Read Maltese Bible with DC – IL-BIBBJA IL-KOTBA MQADDSA 2 SAMWEL 9 Bible Online

2 SAMWEL 9 - Maltese Bible with DC – IL-BIBBJA IL-KOTBA MQADDSA bible

2 SAMWEL 9

¹U David staqsa: “Hemm xi ħadd li għadu ħaj mid-dar ta’ Sawl, biex nurih imħabbti f’ġieħ Ġonatan?”

²Kien hemm qaddej mid-dar ta’ Sawl, li kien jismu Siba. U sejħulu għal quddiem David, u s-sultan staqsieh: “Inti Siba?” u dak wieġeb: “Qaddej tiegħek!”

³U s-sultan qallu: “Fadal xi ħadd mid-dar ta’ Sawl biex nagħmel miegħu l-ħniena ta’ Alla?”

⁴U Siba wieġeb lis-sultan: “Għad fadal bin Ġonatan, zopp minn riġlejh it-tnejn.” U s-sultan issokta jgħidlu: “Fejn hu?” U Siba wieġeb lis-sultan: “Qiegħed fid-dar ta’ Makir bin Għammijel f’Lodebar.”

⁵U s-sultan David bagħat għalih u ġabuh mid-dar ta’ Makir bin Għammijel minn Lodebar.

⁶U Mefiboset bin Ġonatan, bin Sawl, resaq quddiem David u niżel wiċċu fl-art quddiemu u tah qima. U David qal: “Mefiboset!” U dak wieġbu: “Qaddej tiegħek!”

⁷U David qallu: “La tibżax, għax se nagħmel ħniena miegħek f’ġieħ Ġonatan missierek; irroddlok lura l-oqsma kollha ta’ missierek Sawl, u inti tiekol mill-mejda tiegħi għal dejjem.”

⁸U niżel wiċċu fl-art quddiemu u tah qima u qallu: “X’inhu l-qaddej tiegħek biex inti dawwart wiċċek lejn kelb mejjet bħali?”

⁹U s-sultan sejjaħ lil Siba, il-qaddej ta’ Sawl, u qallu: “Kulma kellu Sawl u d-dar tiegħu tajtu lil bin sidek.

¹⁰Inti taħdimlu r-raba’, inti u wliedek u l-qaddejja tiegħek; u int iġġib il-frott lil bin sidek, ħalli dar sidek ikollhom x’jieklu; imma Mefiboset bin Sidek jibqa’ jiekol dejjem mill-mejda tiegħi.” Siba, li kellu ħmistax-il tifel u għoxrin qaddej,

¹¹wieġeb lis-sultan: “Kulma ordna sidi s-sultan lill-qaddej tiegħu, hekk jagħmel il-qaddej tiegħu.” U Mefiboset baqa’ jiekol mill-mejda tas-sultan bħallikieku wieħed minn uliedu.

¹²Mefiboset kellu tifel żgħir jismu Mika; u dawk kollha li kienu joqogħdu f’dar Siba kienu qaddejja ta’ Mefiboset.

¹³U Mefiboset kien joqgħod Ġerusalemm, għax kien jiekol mill-mejda tas-sultan, u kien zopp minn riġlejh it-tnejn.