Read Maltese Bible with DC – IL-BIBBJA IL-KOTBA MQADDSA ĠENESI 49 Bible Online

ĠENESI 49 - Maltese Bible with DC – IL-BIBBJA IL-KOTBA MQADDSA bible

ĠENESI 49

¹U Ġakobb sejjaħ lil uliedu u qalilhom: “Inġabru ħdejja ħa nħabbrilkom x’għandu jiġri fl-aħħar jiem:

²Inġabru u isimgħu, ulied Ġakobb, agħtu widen lil Iżrael missierkom.

³Ruben, int il-kbir tiegħi, il-qawwa tiegħi u l-bikri ta’ rġuliti, l-ogħla fil-ġieħ, u l-ogħla fil-qawwa.

⁴Imbaqbaq bħall-ilma, ma togħliex fil-ġieħ. Għax int tlajt fuq friex missierek, biex kasbart is-sodda ta’ martu.

⁵Simgħon u Levi aħwa, għodod il-vjolenza sjufhom.

⁶Qalbi ma tagħtinix għal laqgħathom, u ġieħi ma nsibux f’ġemgħathom. Għax f’għadabhom qatlu n-nies, u b’kapriċċ qatgħu għerq il-barri.

⁷Misħut għadabhom għax qalil; misħuta l-kefrija ta’ qillthom. Inqassamhom f’Ġakobb, u nxerridhom fost Iżrael.

⁸Ġuda, int lilek ifaħħruk ħutek. Idek fuq ras l-għedewwa tiegħek; u quddiemek imilu wlied missierek.

⁹Int ferħ ta’ ljun, O Ġuda, inti ibni mill-priża tiela’. Bħal iljun imkennen, mimdud bħal mart l-iljun. Min se jqajmek?

¹⁰Ix-xettru minn id Ġuda ma jitneħħiex; u l-ħatar minn bejn riġlejh, sakemm iġibulu l-ħaraġ, u minnu l-ġnus jisimgħu.

¹¹Jorbot mad-dielja l-felu tiegħu, u wild il-ħmara maż-żarġun. Jaħsel fl-inbid ħwejġu, u lbiesu f’demm il-għeneb.

¹²Bl-inbid ħomor għajnejh, u snienu bojod bil-ħalib.

¹³Żebulun jgħammar f’xatt l-ibħra, f’xatt l-iġfien jinsab, b’ġenbu ma’ Sidon.

¹⁴Issakar ħmar imgħaddam, mimdud qalb l-imqawel.

¹⁵Ra l-post tajjeb għall-mistrieħ, u l-art sabiħa. Għat-tagħbija niżżel spallejh, u sar ilsir tax-xogħol bilfors.

¹⁶Dan jagħmel ħaqq minn niesu, bħal wieħed mit-tribujiet ta’ Iżrael.

¹⁷Dan bħal serp fit-triq, bħal lifgħa fil-mogħdija, jigdem għarqub iż-żiemel, u r-rikkieb jinqaleb lura.

¹⁸Ħelsienek nistenna, O Mulej.

¹⁹Gad, il-qtajja’ jaħbtu għalik, imma int taħbat għal għarqubhom.

²⁰Aser, ħobżu bnin, u ħlewwiet is-slaten jagħti.

²¹Naftali għażżiela ħielsa, li tagħti ġmiel ta’ frieħ.

²²Ġużeppi fergħa ta’ siġra għammiela, fergħa ta’ siġra għammiela ħdejn għajn, il-friegħi jiżżarġnu fuq il-ħajt.

²³Qamu għalih u waddbulu l-vleġeġ, u ħarbtuh l-arċieri.

²⁴Imma l-qaws tiegħu baqa’ sod, u ħeffu dirgħajh u idejh, bis-saħħa tal-Qawwi ta’ Ġakobb, bl-isem tar-Ragħaj u l-Blata ta’ Iżrael.

²⁵B’Alla ta’ missierek, - jalla jgħinek, b’Xaddaj, - jalla jbierkek. B’barkiet mill-għoli tas-smewwiet, b’barkiet l-ilmijiet mifruxa taħt l-art, b’barkiet is-sider u l-ġuf,

²⁶b’barkiet tal-qmuħ u ż-żahar, b’barkiet l-iġbla tal-qedem. L-għaxqiet tal-għoljiet tal-qedem, ħa jkunu fuq ras Ġużeppi, fuq il-qorriegħa tal-magħżul fost ħutu.

²⁷Benjamin lupu tal-ħatfa, filgħodu jiekol il-qabda, u filgħaxija jqassam il-priża.”

²⁸Dawn huma t-tribujiet kollha ta’ Iżrael, tnax b’kollox, u dan hu l-kliem li qalilhom missierhom hu u jberikhom; u ’l kull wieħed bierku b’barka għalih.

²⁹Imbagħad widdibhom u qalilhom: “Jiena sa ninġabar ma’ niesi. Idfnuni ma’ missirijieti, fl-għar li hemm fl-għalqa ta’ Għefron il-Ħitti;

³⁰fl-għar li hemm fl-għalqa ta’ Makfela biswit Mamri fl-art ta’ Kangħan, li Abraham kien xtara mingħand Għefron il-Ħitti, b’qabar tiegħu.

³¹Hemm difnu lil Abraham u ’l Sara martu; hemm difnu lil Iżakk u ’l Rebekka martu, u hemmhekk jien dfint lil Lija.

³²Mingħand ulied il-Ħittin inxtrat din l-għalqa bl-għar li hemm fiha.”

³³Meta Ġakobb temm iwiddeb lil uliedu, ġabar riġlejh fil-friex, ta l-aħħar nifs, u nġabar ma’ niesu.