Read Maltese Bible with DC – IL-BIBBJA IL-KOTBA MQADDSA ĠENESI 48 Bible Online

ĠENESI 48 - Maltese Bible with DC – IL-BIBBJA IL-KOTBA MQADDSA bible

ĠENESI 48

¹U wara dawn il-ġrajja qalu lil Ġużeppi: “Ara, missierek marid.” U ħa miegħu liż-żewġ uliedu, Manassi u Efrajm.

²U ħabbru lil Ġakobb u qalulu: “Ara, ġie għandek ibnek Ġużeppi.” U Iżrael għamel ħiltu u qam bilqiegħda fuq is-sodda.

³U Ġakobb qal lil Ġużeppi: “El-Xaddaj deherli f’Luż[65] fl-art ta’ Kangħan u berikni

⁴u qalli: ‘Arani, jien se nagħtik nisel u nkattrek u nagħmel minnek ġemgħa ta’ ġnus, u nagħti din l-art lil nislek warajk b’wirt għal dejjem.’

⁵U issa ż-żewġ uliedek li twildulek fl-art tal-Eġittu qabel ma ġejt jien għandek fl-Eġittu, huma tiegħi: Efrajm u Manassi jkunu tiegħi bħal Ruben u Simgħon.

⁶Imma dawk li wlidt warajhom ikunu tiegħek; u jissejħu b’isem ħuthom fil-qasam tal-wirt.

⁷Meta jien kont ġej mill-Fiddien mititli Rakel fl-art ta’ Kangħan fit-triq, meta kien għad fadal biċċa art sewwa biex nasal Efrata, u dfintha hemm fit-triq ta’ Efrata, li hi Betlehem.”

⁸U Iżrael ra ż-żewġt itfal ta’ Ġużeppi u staqsieh: “Min huma dawn?”

⁹U Ġużeppi wieġeb lil Ġakobb: “Dawn huma wliedi li tani Alla hawnhekk.” U qallu: “Ressaqhom lejja biex inberikhom.”

¹⁰U għajnejn Iżrael kienu tqalu bix-xjuħija, u ma kienx jista’ jara. Ressaqhomlu lejh Ġużeppi, u hu bieshom u għannaqhom.

¹¹U Iżrael qal lil Ġużeppi: “Ma kontx nistenna li għad nara ’l wiċċek, u, ara, issa Alla wrieni lil uliedek ukoll.”

¹²U Ġużeppi ħariġhom minn bejn irkupptejn missieru, u niżel wiċċu fl-art.

¹³Imbagħad Ġużeppi ħadhom it-tnejn: lil Efrajm b’idu l-leminija lejn in-naħa tax-xellug ta’ Iżrael, u lil Manassi bix-xellugija lejn in-naħa tal-lemin ta’ Iżrael, u ressaqhomlu lejh.

¹⁴U Iżrael medd idu l-leminija u qegħedha fuq ras Efrajm, iż-żgħir, u x-xellugija qegħedha fuq ras Manassi, b’idejh imsallbin, għax Manassi kien il-kbir,

¹⁵u bierek lil Ġużeppi u qallu: “Alla li mxew quddiemu missirijieti, Abraham u Iżakk; Alla, ir-ragħaj tiegħi, sa minn tnissili sal-lum;

¹⁶l-anġlu li salvani minn kull għawġ, ibierek ’il dawn iż-żgħażagħ, u jsejħu fuqhom ismi, u isem missirijieti, Abraham u Iżakk, u jitkattru bil-bosta fl-art.”

¹⁷U Ġużeppi ra li missieru kien qiegħed idu l-leminija fuq ras Efrajm u ma għoġbitux; u qabad id missieru biex iwarrabha minn fuq ras Efrajm għal fuq ras Manassi.

¹⁸U Ġużeppi qal lil missieru: “Mhux hekk missier! Dan hu l-kbir, qiegħed il-leminija tiegħek fuq rasu.”

¹⁹Imma missieru ma riedx u qallu: “Naf, ibni, imma naf ukoll li għad ikun ġens, u jkun kbir ukoll. Naf ukoll li ħuh iż-żgħir għad ikun akbar minnu, u n-nisel tiegħu jkun milja ta’ ġnus.”

²⁰U berikhom dak in-nhar u qalilhom: “Bik Iżrael għad ibierek u jgħid: ‘Jagħmlek Alla bħal Efrajm u Manassi.’ ” U qiegħed lil Efrajm qabel Manassi.

²¹U Iżrael qal lil Ġużeppi: “Ara jien se mmut, imma Alla jkun magħkom u jreġġagħkom lura lejn art missirijietkom.

²²U jien nagħtik xaqliba ta’ muntanja aktar minn ħutek, li jien kont ħadt minn idejn l-Amurrin bix-xabla u l-qaws tiegħi.”