Read Maltese Bible with DC – IL-BIBBJA IL-KOTBA MQADDSA ĠENESI 37 Bible Online

ĠENESI 37 - Maltese Bible with DC – IL-BIBBJA IL-KOTBA MQADDSA bible

ĠENESI 37

¹U Ġakobb kien jgħammar fl-art fejn kien jgħammar missieru bħala frustier fl-art ta’ Kangħan.

²Dan hu nisel Ġakobb: Kellu sbatax-il sena Ġużeppi, meta kien jirgħa n-nagħaġ ma’ ħutu. Kien daqsxejn ta’ tifel għal ħdejn ulied Bilħa u wlied Żilfa, in-nisa ta’ missieru. U Ġużeppi wassal xniegħa ħażina fuqhom lil missierhom.

³Iżrael kien iħobb ’il Ġużeppi aktar minn ħutu kollha, għax kien twelidlu fi xjuħitu; u għamillu libsa twila bil-kmiem.

⁴U ħutu ntebħu li missierhom kien iħobbu aktar minn ħutu kollha; u saru jobogħduh u ma kellhomx ħila jkellmuh bis-sliem.

⁵U Ġużeppi ħolom ħolma u qalha lil ħutu, u dawn aktar bagħduh.

⁶U qalilhom: “Isimgħu din il-ħolma li ħlomt.

⁷Konna qegħdin norbtu l-qatet f’nofs l-għalqa, u, araw, il-qatta tiegħi tqum u baqgħet wieqfa, waqt li daru magħha l-qatet tagħkom u nxteħtu fl-art quddiemha.”

⁸U qalulu ħutu: “Ma nagħmlux mod li se ssaltan jew taħkem fuqna, hux?” U aktar komplew jobogħduh minħabba l-ħolm tiegħu u kliemu.

⁹U raġa’ ħolom ħolma oħra u qalha lil ħutu u qalilhom: “Erġajt ħlomt ħolma: ix-xemx u l-qamar u ħdax-il kewkba nxteħtu fl-art quddiemi.”

¹⁰Qalha wkoll lil missieru u lil ħutu; u missieru beda jlumu u jgħidlu: “X’inhi din il-ħolma li ħlomt? Jaqaw sa niġu jien u ommok u ħutek ninxteħtu fl-art quddiemek?”

¹¹Ħutu komplew jgħiru għalih, imma missieru żamm f’moħħu dan il-kliem.

¹²U ħutu marru jirgħu l-imrieħel ta’ missierhom f’Sikem.

¹³U Iżrael qal lil Ġużeppi: “Ara ħutek qegħdin jirgħu f’Sikem, ejja ħa nibagħtek ħdejhom.” U hu wieġbu: “Hawn jien.”

¹⁴U qallu: “Mur u ara jekk humiex tajbin ħutek, u humiex tajbin l-imrieħel, u ejja għidli.” U bagħtu mill-wied ta’ Ħebron u mar Sikem.

¹⁵U ltaqa’ miegħu raġel, hu u jiġġerra fir-raba’, u dan staqsieh u qallu: “X’inti tfittex?”

¹⁶U wieġbu: “Lil ħuti qiegħed infittex. Għidli, jekk jogħġbok, fejn qegħdin jirgħu?”

¹⁷U dak ir-raġel qallu: “Telqu minn hawn, għax smajthom jgħidu: ‘Ħa mmorru Dotan.’ ” U rħielha Ġużeppi għal wara ħutu, u sabhom f’Dotan.

¹⁸U huma rawh mill-bogħod u sakemm wasal ħdejhom ftiehmu kif joqtluh.

¹⁹U bdew jgħidu lil xulxin: “Arah, ġej il-ħalliem!

²⁰Issa ejjew ħa noqtluh u nixħtuh ġo xi bir, u mbagħad ngħidu li xi bhima selvaġġa kilitu, u naraw x’jiswielu l-ħolm tiegħu.”

²¹U Ruben sama’ u ħelsu minn idejhom, u qalilhom: “Ma nneħħulux ħajtu.”

²²U żied jgħidilhom Ruben: “La xxerrdux demm. Ixħtuh f’dan il-bir li hawn fid-deżert, u la tmiddux idejkom fuqu.” Dan għamlu biex jeħilsu minn idejhom, u jroddu lil missieru.

²³U ġara li malli Ġużeppi wasal ħdejn ħutu, neżżgħuh mil-libsa li kellu fuqu, il-libsa twila bil-kmiem, u

²⁴qabduh u xeħtuh fil-bir. Il-bir kien battal, mingħajr ilma.

²⁵Imbagħad qagħdu bilqiegħda jieklu l-ħobż. Kif refgħu għajnejhom raw karwana ta’ Ismagħelin ġejja minn Gilgħad bl-iġmla tagħhom mgħobbija bid-dragant, il-balzmu u l-lawdnu, sejrin iħottuhom l-Eġittu.

²⁶U Ġuda qal lil ħutu: “X’se ndaħħlu jekk noqtlu ’l ħuna u naħbu demmu?

²⁷Ejjew inbigħuh lill-Ismagħelin u ma mmiddux idejna fuqu, għax ħuna u laħamna hu.” U ħutu semgħu minnu.

²⁸U għaddew xi neguzjanti Midjanin, u ġibdu lil Ġużeppi u tellgħuh mill-bir, u biegħu lil Ġużeppi lill-Ismagħelin b’għoxrin biċċa tal-fidda; u ’l Ġużeppi ħaduh l-Eġittu.

²⁹Meta Ruben raġa’ lura lejn il-bir, sab li Ġużeppi ma kienx għadu hemm, u ċarrat ilbiesu.

³⁰U raġa’ mar ħdejn ħutu u qalilhom: “It-tifel ma għadux hemm, u issa jien fejn se naqbad immur?”

³¹U qabdu l-libsa ta’ Ġużeppi, qatlu gidi, u ċappsu l-libsa bid-demm.

³²U bagħtu l-libsa twila bil-kmiem u ħaduha għand missierhom u qalulu: “Sibna din. Ara jekk hijiex jew le l-libsa ta’ ibnek.”

³³U hu raha u qal: “Din il-libsa ta’ ibni. Xi bhima selvaġġa kiefra kilitu u Ġużeppi mqatta’ bċejjeċ.”

³⁴U Ġakobb ċarrat ilbiesu u geżwer xkora ma’ qaddu u għamel vistu għal ibnu għal żmien twil.

³⁵U wliedu, subien u bniet, qamu biex ifarrġuh, imma hu ma riedx jaf b’faraġ, u qal: “Imnikket sa ninżel taħt l-art ħdejn ibni.” U missieru bkieh!

³⁶Il-Midjanin bigħuh lil Putifar, uffiċjal tal-Fargħun, kap tal-koki.