰Dawn kienu wlied Xegħir il-Ħori, li kienu jgħammru f’din l-art: Lotan, Sobal, Sibgħon, Għana,

²¹Dison, Għeser, Disan. Dawn kienu l-kapijiet tal-Ħorin, ulied Xegħir, fl-art ta’ Edom.

²²Ulied Lotan kienu: Ħori, Heman, u oħt Lotan kienet Timna.

²³U dawn huma wlied Sobal: Għalwan, Manaħat, Għebal, Sefu, u Onam.

²⁴Ulied Sibgħun kienu: Ajja u Għana. Dan hu Għana, dak li sab l-għejun ta’ ilma sħun fid-deżert, hu u jirgħa l-ħmir ta’ missieru Sibgħun.

²⁵Ulied Għana kienu: Disan u Oħolibama bint Għana.

²⁶Ulied Disan kienu: Ħemdan, Esban u Itran u Keran.

²⁷Ulied Għeser kienu: Bilħan, Żagħwan u Għakan.

²⁸Ulied Disan kienu: Għus u Aran.

²⁹Dawn kienu l-kapijiet tal-Ħorin: il-kap Lotan, il-kap Sobal, il-kap Sibgħun, il-kap Għana,

³⁰il-kap Dison, il-kap Għeser u l-kap Disan. Dawn kienu l-kapijiet tal-Ħorin, skont it-tribujiet tagħhom, fl-art ta’ Xegħir.

³¹Dawn kienu s-slaten li saltnu fuq l-art ta’ Edom, qabel ma beda jsaltan sultan fuq ulied Iżrael.

³²Saltan f’Edom Bela bin Begħor, u l-belt tiegħu kien jisimha Dinħaba.

³³Miet Bela, u saltan warajh Ġobab bin Żeraħ minn Basra.

³⁴Miet Ġobab u warajh saltan Ħusam, minn art it-Temanin.

³⁵Miet Ħusam, u warajh saltan Ħadad bin Bedad, li ħabat għall-Midjan fir-raba’ ta’ Mowab; u l-belt tiegħu kienet Għawit.

³⁶Miet Ħadad, u saltan warajh Xamla, minn Maxreka.

³⁷Miet Xamla, u warajh saltan Sawl, minn Reħobot tax-Xmara[49].

³⁸Miet Sawl, u saltan warajh Bagħal-ħanan bin Għakbor.

³⁹Miet Bagħal-ħanan bin Għakbor, u saltan warajh Ħadar, u l-belt tiegħu kien jisimha Pagħu; u martu kien jisimha Meħetabel bint Matred minn Miżaħab.

⁴⁰Dawn huma l-ismijiet tal-kapijiet tat-tribujiet ta’ Għesaw, kif kienu mqassmin skont il-familji u l-għamajjar tagħhom, b’isimhom; il-kap Timna, il-kap Għalwa, il-kap Ġetet,

⁴¹il-kap Oħolibama, il-kap Ela, il-kap Pinon,

⁴²il-kap Kenaż, il-kap Teman, il-kap Mibsar,

⁴³il-kap Magdijel, il-kap Għiram. Dawn huma l-kapijiet ta’ Edom skont l-għamajjar tagħhom fl-art li kienu ħadu. Dan hu Għesaw, missier l-Edumin.