Read Maltese Bible with DC – IL-BIBBJA IL-KOTBA MQADDSA ĠENESI 46 Bible Online

ĠENESI 46 - Maltese Bible with DC – IL-BIBBJA IL-KOTBA MQADDSA bible

ĠENESI 46

¹U Iżrael telaq b’kulma kellu u ġie Birsaba, u hemm offra sagrifiċċji lil Alla ta’ missieru Iżakk.

²U Alla kellem lil Iżrael f’dehra billejl u qallu: “Ġakobb, Ġakobb,” u hu wieġeb: “Hawn jien!”

³U wieġbu: “Jiena Alla, Alla ta’ missierek. La tibżax tinżel l-Eġittu, għax hemm għad nagħmlek ġens kbir.

⁴Jien ninżel miegħek l-Eġittu, u jien għad intellgħek minn hemm, u id Ġużeppi għad tagħlaqlek għajnejk.”

⁵U Ġakobb telaq minn Birsaba; u wlied Iżrael rikkbu lil Ġakobb missierhom, u ż-żgħar tagħhom, u n-nisa tagħhom fuq il-karrijiet li kien bagħtilhom il-Fargħun biex iġorruh.

⁶U ħadu magħhom l-imrieħel u l-ġid li rnexxielhom iħasslu fl-art ta’ Kangħan, u waslu l-Eġittu, Ġakobb u miegħu n-nisel kollu tiegħu:

⁷uliedu u wlied uliedu miegħu, bnietu u bniet uliedu, u nislu kollu ġieb miegħu l-Eġittu.

⁸U dawn huma l-ismijiet ta’ wlied Iżrael[63], li ġew l-Eġittu, Ġakobb u wliedu: Il-kbir ta’ Ġakobb, Ruben,

⁹u wlied Ruben: Ħanok, Pallu, Ħesron u Karmi.

¹⁰Ulied Simgħon: Ġemuwel, Ġamin, Oħad, Ġakin, Soħar, Sawl bin il-Kangħanija.

¹¹Ulied Levi: Gersun, Keħat u Merari.

¹²Ulied Ġuda: Għer, Onan, Sela, Pereż, Żeraħ (Għer u Onan kienu mietu fl-art ta’ Kangħan). Ulied Pereż kienu Ħesron u Ħamul.

¹³Ulied Issakar: Tola, Puwa, Ġob u Simron.

¹⁴Ulied Żebulun: Sered, Elon, u Ġaħlijel.

¹⁵Dawn kienu wlied Lija, li wildet lil Ġakobb f’Fiddien-aram, u bintu Dina. B’kollox uliedu, subien u bniet, kienu tlieta u tletin.

¹⁶U wlied Gad: Sifijun, Ħaggi, Suni, Esbon, Għeri, Arodi u Areli.

¹⁷Ulied Aser: Imna, Iswa, Iswi, Berigħa, u oħthom Xeraħ. Ulied Berigħa kienu: Ħeber u Malkijel.

¹⁸Dawn kienu wlied Żilfa, li Laban kien ta lil bintu Lija; hi wildet lil dawn lil Ġakobb, sittax-il ruħ.

¹⁹Ulied Rakel, mart Ġakobb: Ġużeppi u Benjamin.

²⁰Lil Ġużeppi tweldulu tfal fl-art tal-Eġittu, wildithomlu Asenat, bint Putifera, il-qassis ta’ On, u kienu Manassi u Efrajm.

²¹Ulied Benjamin: Bela, Beker, Asbel, Gera, Nagħman, Eħi, Ros, Muffim, Ħuffim u Ard.

²²Dawn ulied Rakel, li twieldu lil Ġakobb, b’kollox erbatax-il ruħ.

²³Ulied Dan: Ħusin.

²⁴Ulied Naftali: Ġaħsel, Guni, Ġeser u Sillem.

²⁵Dawn huma wlied Bilħa, li Laban kien ta lil bintu Rakel, li b’kollox wildet lil Ġakobb seba’ wlied.

²⁶Dawk kollha li marru l-Eġittu ma’ Ġakobb, li ħarġu minn ġewwenih, minbarra n-nisa ta’ wlied Ġakobb, b’kollox sitta u sittin ruħ.

²⁷Ulied Ġużeppi li twildulu l-Eġittu kienu tnejn. B’kollox nies Ġakobb, li ġew l-Eġittu, kienu sebgħin ruħ.

²⁸U Ġakobb bagħat lil Ġuda qablu għand Ġużeppi, biex jiltaqa’ miegħu f’Gosen; u huma ġew fl-art ta’ Gosen.

²⁹U Ġużeppi rama l-karru tiegħu u mar jiltaqa’ ma’ Iżrael, missieru, f’Gosen. Malli deher quddiemu nxteħet fuq għonqu u baqa’ għal ħafna żmien mgħannaq miegħu u jibki.

³⁰U Iżrael qal lil Ġużeppi: “Ħa mmut issa li rajt ’il wiċċek, issa li naf li għadek ħaj.”

³¹U Ġużeppi qal lil ħutu u lid-dar ta’ missieru: “Ħa mmur u nagħti l-aħbar lill-Fargħun, u ngħidlu, ‘Ħuti u dar missieri, li kien fl-art ta’ Kangħan, ġew għandi.

³²Dawn in-nies huma rgħajja, għax huma nies tal-imrieħel, u ġiebu magħhom l-imrieħel u l-baqar tagħhom, u kulma għandhom.’

³³U meta l-Fargħun isejħilkom u jistaqsikom x’tagħmlu,

³⁴għidulu: ‘Nies tal-imrieħel il-qaddejja tiegħek minn ċkunitna s’issa, aħna u missirijietna,’ biex tibqgħu tgħammru fl-art ta’ Gosen, għax l-Eġizzjani jistmerru r-rgħajja kollha tal-imrieħel.”