Read Maltese Bible with DC – IL-BIBBJA IL-KOTBA MQADDSA 1 SLATEN 10 Bible Online

1 SLATEN 10 - Maltese Bible with DC – IL-BIBBJA IL-KOTBA MQADDSA bible

1 SLATEN 10

¹U semgħet is-sultana ta’ Saba[26] bil-fama ta’ tħabrik Salamun għal isem il-Mulej, u ġiet biex iġġarrbu b’mistoqsijiet iebsa.

²U ġiet Ġerusalemm b’qatgħa ġmielha ta’ kbarat magħha, u b’iġmla mgħobbija b’tagħbija kbira ta’ ħwawar, u deheb u ħaġar prezzjuż, u ġiet għand Salamun, u qaltlu kulma kellha maħżun f’qalbha.

³U Salamun weġibha għal kulma staqsietu; xejn ma kien hemm li baqa’ moħbi għas-sultan, li ma kienx jista’ jwieġbu.

⁴U meta s-sultana ta’ Saba rat l-għerf kollu ta’ Salamun u d-dar li kien bena,

⁵l-ikel tal-mejda tiegħu, il-kunsill ta’ madwaru, is-servizz tal-qaddejja u lbieshom, il-kuppieri tiegħu, u s-sagrifiċċji tal-ħruq li kien joffri fit-tempju tal-Mulej, baqgħet mistagħġba;

⁶u qalet lis-sultan: “Tassew minnu dak li smajt f’arti fuqek u fuq għerfek.

⁷Ma ridtx nemmen dawn il-ħwejjeġ qabel ma ġejt u rajt b’għajnejja. U ma kinux ħabbruli n-nofs! L-għerf u l-ġid tiegħek huma aktar milli smajt.

⁸Henjin in-nies tiegħek, henjin il-qaddejja tiegħek, li qegħdin miegħek u jisimgħu dejjem l-għerf tiegħek.

⁹Ikun imbierek il-Mulej, Alla tiegħek, li tgħaxxaq bik u qiegħdek fuq it-tron ta’ Iżrael, għaliex il-Mulej dejjem ħabb lil Iżrael u għamlek sultan fuqhom biex tagħmel il-ħaqq u l-ġustizzja.”

¹⁰Imbagħad tat lis-sultan mija u għoxrin talent deheb, kotra kbira ta’ ħwawar u ħaġar prezzjuż: qatt ma ġiet kotra kbira ta’ ħwawar daqs dik li ġiebet is-sultana ta’ Saba lis-sultan Salamun.

¹¹U l-istess ġfien ta’ Ħiram, li kienu jġorru d-deheb minn Ofir, ġiebu minn Ofir kotra kbira ta’ injam tas-sandal u ħaġar prezzjuż.

¹²U mill-injam tas-sandal is-sultan għamel balawstri għat-tempju tal-Mulej u għall-palazz tas-sultan, kitarri u arpi għall-kantanti. U sal-lum għadu qatt ma ġie u qatt ma deher injam tas-sandal daqs dak li kien wasallu.

¹³U s-sultan Salamun ta lis-sultana ta’ Saba kulma kienet tixtieq u talbitu, barra li taha minn rajh ta’ sultan li kien. U hi qabdet it-triq u telqet, hi u l-qaddejja tagħha, lejn pajjiżha.

¹⁴U d-deheb li kien idaħħal kull sena Salamun kien ilaħħaq mas-sitt mija u sitta u sittin talent,

¹⁵minbarra dak li kienu jġibulu n-neguzjanti u d-dħul tal-kummerċ tal-merkanti, u mingħand is-slaten tal-Għarabja, u l-gvernaturi tal-pajjiż.

¹⁶U s-sultan Salamun għamel ukoll mitejn tarka tad-deheb battut; u kull tarka ħadet sitt mitt xekel deheb.

¹⁷U għamel ukoll tliet mitt tarka żgħira tad-deheb battut, u kull waħda ħadet tliet miniet deheb, u qegħedhom is-sultan f’dar il-Foresta tal-Libanu.

¹⁸U s-sultan għamel tron kbir tal-avorju u ksieh b’deheb mill-ifjen.

¹⁹It-tron kellu sitt tarġiet, b’ras ta’ għoġol fuq wara, u żewġ dirgħajn wieħed fuq kull naħa tal-maqgħad, u żewġ iljuni ħdejn id-dirgħajn,

²⁰u tnax-il ljun fuq is-sitt tarġiet, wieħed f’kull tarf ta’ tarġa, ’l hemm u ’l hawn. Qatt ma sar bħalu f’ebda saltna.

²¹U l-koppiet li kien jixrob minnhom is-sultan Salamun kienu kollha tad-deheb, u hekk ukoll tad-deheb fin kienu l-koppiet ta’ dar il-Foresta tal-Libanu. Xejn ma kien hemm tal-fidda; għax xejn ma kienu jqisuha l-fidda fi żmien Salamun.

²²Għax is-sultan kellu ġfien ta’ Tarsis fuq il-baħar mal-iġfien ta’ Ħiram; darba kull tliet snin dawn l-iġfien ta’ Tarsis[27] kienu jmorru u jġibu deheb u fidda, avorju u xadini, u paguni.

²³U s-slaten tal-art għaddiehom ilkoll is-sultan Salamun fl-għana u fl-għerf.

²⁴Id-dinja kollha kienet tfittex li tara wiċċ Salamun biex tisma’ għerfu li Alla żejjinlu moħħu bih.

²⁵U kien iġiblu kulħadd l-offerta tiegħu, oġġetti tal-fidda u oġġetti tad-deheb, ilbies u armi, ħwawar, żwiemel u bgħula ta’ kull sena.

²⁶U ġabar Salamun karrijiet u rikkieba, u kellu elf u erba’ mitt karru u tnax-il elf rikkieb, u qassamhom fl-ibliet tal-karrijiet u f’Ġerusalemm madwar is-sultan.

²⁷U l-fidda li kien hemm f’Ġerusalemm is-sultan ġiebha bħall-ġebel, u l-injam taċ-ċedru għamlu bħall-injam tat-tin selvaġġ li hemm fis-Sefela.

²⁸Kienu jġibu ż-żwiemel lil Salamun minn Musri u minn Kuwi[28]; kienu jġibuhom in-neguzjanti tas-sultan bil-prezz tas-suq.

²⁹Karru kien jiġi minn Musri bil-prezz ta’ sitt mitt xekel tal-fidda u żiemel b’mija u ħamsin. Hekk ukoll dawn in-neguzjanti tas-sultan kienu jbigħuhom lis-slaten tal-Ħittin u s-slaten ta’ Aram.