Read Maltese Bible with DC – IL-BIBBJA IL-KOTBA MQADDSA 1 SLATEN 15 Bible Online

1 SLATEN 15 - Maltese Bible with DC – IL-BIBBJA IL-KOTBA MQADDSA bible

1 SLATEN 15

¹Fis-sena tmintax tas-sultan Ġerobogħam bin Nebat, beda jsaltan Abijam fuq Ġuda.

²Tliet snin dam isaltan f’Ġerusalemm; u ommu kien jisimha Magħka bint Absalom.

³U għamel id-dnubiet kollha li kien għamel missieru qablu: qalbu ma kinitx sħiħa mal-Mulej, Alla tiegħu, bħalma kienet qalb David missieru.

⁴Madankollu, il-Mulej, Alla tiegħu, ħallielu minħabba David xrara f’Ġerusalemm billi qajjimlu lil ibnu warajh, u żamm wieqfa Ġerusalemm.

⁵Għax David kien għamel is-sewwa f’għajnejn il-Mulej, u qatt f’għomru kollu ma warrab minn dak kollu li kien ordnalu l-Mulej ħlief fil-każ ta’ Urija l-Ħitti.

⁶U kien hemm il-gwerra tul ħajtu kollha bejn Reħobogħam u bejn Ġerobogħam.

⁷U l-bqija tal-ġrajja ta’ Abijam, u kulma għamel, kollha miktuba fi Ktieb il-Ġrajja tas-Slaten ta’ Ġuda; u kien hemm dejjem il-gwerra bejn Abijam u bejn Ġerobogħam.

⁸U Abijam strieħ ma’ missirijietu u difnuh fil-belt ta’ David; u daħal isaltan floku ibnu Asa.

⁹Fl-għoxrin sena ta’ Ġerobogħam, sultan ta’ Iżrael, beda jsaltan Asa, sultan ta’ Ġuda.

¹⁰U saltan wieħed u erbgħin sena f’Ġerusalemm, u ommu kien jisimha Magħka bint Absalom.

¹¹U Asa għamel is-sewwa f’għajnejn il-Mulej bħalma kien għamel David missieru.

¹²U warrab l-irġiel prostituti tas-santwarji mill-pajjiż, u neħħa l-idoli kollha li kienu għamlu missirijietu.

¹³Warrab saħansitra lil ommu Magħka u neħħieha minn reġina-omm, għax kienet għamlet idolu moqżież lil Asera; u Asa kisser dan l-idolu u ħarqu fil-wied ta’ Kedron.

¹⁴Imma s-santwarji ma tneħħewx; biss qalb Asa kienet sħiħa mal-Mulej għomru kollu.

¹⁵U daħħal f’dar il-Mulej l-offerti mqaddsa ta’ missieru u l-offerti tiegħu, fidda, deheb u ħwejjeġ oħra.

¹⁶U kien hemm il-gwerra bejn Asa u bejn Bagħsa, sultan ta’ Iżrael, għomorhom kollu.

¹⁷U Bagħsa, sultan ta’ Iżrael, tala’ kontra Ġuda, u bena Rama, biex ma jħallix lil Asa, sultan ta’ Ġuda, la jidħol u la joħroġ.

¹⁸U Asa ħa l-fidda u d-deheb kollu li kien baqa’ fit-teżor ta’ dar il-Mulej, u fit-teżor tal-palazz tas-sultan, u tahom f’idejn il-qaddejja tiegħu, u bagħathom għand Benħadad bin Tabrimmon, bin Heżjon, sultan ta’ Aram, li kien joqgħod Damasku, u qallu:

¹⁹“Ħa jkun hemm patt bejni u bejnek, bħalma kien hemm bejn missieri u bejn missierek. Hawn qiegħed nibgħatlek ir-rigali tal-fidda u d-deheb. Ħoll il-patt li għandek ma’ Bagħsa, sultan ta’ Iżrael, sabiex iwarrab minni.”

²⁰U Benħadad sama’ mis-sultan Asa, u bagħat il-kmandanti tal-eżerċtu li kellu, biex jaħbtu għall-ibliet ta’ Iżrael; u ħarbtu lil Għijon, lil Dan, lil Abel-bet-magħka, u lil Kinneret kollha bl-art kollha ta’ Naftali.

²¹Malli Bagħsa sama’ b’dan kollu, waqqaf il-bini ta’ Rama u raġa’ lura f’Tirsa.

²²Imbagħad is-sultan Asa laqqa’ lil Ġuda kollha bla ma ħalla ’l ħadd, u ħa l-ġebel u l-injam ta’ Rama, li bihom kien bnieha Bagħsa; u s-sultan Asa bena bihom Geba ta’ Benjamin u Misfa.

²³Il-bqija tal-ġrajja kollha ta’ Asa u r-rebħiet tiegħu, u l-opri tiegħu, u l-ibliet li bena, kollox hu miktub fi Ktieb il-Ġrajja tas-Slaten ta’ Ġuda. Imma fi xjuħitu marad b’riġlejh.

²⁴U Asa strieħ ma’ missirijietu, u difnuh ma’ missirijietu fil-belt ta’ David missieru; u daħal isaltan floku Ġosofat ibnu.

²⁵Nadab bin Ġerobogħam laħaq sultan fuq Iżrael fit-tieni sena ta’ Asa, sultan ta’ Ġuda; u saltan fuq Iżrael għal sentejn.

²⁶U għamel il-ħażin f’għajnejn il-Mulej, u mexa fit-triq ta’ missieru; u għamel id-dnubiet tiegħu, li fihom kien waqqa’ lil Iżrael.

²⁷Bagħsa bin Aħija, mit-tribù ta’ Issakar, għamel konfoffa kontrih; u Bagħsa qatlu f’Gibbeton, belt tal-Filistin, meta Nadab u l-Iżraelin kollha kienu dawru lil Gibbeton.

²⁸Bagħsa qatlu fit-tielet sena ta’ Asa, sultan ta’ Ġuda, u sar sultan floku.

²⁹Malli beda jsaltan qered id-dar kollha ta’ Ġerobogħam; ma kienx hemm ruħ ħajja mid-dar ta’ Ġerobogħam li ma qeridhiex skont il-kelma tal-Mulej, li kien tkellem il-Mulej permezz tal-qaddej tiegħu Aħija, is-Siloni,

³⁰minħabba d-dnubiet ta’ Ġerobogħam, li dineb hu u ġagħal lil Iżrael jidinbu, u b’hekk għaddab il-Mulej, Alla ta’ Iżrael.

³¹Il-bqija tal-ġrajja ta’ Nadab u kulma għamel huma miktuba fi Ktieb il-Ġrajja tas-Slaten ta’ Iżrael.

³²U kien hemm il-gwerra bejn Asa u bejn Bagħsa, sultan ta’ Iżrael, għomorhom kollu.

³³Fit-tielet sena ta’ Asa, sultan ta’ Ġuda, beda jsaltan Bagħsa bin Aħija, fuq Iżrael kollu, f’Tirsa; u dam isaltan għal erbgħa u għoxrin sena.

³⁴Għamel il-ħażin f’għajnejn il-Mulej, u qabad it-triq ta’ Ġerobogħam, u waqa’ fi dnubietu, u ġagħal lil Iżrael jidneb.