Read Maltese Bible with DC – IL-BIBBJA IL-KOTBA MQADDSA ĠENESI 43 Bible Online

ĠENESI 43 - Maltese Bible with DC – IL-BIBBJA IL-KOTBA MQADDSA bible

ĠENESI 43

¹Il-ġuħ baqa’ jagħfas fuq l-art.

²U meta temmu jieklu l-qamħ li kienu ġiebu mill-Eġittu, missierhom qalilhom: “Erġgħu morru ixtrulna ftit qamħ.”

³U Ġuda wieġbu u qallu: “Dak ir-raġel widdibna bis-sħiħ u qalilna: ‘Ma tarawx wiċċi jekk ma jkollkomx lil ħukom magħkom.’

⁴Mela, jekk jogħġbok tibgħat lil ħuna magħna, immorru u nixtrulek il-qamħ;

⁵imma jekk ma jogħġbokx, ma ninżlux. Għax dak ir-raġel qalilna: ‘Ma tarawx wiċċi jekk ma jkollkomx lil ħukom magħkom.’ ”

⁶U Iżrael qalilhom: “Għala għamiltuli din il-ħsara, li mortu tgħidu lil dak ir-raġel li kien għad baqgħalkom ħukom?”

⁷U huma weġbuh: “Dak ir-raġel staqsiena fuq li staqsiena fuqna u fuq il-familji tagħna u qalilna: ‘Għadux ħaj missierkom? Għandkomx xi ħukom ieħor?’ U aħna weġibnieh skont dan il-kliem. Fejn konna nafu li kien sa jgħidilna: ‘Niżżlu magħkom lil ħukom’?”

⁸U Ġuda ssokta jgħid lil Iżrael missieru: “Ibgħat liż-żagħżugħ miegħi, ħa naqbdu u nitilqu, u jkollna biex ngħixu u ma mmutux, sew aħna u inti, u sew it-tfal tagħna.

⁹Nagħmel tajjeb jien għalih; fittex lili għalih. Jekk jien ma nġibhulekx, u ma nqegħedhulekx quddiemek, jien inkun ħati kontrik għal għomri kollu.

¹⁰Għax kieku ma qgħadniex nitnikkru, kieku s’issa rġajna morna hemmhekk darbtejn.”

¹¹U Iżrael missierhom weġibhom: “Jekk inhu hekk, tajjeb, agħmlu hekk: ħudu magħkom mill-aħjar ġid ta’ din l-art fil-ħoroġ tagħkom u ħudu rigal lil dak ir-raġel; xi ftit balzmu, xi ftit għasel, dragant u lawdnu, pistaċċi u lewż.

¹²Flus magħkom ħudu d-doppju u ħudu wkoll il-flus li kienu raddewlkom f’wiċċ l-ixkejjer, li ma kienx hemm xi żball.

¹³U ’l ħukom ħuduh magħkom ukoll. Aqbdu u morru lura għand dak ir-raġel.

¹⁴U El-Xaddaj jagħmel li ssibu ħniena quddiem dak ir-raġel, u jagħtikom lura lil ħukom l-ieħor u ’l Benjamin; u jien, jekk għandi niċċaħħad minn uliedi, ħa niċċaħħad!”

¹⁵U huma ħadu f’idejhom dawn ir-rigali, u flus ħadu għal darba tnejn, u ’l Benjamin; u qabdu u niżlu lejn l-Eġittu, u daħlu quddiem Ġużeppi.

¹⁶U malli Ġużeppi ra lil Benjamin magħhom, qal lil dak li kien jieħu ħsieb daru: “Ġib lil dawk l-irġiel id-dar, u oqtol xi bhima, u lesti kollox, għax dawk l-irġiel illum jieklu miegħi f’nofsinhar.”

¹⁷U dak ir-raġel għamel skont ma qallu Ġużeppi u daħħal lil dawn l-irġiel f’dar Ġużeppi.

¹⁸U huma beżgħu għax daħħluhom f’dar Ġużeppi, u qalu: “Minħabba l-biċċa tal-flus li reġġgħulna fl-ixkejjer tagħna l-ewwel darba daħħluna hawn, biex jaħbtu għalina u jinxteħtu fuqna, u jeħduna lsiera, u jaqbdu l-ħmir tagħna.”

¹⁹U resqu fuq dak li kien jieħu ħsieb id-dar ta’ Ġużeppi u kellmuh f’bieb id-dar,

²⁰u qalulu: “Jekk jogħġbok, sidna: Aħna nżilna l-ewwel darba nixtru l-qamħ,

²¹u meta konna wasalna fil-lukanda ftaħna l-ixkejjer tagħna, u hemm sibna l-flus, kull wieħed f’wiċċ l-ixkora tiegħu, sewwasew flusna skont ma jiżnu, u issa ġibniehom lura magħna.

²²U ġibna wkoll flus oħra magħna biex nixtru l-qamħ. Ma nafux min qiegħed il-flus tagħna fl-ixkejjer tagħna.”

²³U hu weġibhom: “Is-sliem għalikom. La tibżgħux! Alla tagħkom u Alla ta’ missirijietkom takom teżor moħbi fl-ixkejjer tagħkom; fluskom diġà waslu għandi.” U ħarġilhom lil Simgħon.

²⁴Imbagħad dak ir-raġel daħħal ’il dawk l-irġiel f’dar Ġużeppi; tahom l-ilma u ħaslu riġlejhom; u tahom ukoll l-għalf għall-ħmir tagħhom.

²⁵U lestew ir-rigali għal meta jasal Ġużeppi f’nofsinhar, għax semgħu li kellhom jieklu hemm.

²⁶U Ġużeppi daħal id-dar, u huma ġibulu r-rigali li kellhom f’idejhom id-dar u nxteħtu wiċċhom fl-art quddiemu.

²⁷U hu sellmilhom u staqsiehom: “Kif inhu x-xwejjaħ missierkom li semmejtu, għadu ħaj?”

²⁸U huma weġbuh: “Qawwi u sħiħ il-qaddej tiegħek missierna, għadu ħaj.” U niżlu għarkupptejhom u nxteħtu wiċċhom fl-art quddiemu.

²⁹U rafa’ għajnejh, u ra lil Benjamin ħuh, bin ommu, u staqsiehom: “Dan ħukom iż-żgħir li intom għedtuli?” U żied jgħid: “Alla jħenn għalik, ibni!”

³⁰U Ġużeppi ħass ġewwenih jitqanqlu għal ħuh, ħass li għandu jibki, u daħal jgħaġġel fil-kamra tiegħu, u beka hemm.

³¹Imbagħad ħasel wiċċu u ħareġ, żamm kemm felaħ u qal: “Ġibu l-ikel!”

³²U ġibulu għalih waħdu, u lilhom għalihom weħidhom, u lill-Eġizzjani, li jieklu miegħu, għalihom weħidhom ukoll - għaliex l-Eġizzjani ma jistgħux jieklu mal-Għebrej, għax ikun għajb għall-Eġizzjani.

³³U qagħdu bilqiegħda quddiemu, wieħed wara l-ieħor, il-kbir l-ewwel u ż-żgħir l-aħħar, skont ma kellhom snin, u l-aħwa bdew iħarsu mistagħġba lejn xulxin.

³⁴U refgħulhom ishma minn quddiemu, u s-sehem ta’ Benjamin kien ħames darbiet iktar mis-sehem ta’ ħutu kollha. U xorbu u ferħu miegħu.