Read Maltese Bible with DC – IL-BIBBJA IL-KOTBA MQADDSA 2 SAMWEL 14 Bible Online

2 SAMWEL 14 - Maltese Bible with DC – IL-BIBBJA IL-KOTBA MQADDSA bible

2 SAMWEL 14

¹U Ġowab bin Seruja sar jaf li qalb is-sultan daret favur Absalom.

²U Ġowab bagħat iġib minn Tekugħa mara għaqlija u qalilha: “Agħmel tabirruħek vistuża, u ilbes il-vistu, u la tindilikx biż-żejt, imma ġib ruħek bħallikieku mara ilha vistuża għal żmien għal xi ħadd mejjet.

³U mur għand is-sultan u kellmu u għidlu hekk u hekk.” U Ġowab qiegħed il-kliem fuq fommha.

⁴U l-mara minn Tekugħa marret għand is-sultan, inxteħtet għal wiċċha fl-art, tatu qima u qaltlu: “Għinni, sultan!”

⁵U s-sultan qalilha: “X’għandek?” U hi wieġbet: “Jaħasra għalija! Żewġi mejjet!

⁶Il-qaddejja tiegħek[25] kellha żewġt itfal, u ġġieldu fir-raba’, u ma kien hemm ħadd min iferraqhom, u wieħed darab lill-ieħor u qatlu.

⁷U, ara, issa l-familja qamet kollha kontra l-qaddejja tiegħek u qaluli: ‘Agħtina l-qattiel ta’ ħuh, ħalli noqtluh u nitħallsu minnu tal-ħajja ta’ ħuh, li hu qatel,’ u hekk jeqirdu l-werriet ukoll u l-ġamra ħajja li baqagħli[26], u ma jħallux lil żewġi la isem u lanqas nisel fuq wiċċ l-art.”

⁸U s-sultan wieġeb lill-mara: “Mur f’darek, u naħseb jien għalik.”

⁹Imma l-mara minn Tekugħa wieġbet lis-sultan: “Fuqi l-ħtija, u fuq dar missieri, sidi s-sultan, u bla ħtija jkunu s-sultan u t-tron tiegħu!”

¹⁰U s-sultan qalilha: “Min ikellmek, ġibu quddiemi, u ħadd ma għandu jħabbtek iżjed.”

¹¹U l-mara wieġbet: “Ħa jsejjaħ is-sultan isem il-Mulej[27], Alla tiegħek, sabiex min għandu d-dritt tal-vendetta ma jżidx il-qerda, u ma joqtolx lil ibni.” U hu qalilha: “Daqs kemm hu ħaj il-Mulej! Ma taqax fl-art xagħra waħda minn ibnek!”

¹²U l-mara qaltlu: “Ħa żżid kelma waħda l-qaddejja tiegħek lil sidi s-sultan.” U hu qalilha: “Tkellem.”

¹³U l-mara qalet: “Għala, mela, ħsibt ħaġa bħal din kontra l-poplu ta’ Alla? Mela s-sultan qiegħed jikkundanna lilu nnifsu jekk ma jreġġax lura lil min biegħed minnu.

¹⁴Għax aħna mmutu żgur, u bħalma l-ilma mxerred fl-art ma jinġabarx, hekk Alla ma jroddx lura l-ħajja. Ħa jara jaħsibx xi ħaġa s-sultan[28] biex ma jibqax imbiegħed dak li biegħed minnu.

¹⁵Issa jien ġejt inkellem lil sidi s-sultan u ngħidlu dan kollu, għax xi nies beżżgħuni, u jien ħsibt u għedt: ‘Ħa tkellem il-qaddejja tiegħek lis-sultan, għandu mnejn is-sultan jagħmel li tgħidlu l-qaddejja tiegħu.

¹⁶Għax żgur li s-sultan jagħti widen għall-qaddejja tiegħu, u jeħlisha minn idejn dan il-bniedem li jrid jeqred fl-istess ħin lili u lil ibni minn fost il-wirt ta’ Alla.’

¹⁷U l-qaddejja tiegħek għalhekk qalet: ‘Ħa tkun il-kelma ta’ sidi s-sultan kelma ta’ paċi! Għax is-sultan sidi, bħal anġlu ta’ Alla, jiżen it-tajjeb u l-ħażin.’ Il-Mulej, Alla tiegħek, ikun miegħek!”

¹⁸U s-sultan wieġeb u qal lill-mara: “La taħbili xejn milli se nistaqsik.” U wieġbet il-mara: “Ħa jitkellem sidi s-sultan.”

¹⁹U s-sultan staqsieha: “Jaqaw f’dan kollu hemm miegħek id Ġowab?” U l-mara wieġbet: “Fuq ħajtek, sidi s-sultan, ma hemm xejn iżjed, la lejn il-lemin lanqas lejn ix-xellug, minn dak li qal is-sultan! Iva, Ġowab il-qaddej tiegħek kien li ordnali dan, u hu stess qegħedli dan il-kliem kollu fuq fommi.

²⁰Dan għamlu l-qaddej tiegħek Ġowab bl-għan li jdawwar din il-biċċa, u sidi hu għaqli biżżejjed b’għaqal ta’ anġlu ta’ Alla biex jifhem kulma jsir fuq l-art.”

²¹U s-sultan qal lil Ġowab: “Ara, mela, agħmel hekk: Mur ġib lura liż-żagħżugħ Absalom.”

²²U Ġowab inxteħet wiċċu fl-art u qiem, u bierek lis-sultan u qal: “Illum il-qaddej tiegħek jaf li sibt grazzja quddiemek, sidi s-sultan, għax qagħad is-sultan għall-kelma tal-qaddej tiegħu.”

²³U Ġowab qam u mar Gesur u ġieb lil Absalom Ġerusalemm.

²⁴U s-sultan qal: “Ħa jmur f’daru, u ma jarax wiċċi.” U Absalom mar f’daru bla ma ra wiċċ is-sultan.

²⁵Ma kienx hemm f’Iżrael kollu raġel ieħor sabiħ xi tfaħħar daqs Absalom; minn qiegħ riġlejh sal-quċċata ta’ rasu ma kien fih ebda għajb.

²⁶Meta kien iqarweż rasu - u kien iqarwiżha għall-aħħar ta’ kull sena għax kienet ittaqqlu; għalhekk kien iqarwiżha - xagħar rasu kien jiżen mitejn xekel skont il-miżien tas-sultan.

²⁷Lil Absalom twildulu tliet subien u tifla, li kien jisimha Tamar; u din kienet mara sabiħa ħafna fil-għajn.

²⁸U kien ilu joqgħod Ġerusalemm sentejn sħaħ, u wiċċ is-sultan kien għadu ma rahx.

²⁹U Absalom bagħat għal Ġowab biex jibagħtu għand is-sultan, u dan ma marx għandu; u raġa’ bagħat għalih għat-tieni darba, u raġa’ ma marx.

³⁰U qal lill-qaddejja tiegħu: “Araw, l-għalqa ta’ Ġowab qiegħda ħdejn tiegħi, u fiha għandu x-xgħir. Morru u aħarquhulu.” U l-qaddejja ta’ Absalom taw in-nar lill-għalqa.

³¹U Ġowab qam u mar għand Absalom f’daru u qallu: “Għaliex il-qaddejja tiegħek taw in-nar lill-għalqa tiegħi?”

³²U Absalom wieġbu: “Ara, bgħatt għalik biex ngħidlek: Ejja hawn ħa nibagħtek għand is-sultan biex tgħidlu: ‘Għalfejn ġejt minn Gesur? Kien ikun aħjar għalija li bqajt hemm!’ U issa ħa nara wiċċ is-sultan u jekk hemm xi ħtija fija, ħa joqtolni.’ ”

³³U Ġowab mar għand is-sultan u għarrfu b’kollox. U s-sultan sejjaħ lil Absalom, u dan mar għand is-sultan u nxteħet wiċċu fl-art quddiem is-sultan, u s-sultan bies lil Absalom.