Read Maltese Bible with DC – IL-BIBBJA IL-KOTBA MQADDSA ĠENESI 8 Bible Online

ĠENESI 8 - Maltese Bible with DC – IL-BIBBJA IL-KOTBA MQADDSA bible

ĠENESI 8

¹Imma Alla ftakar f’Noè, fl-annimali selvaġġi u l-bhejjem kollha miegħu fl-arka; u Alla qajjem riħ fuq l-art, u l-ilmijiet bdew jonqsu.

²U ngħalqu l-għejun tal-qiegħ u bwieb is-smewwiet, u waqfet ix-xita mis-smewwiet.

³U l-ilmijiet bdew rieġgħa lura minn fuq l-art, u baqgħu sejrin lura sakemm naqsu għalkollox wara mija u ħamsin jum.

⁴U waqfet l-arka fis-seba’ xahar, fis-sbatax-il jum tax-xahar, fuq il-muntanja ta’ Ararat.

⁵U l-ilmijiet baqgħu sejrin lura u jonqsu sal-għaxar xahar; u fl-għaxar xahar, fl-ewwel tax-xahar, dehru l-qċaċet tal-muntanji.

⁶U wara erbgħin jum Noè fetaħ it-tieqa tal-arka li kien għamel.

⁷U telaq iċ-ċawlun, u dan ħareġ u baqa’ ġej u sejjer sakemm nixef l-ilma minn fuq l-art.

⁸U Noè bagħat il-ħamiema minn ħdejh biex jara jekk naqasx l-ilma minn fuq wiċċ l-art.

⁹U l-ħamiema ma sabitx fejn isserraħ qiegħ riġilha, u reġgħet lura għal għandu fl-arka, għax l-ilma kien għadu fuq wiċċ l-art kollha. U Noè ħareġ idu u qabadha u daħħalha miegħu fl-arka.

¹⁰U stenna sebat ijiem oħra u reġa’ bagħat il-ħamiema mill-arka.

¹¹U l-ħamiema reġgħet lura filgħaxija b’werqa friska taż-żebbuġ f’munqarha. U Noè ntebaħ li l-ilmijiet kienu naqsu minn fuq wiċċ l-art.

¹²U stenna sebat ijiem oħra, u bagħat il-ħamiema, u din ma reġgħetx lura iżjed għandu.

¹³Fis-sena sitt mija u wieħed, fl-ewwel xahar, fl-ewwel jum tax-xahar, nixef għalkollox l-ilma minn fuq wiċċ l-art. U Noè bexxaq l-għatu tal-arka, u ħares, u ra li wiċċ l-art kien nixef.

¹⁴U fit-tieni xahar, fis-sbatax-il jum tax-xahar, nixfet l-art.

¹⁵U Alla kellem lil Noè u qallu:

¹⁶“Oħroġ mill-arka, int u martek, uliedek u n-nisa tagħhom miegħek.

¹⁷U kull ħliqa ħajja li hemm miegħek, minn kull ġens, tjur u bhejjem, u kulma jitkaxkar fuq l-art; oħroġhom miegħek ħalli jixterdu mal-art, u jnisslu u joktru fl-art.”

¹⁸U Noè ħareġ b’uliedu u martu, u n-nisa ta’ wliedu miegħu.

¹⁹Ħarġu wkoll mill-arka l-bhejjem kollha, il-ħniex, it-tjur u kulma jitkaxkar fl-art, skont in-nisel tagħhom.

²⁰U Noè bena artal lill-Mulej, u ħa minn kull annimal safi u mit-tajr safi, u offra sagrifiċċju tal-ħruq fuq l-artal.

²¹U l-Mulej xamm ir-riħa ħelwa u għoġbitu; u l-Mulej qal f’qalbu: “Ma nerġax iżjed nisħet l-art minħabba l-bniedem, għax qalb il-bniedem miġbuda għall-ħażen sa minn ċkunitu, u ma nerġax iżjed naħbat għall-ħlejjaq ħajjin kollha bħalma għamilt.

²²Sakemm iddum l-art, żrigħ u ħsad, bard u għomma, sajf u xitwa, lejl u nhar, ma jonqsu qatt.”