Read Maltese Bible with DC – IL-BIBBJA IL-KOTBA MQADDSA 2 SAMWEL 10 Bible Online

2 SAMWEL 10 - Maltese Bible with DC – IL-BIBBJA IL-KOTBA MQADDSA bible

2 SAMWEL 10

¹Ġara li wara dan miet is-sultan ta’ wlied Għammon, u daħal isaltan floku Ħanun, ibnu.

²U David qal: “Ħa rrodd lil Ħanun bin Naħas il-favur li missieru għamel miegħi.” U David bagħat il-qaddejja tiegħu jagħtuh l-għomor għall-mewt ta’ missieru. U l-qaddejja ta’ David marru fl-art ta’ wlied Għammon.

³U l-kapijiet ta’ wlied Għammon qalu lil Ħanun, sidhom: “Taħseb int li David bagħat jagħtik l-għomor permezz tal-qaddejja tiegħu biex jagħti ġieħ lil missierek? Mhux biex jistħarreġ il-belt, u jitkixxifha u jaqlibha ta’ taħt fuq bagħat il-qaddejja tiegħu għandek David, biex imbagħad iġarrafha?”

⁴U Ħanun qabad lill-qaddejja ta’ David u qaxxrilhom nofs ilħithom u qatgħalhom nofs ilbieshom minn qaddhom ’l isfel, u telaqhom.

⁵U għarrfu lil David u bagħat lil min jilqagħhom, għaliex dawn l-irġiel ħassew ruħhom avviliti għall-aħħar. U s-sultan qalilhom: “Oqogħdu f’Ġeriko sakemm tikbrilkom il-leħja, imbagħad erġgħu lura.”

⁶Meta l-Għammonin raw li kisruha ma’ David, bagħtu jikru minn fost l-Aramin ta’ Bet-reħob u l-Aramin ta’ Soba għoxrin elf raġel fanterija, u elf oħra mingħand is-sultan ta’ Magħka; u tnax-il elf mill-poplu ta’ Tob.

⁷David sama’ b’dan u bagħat lil Ġowab u l-eżerċtu kollu bin-nies qalbiena.

⁸Ulied Għammon ħarġu u ħadu posthom għall-ġlied fid-daħla tal-bieb; u l-Aramin ta’ Soba, u ta’ Reħob, u n-nies ta’ Tob u ta’ Magħka tqassmu għalihom weħidhom fir-raba’.

⁹Meta Ġowab ra li kien imhedded minn quddiem u minn wara, għażel l-aħjar min-nies kollha ta’ Iżrael, u qassamhom quddiem l-Aramin.

¹⁰U l-bqija tal-poplu ħallieh f’idejn ħuh Abisaj, u qassamhom quddiem l-Għammonin.

¹¹U qallu: “Jekk l-Aramin insibhom aqwa minni, int ejja għinni; u jekk int issib l-Għammonin aqwa minnek, niġi ngħinek jien.

¹²Agħmel il-ħila, u nissieltu għall-poplu tagħna u għall-bliet ta’ Alla tagħna, imbagħad il-Mulej jagħmel dak li jidhirlu.”

¹³U Ġowab u n-nies li kellu miegħu marru jaħbtu għall-Aramin, u dawn ħarbu minn quddiemu.

¹⁴Malli wlied Għammon raw li l-Aramin ħarbu, ħarbu minn quddiem Abisaj u daħlu fil-belt. U Ġowab raġa’ lura mingħand l-Għammonin u mar u telaq lejn Ġerusalemm.

¹⁵L-Aramin raw li marru minn taħt quddiem l-Iżraelin, u għalhekk ingħaqdu lkoll flimkien.

¹⁶Ħadad-għeżer bagħat jiġbor l-Aramin min-naħa l-oħra tax-xmara[16]. U ġew Ħelam, bil-mexxej tagħhom Sobak, il-kmandant tal-eżerċtu ta’ Ħadad-għeżer, quddiemhom.

¹⁷David sar jaf b’dan u ġama’ lil Iżrael kollu, qasam il-Ġordan, u wasal sa Ħelam. L-Aramin tqassmu kontra David u ħabtu għalih.

¹⁸U l-Aramin ħarbu minn quddiem Iżrael u David qatel mill-Aramin seba’ mitt sewwieq tal-karrijiet u erbgħin elf rikkieb u darab ukoll lil Sobak, il-kmandant tal-eżerċtu, li baqa’ mejjet tal-post.

¹⁹U s-slaten, l-alleati ta’ Ħadad-għeżer, malli raw li tkissru quddiem Iżrael, għamlu l-paċi ma’ Iżrael u saru suġġetti għalihom. U l-Aramin beżgħu jibqgħu jgħinu iżjed lin-nies ta’ Għammon.