Read Maltese Bible with DC – IL-BIBBJA IL-KOTBA MQADDSA 1 SLATEN 1 Bible Online

1 SLATEN 1 - Maltese Bible with DC – IL-BIBBJA IL-KOTBA MQADDSA bible

1 SLATEN 1

¹U s-sultan David kien xjieħ u mdaħħal fiż-żmien, u kienu jgħattuh bil-ħwejjeġ, imma ma kienx jisħon.

²U l-qaddejja tiegħu qalulu: “Ħa jfittxu lil sidna s-sultan xebba żagħżugħa biex toqgħod madwar is-sultan, u ddur bik, torqod fi ħdanek, u jżomm sħun sidi s-sultan.”

³U fittxew żagħżugħa sabiħa mal-pajjiż kollu ta’ Iżrael, u sabu lil Abisag is-Sunamija, u ħaduha għand is-sultan.

⁴U ż-żagħżugħa kienet sabiħa ħafna, u kienet iddur bis-sultan u sservih, imma hu ma għarafhiex b’martu.

⁵Adonija bin Ħaggit beda jitkabbar u jgħid: “Ħa nsaltan jien!” U għamel imriekeb, rikkieba, u gwardja ta’ ħamsin raġel jiġru quddiemu.

⁶Missieru qatt ma liemu u qallu: “Għaliex qiegħed tagħmel hekk?” Kien ukoll ta’ bixra sabiħa ħafna, u kien twieled wara Absalom.

⁷Ġara li ftiehem ma’ Ġowab bin Seruja u ma’ Abjatar, il-qassis. Dawn kienu jżommu ma’ Adonija, u marru warajh.

⁸Iżda Sadok, il-qassis, u Benajja bin Ġeħojada, u Natan, il-profeta, u Simgħi, Regħi, u l-qalbiena ta’ David ma żammewx ma’ Adonija.

⁹U Adonija offra sagrifiċċji ta’ nagħaġ, baqar u għoġiela msemmna ħdejn il-blata ta’ Żohelet, li kienet ħdejn Għajn-rogel, u stieden lil ħutu kollha, ulied is-sultan, u n-nies kollha ta’ Ġuda, il-qaddejja tas-sultan.

¹⁰Imma ’l Natan, il-profeta, lil Benajja, u ’l-qalbenin, u ’l Salamun ħuh, ma stedinhomx.

¹¹U Natan kellem lil Batseba, omm Salamun, u qalilha: “Ma smajtx int li Adonija bin Ħaggit sar sultan bla ma jaf xejn sidna David?

¹²Issa ejja ħa nagħtik parir, u ssalva ħajtek, u l-ħajja ta’ ibnek Salamun.

¹³Mur u idħol għand is-sultan David, u għidlu: ‘Mhux int sidi s-sultan, li kont ħlift lill-qaddejja tiegħek u għedtilha: Iva, Salamun, ibnek, isaltan warajja, u hu joqgħod fuq it-tron tiegħi? Għaliex issa sar sultan Adonija?’

¹⁴Ara, kif tkun hemm titkellem mas-sultan, jien nidħol warajk, u nsaħħaħ kliemek.”

¹⁵U Batseba marret għand is-sultan f’kamartu, u s-sultan kien xjieħ ħafna; u Abisag is-Sunamija kienet iddur bih.

¹⁶U Batseba nxteħtet wiċċha fl-art, u sellmet lis-sultan; u s-sultan qalilha: “X’minnek?”

¹⁷U hi weġbitu: “Sidi! Int kont ħlift bil-Mulej, Alla tiegħek, lill-qaddejja tiegħek: ‘Salamun ibnek isaltan warajja, u hu joqgħod fuq it-tron tiegħi.’

¹⁸U issa, ara, sar sultan Adonija, u s-sultan sidi ma jaf b’xejn.

¹⁹U offra sagrifiċċji ta’ baqar u għoġiela msemmna u ħafna nagħaġ; u stieden lil ulied is-sultan kollha, lill-qassis Abjatar, u lil Ġowab, il-kmandant tal-eżerċtu, imma lil Salamun, il-qaddej tiegħek, ma stednux.

²⁰U issa, sultan sidi, għajnejn Iżrael kollu huma fuqek[1] biex ikunu jafu min se joqgħod fuq it-tron wara sidi s-sultan.

²¹Għax inkella malli sidi s-sultan imur jistrieħ ma’ missirijietu, jien u ibni Salamun jgħodduna b’nies ħatja.”

²²U, ara, kif kienet għadha titkellem mas-sultan jidħol Natan, il-profeta.

²³U taw l-aħbar lis-sultan u qalulu: “Ara, hawn Natan, il-profeta.” U dan daħal quddiem is-sultan, u sellem lis-sultan b’wiċċu fl-art.

²⁴U Natan qallu: “Sidi s-sultan; jaqaw għedt: ‘Adonija jsaltan warajja u joqgħod fuq it-tron tiegħi’?

²⁵Għax illum niżel u offra b’sagrifiċċji baqar, għoġiela msemmna u ħafna nagħaġ; stieden ’l ulied is-sultan ilkoll u l-kmandanti tal-eżerċtu, lil Abjatar, il-qassis, u bħalissa qegħdin jieklu u jixorbu miegħu, u jgħajtu: ‘Viva s-sultan Adonija.’

²⁶Imma lili, il-qaddej tiegħek, lil Sadok, il-qassis, u lil Benajja bin Ġeħojada, u lil Salamun, il-qaddej tiegħek, ma stedinniex.

²⁷Jaqaw dan sar bl-ordni tas-sultan sidi bla ma għarraft lill-qaddejja tiegħek min se joqgħod fuq it-tron tiegħu warajh?”

²⁸Is-sultan David wieġeb u qal: “Sejħuli lil Batseba.” U din daħlet quddiem is-sultan u qagħdet bilwieqfa quddiemu.

²⁹U s-sultan ħalef u qal: “Daqs kemm hu ħaj il-Mulej, li ħelisli ’l ħajti minn kull għawġ!

³⁰Bħalma kont ħliftlek bil-Mulej, Alla ta’ Iżrael, u għedtlek: ‘Salamun, ibnek, għad isaltan warajja, u joqgħod fuq it-tron tiegħi minn floki,’ hekk nagħmel illum stess.”

³¹U Batseba nxteħtet wiċċha fl-art u qiemet lis-sultan u qalet: “Jalla jgħix sidi s-sultan David għal dejjem!”

³²U s-sultan David qal: “Sejħuli lil Sadok, il-qassis, u lil Natan, il-profeta, u lil Benajja bin Ġeħojada.” U dawn daħlu quddiem is-sultan.

³³U s-sultan qalilhom: “Ħudu magħkom il-qaddejja ta’ sidkom, u rikkbu lil Salamun ibni fuq il-bagħla tiegħi, u niżżluh f’Giħon,

³⁴u hemm jidilkuh sultan fuq Iżrael Sadok, il-qassis, u Natan, il-profeta; u intom doqqu t-tromba u għajtu: ‘Viva s-sultan Salamun!’

³⁵Imbagħad titilgħu warajh, u hu jiġi, u joqgħod fuq it-tron tiegħi, u jsaltan minn floki, għax lilu jien ordnajt li jkun prinċep fuq Iżrael u fuq Ġuda.”

³⁶U Benajja bin Ġeħojada wieġeb lis-sultan u qallu: “Ammen! Hekk ikun! Hekk jordna l-Mulej, Alla ta’ sidi s-sultan.

³⁷U bħalma l-Mulej kien ma’ sidi s-sultan, hekk ikun ma’ Salamun, u jkabbarlu t-tron tiegħu aktar mit-tron ta’ sidi s-sultan David.”

³⁸U niżel Sadok, il-qassis, u Natan, il-profeta, u Benajja bin Ġeħojada, il-Keretin u l-Peletin[2], u rikkbu lil Salamun fuq il-bagħla tas-sultan David, u wassluh sa Giħon.

³⁹U Sadok, il-qassis, ħa l-qarn taż-żejt mit-tabernaklu u dilek lil Salamun. Imbagħad daqqew it-tromba u l-poplu kollu għajjat: “Viva s-sultan Salamun!”

⁴⁰U l-poplu kollu tala’ warajh idoqqu l-flawt, u jaqbżu b’ferħ kbir, u l-art riedet tinqasam bl-għajjat tagħhom.

⁴¹Adonija u l-mistednin, li kienu miegħu, semgħu l-għajjat sewwasew malli spiċċaw jieklu. Sama’ wkoll Ġowab id-daqq tat-tromba u qal: “Għalfejn dan l-għajjat u t-tqanqil tal-belt?”

⁴²Kien għadu jitkellem meta wasal Ġonatan bin Abjatar, il-qassis. U Adonija qallu: “Ejja ’l hawn, raġel ta’ ħila. Int aħbar tajba ġġib.”

⁴³U Ġonatan wieġeb lil Adonija u qallu: “Mela x’inhu! Sidna s-sultan David għamel sultan lil Salamun.

⁴⁴U s-sultan bagħat miegħu lil Sadok, il-qassis, u lil Natan, il-profeta, u Benajja bin Ġeħojada, lill-Keretin u ’l-Peletin, u rikkbuh fuq il-bagħla tas-sultan.

⁴⁵U l-qassis Sadok u l-profeta Natan dilkuh sultan f’Giħon, u telgħu minn hemm jgħajtu bil-ferħ u l-belt kollha tqanqlet. Dan hu l-għajjat li smajtu.

⁴⁶U Salamun diġà qiegħed fuq it-tron tas-saltna.

⁴⁷U l-qaddejja tas-sultan ġew jifirħu lil sidna s-sultan David u jgħidulu: ‘Jalla Alla tiegħek jgħolli isem Salamun ’il fuq minn ismek; u jkabbar it-tron tiegħu aktar mit-tron tiegħek.’ U s-sultan baxxa rasu fuq il-friex.

⁴⁸U s-sultan ukoll tkellem: ‘Imbierek il-Mulej, Alla ta’ Iżrael, li llum ta li wieħed minn nisli joqgħod fuq it-tron tiegħi, u narah b’għajnejja.”

⁴⁹Imbagħad il-mistednin ta’ Adonija nħasdu, u qamu u xterdu kulħadd għal triqtu.

⁵⁰U Adonija qabdu l-biża’ minn Salamun, u qam u mar, u qabad ma’ qrun l-artal[3].

⁵¹U taw l-aħbar lil Salamun u qalulu: “Ara, Adonija qiegħed jibża’ mis-sultan Salamun, u arah imqabbad ma’ qrun l-artal u jgħid: ‘Ħa jaħlifli llum is-sultan Salamun li ma joqtolx il-qaddej tiegħu bis-sejf.’ ”

⁵²U Salamun qal: “Jekk iġib ruħu ta’ raġel, ma taqax xagħra waħda minn ġismu fl-art, imma jekk iġib ruħu ħażin, imut.”

⁵³U s-sultan Salamun bagħat iniżżlu mill-artal, u hu mar u nxteħet fl-art quddiem is-sultan Salamun, u Salamun qallu: “Mur lejn darek!”