Read Maltese Bible with DC – IL-BIBBJA IL-KOTBA MQADDSA ĠENESI 38 Bible Online

ĠENESI 38 - Maltese Bible with DC – IL-BIBBJA IL-KOTBA MQADDSA bible

ĠENESI 38

¹Ġara li f’dak iż-żmien Ġuda warrab minn ma’ ħutu, u mar għand wieħed minn Għadullam, jismu Ħira.

²U hemm Ġuda ra ’l bint wieħed Kangħani, li kien jismu Sugħa; iżżewwiġha u resaq lejha.

³U tqalet u wildet tifel, u semmieh Għer.

⁴U reġgħet tqalet u wildet tifel, u semmietu Onan.

⁵U wildet mill-ġdid tifel u semmietu Sela; u meta wilditu kienet f’Keżib.

⁶U Ġuda żewweġ lil Għer, ibnu l-kbir, lil mara jisimha Tamar.

⁷Għer, il-kbir ta’ Ġuda, kien ħażin f’għajnejn il-Mulej, u l-Mulej qatlu.

⁸U Ġuda qal lil Onan: “Ersaq lejn il-mara ta’ ħuk u aqdi dmirek ta’ ħaten li int, u qajjem nisel għal ħuk[50].

⁹U Onan kien jaf li n-nisel ma kienx se jkun tiegħu, u ġara li meta kien jersaq lejn mart ħuh, kien jarmi fl-art, biex ma jagħtix nisel lil ħuh.

¹⁰U dak li għamel kien ħażin f’għajnejn il-Mulej, u ’l dan qatlu wkoll.

¹¹Imbagħad Ġuda qal lil Tamar, mart ibnu: “Mur lura, u ibqa’ armla f’dar missierek, sakemm jikber Sela ibni,” għax qal: “Li ma jmurx imut hu wkoll bħal ħutu.” U Tamar telqet u qagħdet f’dar missierha.

¹²U għadda ħafna żmien u mietet bint Sugħa, il-mara ta’ Ġuda, u meta tfarraġ dan tala’ ħdejn il-ġeżżieża tal-merħla tiegħu, hu u ħabibu Ħira l-Għadullami, f’Timna.

¹³U meta għarrfuha u qalulha: “Ara, missier żewġek tala’ Timna jġiżż il-merħla tiegħu,”

¹⁴Tamar neħħiet minn fuqha l-ilbies ta’ armla, tgħattiet bi star, raxxet il-fwieħa, tgeżwret, u qagħdet f’daħlet Għenajm, fit-triq ta’ Timna; għax hi kienet rat li Sela kien kiber, u baqgħu ma żewġuhulhiex.

¹⁵U raha Ġuda u ħasibha xi mara żienja, għax hi kienet għattiet wiċċha.

¹⁶U kiser lejha u qalilha: “Ejja, ħallini nersaq lejk,” għax ma ntebaħx li kienet mart ibnu. U hi weġbitu: “X’tagħtini biex tersaq lejja?”

¹⁷U hu weġibha: “Nibgħatlek gidi mill-merħla.” U hi qaltlu: “Imma agħtini rahan, sakemm tibgħathuli.”

¹⁸“X’rahan nista’ nagħtik?” staqsieha. U hi wieġbet: “Is-siġill tiegħek, il-qafla u l-ħatar tiegħek[51] li għandek f’idejk.” U tahomlha, u resaq lejha, u ħarġitlu tqila.

¹⁹U qamet, neħħiet l-istar tagħha minn fuqha, u libset l-ilbies ta’ armla.

²⁰U Ġuda bagħtilha l-gidi ma’ ħabibu l-Għadullami, biex jieħu r-rahan minn id il-mara; imma ma sabhiex.

²¹U staqsa n-nies tal-post u qalilhom: “Fejn hija l-mara żienja tas-santwarju[52], dik li tkun f’Għenajm, hawn fit-triq?” U weġbuh: “Ma hawn l-ebda mara żienja tas-santwarju hawn.”

²²U hu raġa’ lura għand Ġuda u qallu: “Ma sibthiex, u n-nies tal-post qalu li ma hemmx mara żienja tas-santwarju.”

²³U Ġuda qallu: “Ħa teħodhom, li ma naqgħux għaż-żufjett, jien talli bgħattilha l-gidi, u int talli ma sibthiex.”

²⁴U ġara li malli għaddew tliet xhur għarrfu lil Ġuda u qalulu: “Tamar, mart ibnek, żniet, u saħansitra tqalet biż-żina tagħha.” U Ġuda weġibhom: “Oħorġuha, u aħarquha.”

²⁵U hi u ħierġa bagħtet tgħid lil missier żewġha: “Mir-raġel li tiegħu huma dawn, jien tqila.” U żiedet tgħid: “Ara tagħrafx ta’ min huma dawn: is-siġill, il-qafla u l-ħatar.”

²⁶U Ġuda għarafhom u qal: “Għandha raġun iżjed minni, għax jien ma tajthiex lil ibni Sela.” U ma għarafhiex iżjed.

²⁷U meta waslet biex tiled, kien hemm tewmin f’ġufha.

²⁸Hi u teħles wieħed minnhom ħareġ idu, u l-qabla rabtitlu ma’ idu ħajta ħamra skura u qalet: “Dan ħareġ l-ewwel.”

²⁹Iżda meta raġa’ ġibed idu, qabad u ħareġ ħuh, u hi qalet: “Għala ħriġt b’din is-saħħa kollha?” U semmietu Pereż[53].

³⁰U fl-aħħar ħareġ ħuh, li kellu l-ħajta f’idu, u semmietu Żeraħ[54].