Read Maltese Bible with DC – IL-BIBBJA IL-KOTBA MQADDSA 2 SAMWEL 23 Bible Online

2 SAMWEL 23 - Maltese Bible with DC – IL-BIBBJA IL-KOTBA MQADDSA bible

2 SAMWEL 23

¹Dan huwa l-aħħar kliem ta’ David, l-oraklu ta’ David, bin Ġesse, l-oraklu tal-bniedem li Alla għolla, il-prinċep midluk ta’ Alla ta’ Ġakobb, l-għannej ħelu ta’ Iżrael:

²“L-ispirtu tal-Mulej jitkellem bija, u kelmtu fuq ilsieni.

³Jitkellem Alla ta’ Ġakobb, il-Blata ta’ Iżrael kellimni: ‘Min jaħkem fil-biża’ ta’ Alla,

⁴hu bħad-dawl taż-żerniq ma’ tlugħ ix-xemx, għodwa bla sħab, li tnibbet wara x-xita l-ħaxix.’

⁵Sħiħa hi dari quddiem Alla; għax patt għal dejjem għamel miegħi; f’kollox imħejji u mħares tajjeb. Għax mhux hu li jnissilli s-salvazzjoni u l-għaqda tiegħi kollha?

⁶Il-ħżiena lkoll bħal xewk mormi, ħadd ma jiġbru bl-id;

⁷u anqas imisshom jekk mhux b’ħadida jew b’għuda ta’ lanza, u jeqridhom u bin-nar jaħraqhom.”

⁸Dawn huma l-ismijiet tal-qalbiena ta’ David: Isboset il-Ħakmuni, l-aqwa fost it-tlieta: hu li venven il-lanza tiegħu fuq tmien mitt raġel, u qatilhom f’darba waħda.

⁹Warajh jiġi Elgħażar bin Dodu, l-Aħoħi, wieħed mit-tliet qalbenin. Kien ma’ David f’Pas-dammim, meta l-Filistin inġabru għall-ġlied; l-Iżraelin reġgħu lura,

¹⁰imma hu baqa’ f’postu jagħti fuq il-Filistin sakemm idu għejiet u bbieset max-xabla. Dak in-nhar il-Mulej għamel rebħa kbira; imbagħad il-poplu mar warajh għall-priża biss.

¹¹U mbagħad warajh kien hemm Samma bin Agi, il-Ħarari. Kienu nġabru l-Filistin f’Leħi, fejn kien hemm għalqa mimlija għads. Il-poplu kien ħarab minn quddiem il-Filistin,

¹²imma hu baqa’ hemm wieqaf f’nofs l-għalqa, ħelisha, u ħarbat lill-Filistin. U dak in-nhar il-Mulej għamel rebħa kbira.

¹³Tlieta minn fost it-tletin il-kbar kienu niżlu fil-bidu tal-ħsad ħdejn David, fl-għar ta’ Għadullam. Il-Filistin kienu fil-kamp fil-wied ta’ Refajn.

¹⁴David kien fil-fortizza, u f’Betlehem kien hemm l-għases Filistin.

¹⁵David ġietu xewqa u qal: “Min se jisqini mill-ilma tal-bir li hemm fil-bieb ta’ Betlehem?”

¹⁶It-tliet qalbenin qasmu minn nofs il-kamp tal-Filistin, u mlew l-ilma mill-bir fil-bieb ta’ Betlehem, u qabduh u ġabuh lil David. Imma hu ma riedx jixorbu, u sawbu fl-art b’offerta lill-Mulej,

¹⁷u qal: “Iħarisni l-Mulej milli nagħmel dan: nixrob jien id-demm ta’ nies li marru jtarrfu ħajjithom?” Għalhekk ma riedx jixrob. Dan hu li għamlu t-tliet qalbenin.

¹⁸L-aqwa fost it-tletin kien Abisaj, ħu Ġowab bin Seruja, hu li kien venven il-lanza tiegħu fuq tliet mitt ruħ u qeridhom u għamel isem fost it-tletin.

¹⁹Hu li kellu fost it-tletin l-akbar ġieħ u sar il-kmandant tagħhom, imma ma laħħaqx mat-tlieta.

²⁰Benaja bin Ġeħojada minn Kabsel, raġel ta’ ħila li għamel ħafna ħwejjeġ tal-għaġeb. Kien hu li għeleb iż-żewġ ulied ta’ Arijel ta’ Mowab. Kien hu wkoll li niżel u qatel l-iljun f’nofs il-ġiebja dakinhar li għamel is-silġ.

²¹Kien hu li qatel lil wieħed Eġizzjan: dan l-Eġizzjan kien twil ħafna u f’idu kellu lanza; iżda hu niżel għalih bil-ħatar, ħa l-lanza minn id l-Eġizzjan, u qatlu bil-lanza tiegħu stess.

²²Dan għamel Benaja bin Ġeħojada u għamel isem fost dawk it-tliet qalbiena.

²³Fost it-tletin hu li kellu l-akbar ġieħ, imma ma laħħaqx mat-tlieta. David qiegħdu fuq il-kunsill tiegħu.

²⁴Fost it-tletin kien hemm ukoll: Għaxajel, ħu Ġowab; Elħanan bin Dodu minn Betlehem;

²⁵Samma, il-Ħarodi; Elika, il-Ħarodi;

²⁶Ħeles, il-Palti; Għira bin Għikkes, minn Tekugħa,

²⁷Abigħeżer, l-Għanatoti; Mebonnaj, il-Ħusaj;

²⁸Salmon, l-Aħoħi; Maħaraj, in-Netufi,

²⁹Ħeled bin Bagħna, in-Netufi; Ittaj bin Ribaj, minn Gibgħa ta’ Benjamin;

³⁰Banaja, l-Pirgħatuni; Ħiddaj mill-widien ta’ Ġagħas;

³¹Abi-għalbon, l-Għarbati; Għażmawet, il-Baħurim;

³²Eljaħba, is-Sagħalbuni; Ġasen, il-Guni;

³³Ġonatan bin Samma, il-Ħarari; Aħijam bin Sarar, il-Ħarari;

³⁴Elifelet bin Aħasbaj, minn Bet-magħka; Eligħam bin Aħitofel, il-Giluni;

³⁵Ħesraw, il-Karmeli, Pagħraj, l-Arbi;

³⁶Igal bin Natan minn Soba; Bani, il-Gaddi;

³⁷Selek, l-Għammoni; Naħaraj, il-Biroti, skudier ta’ Ġowab bin Seruja;

³⁸Għira, il-Ġetri; Gareb, il-Ġetri;

³⁹Urija, il-Ħitti; sebgħa u tletin b’kollox.