Read Maltese Bible with DC – IL-BIBBJA IL-KOTBA MQADDSA 2 SAMWEL 21 Bible Online

2 SAMWEL 21 - Maltese Bible with DC – IL-BIBBJA IL-KOTBA MQADDSA bible

2 SAMWEL 21

¹Kien hemm l-għaks fi żmien David għal tliet snin wara xulxin, u David mar jitlob quddiem il-Mulej, u l-Mulej qallu: “Hemm id-demm fuq Sawl u d-dar tiegħu, talli qatel il-Gibgħonin.”

²Is-sultan David sejjaħ lill-Gibgħonin. Issa l-Gibgħonin ma kinux minn ulied Iżrael, imma l-fdal tal-Amurrin, u minkejja li wlied Iżrael kienu ħalfulhom li jħalluhom, Sawl fittex li jeqridhom minħabba l-ħeġġa li kellu għal ulied Iżrael u Ġuda.

³U David staqsiehom: “X’għandi nagħmel għalikom? Biex nista’ npattilkom, ħalli intom tbierku wirt il-Mulej?”

⁴U l-Gibgħonin wieġbu: “Bejnna u bejn Sawl u daru mhijiex biċċa ta’ fidda u deheb, u anqas ma rridu l-mewt ta’ xi ħadd minn fost Iżrael.” U hu staqsiehom: “X’tgħiduli nagħmel għalikom, mela?”

⁵U huma wieġbu lis-sultan: “Ħa jagħtuna sebat irġiel minn ulied il-bniedem li qeridna u ried iġibna fix-xejn biex ma nibqgħux ħajjin fl-art kollha ta’ Iżrael;

⁶imbagħad noqtluhom aħna quddiem il-Mulej f’Gibgħa ta’ Sawl, il-magħżul tal-Mulej.” U s-sultan wieġeb: “Nagħtihomlkom jien stess!”

⁷Imma s-sultan ħenn għal Mefiboset bin Ġonatan, bin Sawl, minħabba l-ħalfa tal-Mulej li kien hemm bejniethom, bejn David u bejn Ġonatan bin Sawl.

⁸U s-sultan ħa ż-żewġ ulied ta’ Risfa bint Ajja, li kienet wildet lil Sawl: Armoni u Mefiboset, u l-ħames ulied ta’ Mikal bint Sawl, li kienet weldithom lil Għadrijel bin Barżillaj il-Meħoli,

⁹u telaqhom f’idejn il-Gibgħonin, u dawn qatluhom fuq l-għolja quddiem il-Mulej, u mietu s-sebgħa flimkien. Qatluhom fl-ewwel jiem tal-ħsad, fil-bidu ta’ ħsad ix-xgħir.

¹⁰Risfa bint Ajja ħadet xkora, u firxitha bħal tinda għaliha, mill-bidu tal-ħsad sakemm ma niżlitx ix-xita fuqhom mis-sema, u ma ħallietx it-tajr tal-ajru jinżlu fuqhom binhar, u l-bhejjem selvaġġi billejl.

¹¹U ’l David qalulu b’kulma għamlet Risfa bint Ajja, il-konkubina ta’ Sawl.

¹²U David mar u ġabar l-għadam ta’ Sawl u l-għadam ta’ ibnu Ġonatan mingħand in-nies ta’ Ġabes-gilgħad, li kienu ħatfuhom mill-misraħ ta’ Betsan fejn kienu dendluhom il-Filistin, meta dawn rebħu lil Sawl f’Gilbogħa.

¹³U talla’ minn hemm l-għadam ta’ Sawl u ibnu Ġonatan; ġabar ukoll l-għadam ta’ dawk li kienu mdendlin.

¹⁴Imbagħad difnu l-għadam ta’ Sawl u Ġonatan fl-art ta’ Benjamin f’Sela, fil-qabar ta’ Kis, missieru. Għamlu kulma kien ordna s-sultan, u wara dan kollu Alla ġietu ħniena mill-pajjiż.

¹⁵U raġa’ qam il-ġlied bejn il-Filistin u Iżrael, u David niżel bil-qaddejja tiegħu u tqabdu mal-Filistin, u David kien għajjien.

¹⁶Kien hemm Benob, wieħed minn ulied Rafa, li kellu lanza tiżen tliet mitt xekel tal-bronż u mħażżem b’xabla ġdida. Dan għamel f’rasu li joqtol lil David.

¹⁷Imma ġie jgħinu Abisaj bin Seruja, u darab il-Filisti u qatlu. Imbagħad ħalfu n-nies ta’ David u qalulu: “Ma toħroġx iżjed magħna għall-ġlied, inkella jintefa d-dawl ta’ Iżrael.”

¹⁸Wara dan raġa’ qam il-ġlied mal-Filistin f’Ġob. U Sibbekaj minn Ħusa darab lil Saf, li kien minn ulied Rafa.

¹⁹Raġa’ qam il-ġlied f’Ġob mal-Filistin, u Elħanan bin Ġagħir-ġoregim minn Betlehem darab lil Gulija l-Gatti, li kellu l-għuda tal-lanza bħal motwa tan-nissieġa.

²⁰Kien hemm ukoll il-gwerra f’Gatt, u kien hemm raġel twil b’sitt iswaba’ f’kull id u f’kull sieq, erbgħa u għoxrin b’kollox; dan ukoll kien minn nisel Rafa.

²¹U kien iżeblaħ lil Iżrael, imma qatlu Ġonatan bin Simgħi, ħu David.

²²Dawn l-erbgħa twieldu lil Rafa f’Gatt, u mietu b’id David u b’id il-qaddejja tiegħu.