Read Maltese Bible with DC – IL-BIBBJA IL-KOTBA MQADDSA 1 SLATEN 21 Bible Online

1 SLATEN 21 - Maltese Bible with DC – IL-BIBBJA IL-KOTBA MQADDSA bible

1 SLATEN 21

¹Wara dan ġara li Nabot, raġel minn Ġeżragħel, kellu għalqa tad-dwieli f’Ġeżragħel ħdejn il-palazz ta’ Aħab, sultan ta’ Samarija.

²U Aħab qal lil Nabot: “Agħtini l-għalqa tiegħek tad-dwieli biex nagħmel minnha ġnien tal-ħxejjex billi qiegħda maġenb dari. Flokha nagħtik għalqa oħra tad-dwieli aħjar minnha; jew, jekk jidhirlek li jkun aħjar, nagħtik flus b’kemm tiswa.”

³Iżda Nabot wieġeb lil Aħab: “Iħarisni l-Mulej milli qatt nagħtik wirt missirijieti!”

⁴Aħab mar id-dar bil-buli u b’dagħdigħa fuqu minħabba fil-kliem li Nabot, il-Ġeżragħeli, kien qallu: “Ma nagħtikx wirt missirijieti.” Mar jimtedd f’soddtu, dawwar wiċċu u ma kiel xejn.

⁵Resqet lejh martu Ġeżabel, u staqsietu: “Għala inti bil-buli, u ma trid tiekol xejn?”

⁶U hu wieġeb: “Jien kellimt lil Nabot, il-Ġeżragħeli, u għedtlu: ‘Agħtini l-għalqa tiegħek tad-dwieli bil-flus kemm tiswa; jew, jekk jidhirlek li jkun aħjar, nagħtik għalqa oħra tad-dwieli flokha.” U hu wieġeb: “Ma nagħtikx l-għalqa tiegħi tad-dwieli.”

⁷U martu Ġeżabel qaltlu: “Issa int tridha ta’ sultan fuq Iżrael? Qum, ħu xi ħaġa tal-ikel, u tieħu r-ruħ. Jiena nagħtihielek l-għalqa tad-dwieli ta’ Nabot, il-Ġeżragħeli.”

⁸U kitbet ittra f’isem Aħab, u ssiġillatha bis-siġill tiegħu; u l-ittra bagħtitha lix-xjuħ u lill-kbarat li kienu jgħammru ma’ Nabot fil-belt tiegħu.

⁹U fl-ittra kitbet, u qalet: “Niedu sawma, u qiegħdu lil Nabot f’ras il-kotra.

¹⁰U qiegħdu tnejn min-nies ta’ qattagħni biswitu biex jixhdu kontrih, u jgħidulu: ‘Dgħajt b’Alla u bis-sultan,’ u mbagħad oħorġuh, u ħaġġruh sa ma jmut.”

¹¹In-nies tal-belt tiegħu, ix-xjuħ u l-kbarat li kienu jgħammru fil-belt tiegħu, għamlu kif bagħtet tgħidilhom fl-ittra Ġeżabel.

¹²Nidew sawma, u qiegħdu ’l Nabot f’ras il-poplu.

¹³U ġew tnejn min-nies mill-agħar, u poġġew quddiemu; imbagħad dawn in-nies mill-agħar xlew lil Nabot quddiem il-poplu b’dan il-kliem: “Nabot seħet lil Alla u lis-sultan.” Ħarġuh barra mill-belt, ħaġġruh, u miet.

¹⁴Malli dan, bagħtu jgħidu lil Ġeżabel: “Nabot ġie mħaġġar u miet.”

¹⁵Meta Ġeżabel semgħet li Nabot ħaġġruh u miet, marret tgħid lil Aħab: “Qum u ħu l-għalqa tad-dwieli ta’ Nabot, il-Ġeżragħeli, li ma riedx jagħtihielek bil-flus! Nabot ma għadux ħaj: miet!”

¹⁶Malli Aħab sama’ li Nabot miet, qam u niżel jieħu f’idejh l-għalqa tad-dwieli ta’ Nabot il-Ġeżragħeli.

¹⁷Il-Mulej kellem lil Elija, it-Tisbi, u qallu:

¹⁸“Qum, inżel għand Aħab, is-sultan ta’ Iżrael, li jgħammar f’Samarija. Issibu fl-għalqa tad-dwieli ta’ Nabot, fejn niżel biex jeħodha f’idejh.

¹⁹U għidlu dan: ‘Hekk jgħid il-Mulej: L-ewwel qtilt, u issa tisraq! U żid għidlu: ‘Hekk jgħid il-Mulej: Fejn il-klieb lagħqu demm Nabot, hemm il-klieb jilagħqu demmek ukoll[43].”

²⁰U wieġeb Aħab lil Elija: “Qbadtni, ja għadu tiegħi?” “Qbadtek,” qallu, “u la darba int begħt ruħek biex tagħmel il-ħażin quddiem il-Mulej,

²¹arani jien issa se nġib fuqek il-ħsara; jien neqred nislek warajk, inqaċċat mid-dar ta’ Aħab l-irġiel kollha, ħielsa jew ilsiera, f’Iżrael.

²²U nagħmel mill-familja tiegħek bħall-familja ta’ Ġerobogħam bin Nebat, u bħall-familja ta’ Bagħsa bin Aħija, għax inti għaddabtni u waqqajt lil Iżrael fid-dnub.”

²³Il-Mulej tkellem ukoll għal Ġeżabelu qal: ‘Fuq is-swar ta’ Ġeżragħel lil Ġeżabel għad jikluha l-klieb.’

²⁴Kull min mill-familja ta’ Aħab imut fil-belt, jikluh il-klieb; u min imut fir-raba’ jikluh it-tajr tal-ajru.”

²⁵U tassew, qatt ħadd bħal Aħab ma nbiegħ biex jagħmel il-ħażin f’għajnejn il-Mulej, billi martu Ġeżabel kienet issus warajh.

²⁶U l-qżież kollu li għamel billi mar wara l-idoli, bħalma għamlu l-Amurrin, li Alla kien keċċa minn quddiem ulied Iżrael.

²⁷Aħab, malli sama’ dan il-kliem, ċarrat ħwejġu, libes xkora fuq il-laħam, sam, beda jorqod bl-ixkora fuqu, u kien jgħaddi ħiemed ħiemed.

²⁸U Alla kellem lil Elija, it-Tisbi, u qallu:

²⁹“Rajt kif Aħab iċċekken quddiemi? Għax iċċekken quddiemi, ma nġibx fuqu l-ħsara fi żmienu; imma fi żmien ibnu nġibha l-ħsara fuq il-familja tiegħu.”